Read lumasaaba Buraambi 13 Bible Online

Buraambi 13 - lumasaaba bible

Buraambi 13

¹Mu bafukiilisi be Antiyoki mwabamo baŋoosi ni baleekeli, nga mu nibo mulimo Balunaba, Simeoni abe ulaangiwa Nigeli, ni Lusiyo uwe Kurene, ni Manaeni uwaba umusaale w'omuwuli Herode atweela ni Saulo.

²Ni baaba nga besaaya Umukasya naluundi nga babuya ntsala Umwoyo Umukhosefu waaloma ari, “Ngana mundoborere Balunaba ni Saulo, babe baburaawa lwe buraambi bweesi imbalaangiile khukhola.”

³Ne lwanyuma ni baamala khubuya ntsala ni khuloomba, babarakho kamakhono kaawe babarumana.

⁴Umwoyo Umukhosefu nga waabarumanile, batsya beekha i Selukiya, ni khukhwaama ibweeneyo baselengela i Kupuro.

⁵Ne ni boola i Salamisi, baleekelayo Ilomo ya Wele mu ntsu tsye khukhwisaayilamo tse Bayudaaya. Yokana[1] aaba ni nabo nga abayeetakho.

⁶Baryo baakyeenda khu shikelemeesi she Kupuro shoosi, khukhwoola ni Pafosi, isi baanyoola umuundu umufumu. Umuundu yuno aaba Umuyudaaya nga elaanga khuuba umuŋoosi, nga lisiina lyeewe bari Umwaana-Wa-Yesu.

⁷Umufumu yuno aaba musaale wa gafana Serugiyo Paulo umukhulu we shikelemeesi isho, uwaba umusaani we kamakhula naabi. Serugiyo yuno walaanga Balunaba ni Saulo nga akana khuuwulila Ilomo ya Wele.

⁸Ne umufumu yuno nga niye Elimasi (lisiina lyeewe limanyisa liryo mu Luyonaani), waabakhaandisa naabi, nga akana khuukoraanisa gafana yuno alekhe khufukiilila Ilomo ya Wele ta.

⁹Ne Saulo abe luundi ulaangibwa bari Paulo, wetsusibwa n'Umwoyo Umukhosefu, waamulolelela, waamwomiisilakho tsimoni.

¹⁰Kila aloma ari, “Iwe uli umwaana wa Sitaani, uli umusiku we shishiindu shoosi shishiili shikhosefu, wayitsula bubeeyi ni khukhola buubi! Ulyakamisa liina khuboraanisa kimikhoosi kimikwalaafu ky'Omukasya?

¹¹Bona aluno ari, kumukhono kw'Omukasya kunakhukhupa, kukhwikyelise umubofu. Unekyela umubofu nga s'ubona inyaanga ta.” Lubaluba, lubookha ni bibilima bya muwaamba tsimoni, wabubuuka busa nga aweentsa umuundu umuwaamba khu mukhono amuraangilile.

¹²Ne gafana n'abona byoosi bibyakholekha, wekyela umufukiilisi mu Kristo, lwekhuuba eyaanga naabi khuleekela khw'Omukasya nga ni khuli.

¹³Paulo ni babaandu beesi aaba ni nabo, baama i Pafosi, baambukha inyaantsa baatsya i Peruga shiriimba shishiili mu Panfiliya. Ne Yokana abe lisiina lyeewe liliindi bari Mako wabalekhela ibweeneyo wakobolayo i Yerusalemu.

¹⁴Babaaramile belooselayo khukhwaama i Peruga, khukhwoolesa ni boola i Antiyoki shishiili mu Pisidiya. Ne shifukhu sha Sabato ni shoola, baatsya mu ntsu iye khukhwisaayilamo, bekhala aasi.

¹⁵Lwanyuma lwe khusoma khukhwaama mu bibyaronebwa mu makaambila ka Musa ni mu baŋoosi, baraangilisi be ntsu ye khukhwisaayilamo, bakaanisa buurume isi baarume bari, “Bebuulebe, noola muliyo ni shilomo shoosi shishisamo kamaani, ni mwiitse mukanikhe.”

¹⁶Paulo wenyukha weema, wenyusa kumukhono kweewe waabasilisa waaloma ari: “Ba Isiraeli bashaase ni nanywe Banaambo babesaaya Wele mweesi ni mundekeerese.

¹⁷Wele we babaandu ba Isiraeli aarobola bakuuka beefwe khaalekho. Nga bashiili mu bukulwa mu liloba lye ba Misiri, Wele aabatsowesa khuuba babaandu bakali naabi. Ni khulwe kamaani keewe kamakali aabarusayo mu linaambo ilyo.

¹⁸Khuumala kimiiko kamakhumi kane, abekhaliliikha nga bali mu mubiimbi.

¹⁹Khulwawe, Wele ahesa kamanaambo musaafu mu shiibala sha Kanani, wabawa nibo liiswa ilyo nga busikha bwaabwe.

²⁰Naluundi lwanyuma lwe kimiiko bitoondo bine ni kamakhumi karaano, Wele wabarobolela bakayi khuuba bawuli baabwe khukhwoolesa khu muboolo kwa Samweli umuŋoosi.

²¹“Lwanyuma baloomba bari Wele abawe umuyiinga. Kila Wele abawa Saulo umwaana wa Kiishi, uwaba uwe mu shikuuka sha Benyamini, uwaba umuyiinga waabwe khuumala kimiiko kamakhumi kane.

²²Ne Wele n'amala khuurusawo Saulo, wesawo Dawudi khuuba umuyiinga waabwe. Ni Wele wamulomakho ari, ‘Nanyoolile Dawudi umwaana wa Yese nga niye uli ni kumwoyo nga kukwase kumweene, niye ukana akhole byeesi ise ingana.’

²³Khukhwaama mwisaaye ly'omweeneyo, Wele warereera babaandu ba Isiraeli umuwonesi nga niye Yesu, nga n'abalomela.

²⁴Nga Yesu ashiili khwiitsa ta, Yokana aakuukuula khuubatisibwa khwe khukhwibiiyisa bibyoonako isi babaandu ba Isiraeli boosi.

²⁵Ne Yokana nga atsya khumalilisa buraambi bweewe aaloma ari, ‘Iseese muntsambaasilisa khuuba naanu? Iseese siindi niye isi mwaambasilisa khuuba uyo isi mwaliindilila ta. Ne akhali ndi lwanyuma lwase, iliyo uli khukhwiitsa isi ise ikhaakhila ni khukangulula bilaalo bye mu bikyele byeewe ta.’

²⁶“Bebuulebe, ba Isiraeli bashaase, babaana beenda ya Iburayimu ni Banaambo babaarya Wele, shilomo shino she buwonesi shakhwakaanisibwa ifwe.

²⁷Lwekhuuba babaandu babamenya mu Yerusalemu ni bawuli baabwe, sibamanya nga niye umuwonesi ta, namwe sibamanya bilomo bye baŋoosi bibisomebwa khu buli shifukhu sha Sabato ta. Shikila nibo boolelesa bilomo bino nga bamukhalila kumusaango kwe khuufwa.

²⁸Ikhaba nga sibanyoola ilomo yoosi imwiriisa ta, ne baloomba Pilato khumwiira.

²⁹Ne ni baamala khukhwoolelesa ibyo byoosi abe bibyamulomebwakho, bamuwanulayo khukhwaama khu musalaba bamwalisa mu ŋani.

³⁰Ne Wele wamulamusa khukhwaama mu bafu.

³¹Ne khumala bifukhu bikalikho busa waba nga abonekhela ibo boosi babeetsa ni naye i Yerusalemu khukhwaama i Galilaaya. Bano ari nibo bajulisi beewe isi babaandu.

³²“Ni nafwe ari khuli ano khubareerera inywe kamakhuuwa kamalayi kakaloma kari, byeesi Wele alomela bakuuka beefwe,

³³ari wabyoolelesela ifwe babaana baabwe, nga enyusa Yesu khukhwaama mu bafu. Naluundi nga ni shalomebwa mu Zabuli ye khabili shiri, ‘Iwe uli Umwaana wase, shaleelo nekyelile Paapawo.’

³⁴“Nilwe khukhwokesanisila ilala ari amulamusa khukhwaama mu bafu, nga s'anyala welayo khubola ta, waaloma ari, ‘Indikhuwa tsikhabi tsikhosefu tseesi nalomela Dawudi naluundi tsa ŋali.’

³⁵Nga makiboole n'ashilomela mu shisiintsa shishiindi she Zabuli ari, ‘Iwe s'ulilekha umukhosefu woowo abolele mu ŋani ta.’

³⁶“Lwekhuuba nga Dawudi n'amala khukhwakaanisa mu muboolo kweewe nga Wele n'akana, afwa, wasiikhiwa isi bakuuka beewe, aryo wabola.

³⁷Ne uyo isi Wele alamusa khukhwaama mu bafu s'abola ta.

³⁸“Nashiryo be buulebe, ba Isiraeli bashaase, mwakha mushimanye muri, khuubirira mu mweene uyo, ifwe khulaangilila shishiyakhilo she bibyoonako isi muli.

³⁹Naluundi shili ndi lwe khuubirira mu niye, buli mutweela ufukiilila arusibwakho ibyo byoosi abe byeesi kamakaambila ka Musa kakhanyala karusawo ta.

⁴⁰Ni nashiryo, ni mwiliinde nio buubi bubwalomekhakho ni baŋoosi bulekhe khuboolakho ta. Shino shalomekha shiri,

⁴¹‘Bona inywe babaali ni khulekelesa, kane mwiyaange naluundi muwele, lwekhuuba ise ikhola buraambi buno mu bifukhu byeenywe, buraambi buno bweesi mukhalifukiilisa ta, akhaba nga umuundu washibaboolele.’ ”

⁴²Ne Paulo ni Balunaba ni baaba nga barura ibulafu we ntsu iye khukhwisaayilamo, babaandu babekontselelela bari bakobole luundi bababoolelekho bilomo bino khu shifukhu sha Sabato shishilakho.

⁴³Ne babaandu boosi ni baamala khusalanila khukhwaama muntsu iye khukhwisaayilamo, Bayudaaya bakali busa ni Banaambo babashuukha bekyela bafukiilisi mu khwisaaya Wele nga Bayudaaya, baloondelela Paulo ni Balunaba. Baarume bano babaakhupilisa khukhwiloosela khuwandalalila mu bweela bwa Wele.

⁴⁴Khu shifukhu sha Sabato shisheelakho, babaandu boosi mu shiriimba beetsa khuuwulila Ilomo ya Wele.

⁴⁵Ne Bayudaaya ni baabona wanamuundu, libuba lyaabawaamba, bakhaandisa byeesi Paulo aloma, naluundi baamufwotsola.

⁴⁶Ne Paulo ni Balunaba baalomela angaaki nga sibarya ta bari, “Abe shaakhiile khunyoowa khuboolela Ilomo ya Wele isi inywe. Ne khukhwaama ni mushikaanile, mwekhaliile mwabeene kumusaango khukhwokesanisa muri bulamu bubukhawawo sibubakhila inywe ta. Ari ifwe kane khubalekhe inywe khwiile isi Banaambo.

⁴⁷Lwekhuuba Umukasya umweene wakhulakila ifwe ari, ‘Inywe nabareerewo khuuba buwaanga isi Banaambo, nio munyalise khuyila buwonesi buli andu osi mu shiibala.’ ”

⁴⁸Banaambo ni baawulila shino, bekhoya naluundi baabuyila Ilomo ya Wele. Bakali naabi khu nibo babaarobolebwa khuufuna buulamu bukhawawo ta, bekyela baafukiilisi.

⁴⁹Shiryo Ilomo y'Omukasya yaasalanisibwa mu shiriimba isho shoosi.

⁵⁰Ne Bayudaaya bakhonjelesa batweela khu besaayi babaaba bakhasi babamanyikhaane, ni basaani babamanyikhaane mu shiriimba, khurakikha khukubyeenga Paulo ni Balunaba. Baryo babatimisa khurura mu shiriimba shaawe.

⁵¹Baryo Paulo ni Balunaba baabasisakulila lufuumbi lwe mu bikyele byaabwe nga khabonelo khe khubekaana nabo, baatsya i Ikoniyo.

⁵²Baleekelwa betsusibwa kumwikhoyo n'Umwoyo Umukhosefu.