Read lumasaaba Buraambi 12 Bible Online

Buraambi 12 - lumasaaba bible

Buraambi 12

¹Mu bifukhu byeenebyo, umuyiinga Herode waarakikha khuukhola buubi khu batweela be lituuli lye bafukiilisi.

²Wawaamba lurima, weera Yakobo wandaaye wa Yokana.

³Ne n'abona ari shino Bayudaaya baashisiimile, waatsya mu moni khuwaamba ni Petero naye. Bino byakholekha mu bifukhu bye kamayiiya ke kimikaati kikikhasiila ta.

⁴Nga Herode waamalile khuwaamba Petero, waamura mwipuusu, waamurakho basilikhale khuumuliinda nga baraambisa tsimbalo tsya bane khu bane, nga shitsilililwa sheewe shili shiri lwanyuma lwe Kamayiiya ke Khuubirakho, amureere mu moni tse babaandu.

⁵Ne Petero n'aba nga ali umubowe mu mapuusu, bafukiilisi mu Yesu babelelela naabi khumuloombela isi Wele.

⁶Ne mu shilo nio bushe Petero areerebwe wa Herode khuumukhalila kumusaango, abe alikho akona akari e basilikhale babili, nga baamuboyile ni kiminyololo kibili, babaaliindila ibulafu nabo nga bebuliile khwipuusu.

⁷Lubaluba, malayika w'Omukasya waabonekha, buwaanga bwaamulikha mwipuusu mukari, waakhupakakho Petero mu mbafu, waamusisimusa, nga aloma ari, “Yinyukha khaangu.” Khaangukho kiminyololo kyaama khu makhono keewe kyaakwa.

⁸Malayika waamulomela ari, “Yibowa lukhoba lwoowo, naluundi ukwaare bilaalo byoowo.” Petero waakhola aryo. Malayika waamulomela luundi ari, “Kwaara tsingubo tsoowo, unondekho.”

⁹Petero waamuloondakho waarura ibulafu. Ne waalekha khumanya ari abe byeesi malayika alikho akhola bya ŋali ta, nga ambaasa ari alikho aroora.

¹⁰Ni baamala khuubira khu baliindi babaanyoowa, ni babaakhola khabili boola khu shilibwa nga shili she shishuuma. Shilibwa shino nisho shishiitsya mu shiriimba. Shilibwa shino shisheene sheyikulawo shonyene busa, barura ibulafu, bakyeenda lukyeendo luleeyikho. Lubaluba, malayika wamwawukhanakho.

¹¹Lwanyuma Petero kamakyesi kaamukobolamo waaloma ari, “Ari naamanyiile ilala ndi Umukasya waarumanile malayika weewe khukhuumusa ise khukhwaama mu mikhono kya Herode, ni khukhwaama mwiibyo byoosi abe byeesi Bayudaaya bambaasa khukhukhola khus'ise.”

¹²Aryo Petero n'amanya shino, wakyeendaka khaangu waatsya mu ntsu ya Malyamu, maayi wa Yokana, abe ulaangiwa liliindi ari Mako. Ibweeneyo abe bakali khu bafukiilisi babusanileyo balikho baloomba.

¹³Petero n'akhoonyaka khu lwiitsi lwe bulafu, umwakaanisi umukhaana ulaangiwa Roda weetsa khukhwikulawo kumulyaango.

¹⁴Ne n'amanya ari likono lyeesi aawulila liri lya Petero, khulwe kumwikhoyo kumukali waalekha khukhwikulawo kumulyaango ta, ne waatima busa weelayo waaboolela babaramile ari Petero weemikhile antsye khu lwiitsi.

¹⁵Kila nibo bamuloma bari, “Iwe wakwiile tsintsoli.” Ne Roda niye waalobelakho nga ababoolela ari shili sha ŋali. Lwanyuma be mu ntsu kila baloma bari, “Uyo ali malayika weewe busa.”

¹⁶Ne Petero weloosela khuukhoonyaka. Ne ni bekulawo lulwiitsi baabona nga niye, baasamilila busa.

¹⁷Petero waasuta kumukhono kweewe angaaki nga abaloma basile. Lwanyuma waabasontsoola byoosi, nga Umukasya n'amurusile mwipuusu. Waabaloma ari “Ni mutsye muboolelekho Yakobo ni be buulebe babaandi shishiindu shino.” Aryo Petero waabawukhanakho, waatsya mu shifwo shishiindi.

¹⁸Ni bwasha kumutikhinyi, aabawo khuutumbuukha khukali akari mu basilikhale khulwe khuutakhawo khwa Petero mwipuusu.

¹⁹Herode waalakila ari bawentselese naabi Petero. Ne ni baalekha khumunyoola ta, waareebelesa naabi basilikhale, waalakila ari beeribwe. Lwanyumakho Herode wenyukha khukhwaama i Buyudaaya, waatsya khuumenyakho i Kayisaliya.

²⁰Abe Herode waakhalalila naabi babaandu be Tuulo ni Sidoni. Nga baanyooyile khukhola busaale ni Bulaseto umusoleeli umukhulu uwe mu ntsu y'omuyiinga, baatsya mu bukali isi Herode, nga baloomba bari abeyakhile abewo lukoosi. Baakhola shino lwekhuuba abe shisiintsa shaawe shamisa biilyo mu shiibala sh'omuyiinga.

²¹Shifukhu abe sheesi baafukiilisanakho ni shoola, Herode wakwaara bikwaaro bye buyiinga, wekhala khu shitsoloŋo she khukhalilakho kimisaango, wabakanikhayo.

²²Kila babaandu bayokesela angaaki bari, “Likono ilyo shilili ly'omuundu ta, ne njeeba wele uli khukhukanikhayo isi ifwe.”

²³Lubaluba, malayika w'Omukasya wakhupa Herode aasi lwekhuuba abe siwesilemo Wele shiriifwa ta. Tsinyeende tsaamulya waafwa nakhufwa.

²⁴Ne Ilomo ya Wele yeloosela khuutsowa ni khuubalaaha.

²⁵Ni Balunaba ni Saulo ni baamalilisa kumulimo kwaabwe, baakobolayo i Yerusalemu, nga batsya ni Yokana, abe ulaangibwa lisiina liliindi ari Mako.