Read lumasaaba Buraambi 16 Bible Online

Buraambi 16 - lumasaaba bible

Buraambi 16

¹Paulo ni Silasi boola i Derube ni Lisitura, ibweeneyo baanyoolayo umuleekelwa lisiina lyeewe Timosewo. Timosewo yuno, maayi weewe aba umufukiilisi Umuyudaaya, ne paapawe aba Umuyonaani.

²Bebuulebe be Lisitura ni Ikoniyo baamukanikhakho bulayi.

³Paulo waakana Timosewo amwitubaasekho, atsye ni naye. Aryo waamuyila waamusheba imbalu lwekhuuba Bayudaaya boosi babaaba mu bifwo ibyo baaba baamanya bari paapawe wa Timosewo aba Umuyonaani.

⁴Ne ni baaba batsya nga babira mu biriimba, baboolela bafukiilisi khuwaambatsaka ibyo byoosi bibyakhalibwawo ni Baarume, ni bakhulu babaaba mu Yerusalemu.

⁵Baryo bafukiilisi mu Yesu bawandalasibwa mu khufukiilila, baba nga belooselakho bukali buli shifukhu.

⁶Paulo ni baashe bakyeenda baabira busa mu byaalo bye Firigiya, ni Galatiya, lwekhuuba Umwoyo Umukhosefu aabareesa khuuboolela ilomo yoosi mu shiibala sha Asiya.

⁷Ne ni boola khu lwaakha ni Misiya, baatsemakho khuutsya i Bisiniya, ne Umwoyo wa Yesu waalekha khufukiilisa ta.

⁸Baryo baabira bubiri mu Misiya, bekhilila boola i Turowa.

⁹Ibweeneyo Paulo waafuna khuubonekhelwa mu shilo, nga umusaani umu Masedoniya weemile amwikontselela ari, “Yambukha wiitse i Masedoniya, ukhuyeete.”

¹⁰Aryo Paulo n'amala khuufuna khuubonekhelwa khuno, weŋoonaŋoona khuutsya i Masedoniya, nga khwaamanyile khuri, Wele waakhulaangile khubaboolela Kamakhuuwa Kamalayi.

¹¹Khuryo khwambukha khurura i Turowa, khwaatsya butysi i Samoturake, ni shifukhu shishelakho khwoola i Neyapoli.

¹²Iyo khwaamayo khwaatsya i Filipi, shiriimba shikhulu she Masedoniya, shishaba shaayilibwa ni Baroma. Ibweeneyo khwamenyayo khuumala bifukhu bibyoolakho.

¹³Khu shifukhu sha Sabato, khwaarura ibulafu we kumulyaango kwe shiriimba, khwatsya khu ndulo khwe luluutsi, esi khwaambaasa khunyoolayo shifwo she khuloombelamo. Ibweeneyo khwekhala aasi khwakanikha isi bakhasi, babaaba babusaane atweela.

¹⁴Mutweela khu bakhasi babaaba bakhurekeeresa lisiina lyeewe aba Lidiya, uwaba ama mu Siyatila. Umukhasi yuno aba umukulisi we tsingubo tsinandaafu, naluundi nga esaayatsaka Wele. Umukasya wamubimbula kumwoyo kweewe, khuwulilisa byoosi byeesi Paulo akanikha.

¹⁵Aryo nga niye nibe mu ntsu yeewe boosi babatisibwile, wakhwikontselela nga aloma ari, “Noola mwamboone nga nase ndi umufukiilisi mu Mukasya, ni mwiitse mwinjile mu ntsu yase mwikhalemo.” Wakhukhonjelesa aryo.

¹⁶Ulwo ni khwaba nga khutsya mu shifwo esi baloombatsakilamo Wele, umukhaana mutweela umukulwa, uwabakho shisaambwa she khuulakula wakhwakanana, abe afunatsakila bakhulu beewe bibiindu bikali lwe khuulakula khweewe.

¹⁷Umukhaana yuno walondelela Paulo atweela ni nafwe, nga alomela angaaki ari, “Basaani bano babakaanisi ba Wele Uuli Angaaki lukali, bababoolela inywe intsila ye buwonesi.”

¹⁸Umukhaana uyo wakholatsaka aryo khumala bifukhu bikali. Ne Paulo n'abona nga khuyokesa khukali, washuukha waaloma shisaambwa shiibi ari, “Mu lisiina lya Yesu Kristo, ikhulakila ndi mururemo.” Mu mbuka nyeneyo shisaambwa shamururamo.

¹⁹Ne bakhulu b'omukhaana yuno ni baabona nga isaambo yaabwe iye khufunatsaka bibiindu bikali yaweelewo, bawaamba Paulo ni Silasi, babasindikhilisa, babayila mwikaantso isi bawuli.

²⁰Baabareera mu moni tse baakayi, baloma bari, “Basaani bano Bayudaaya benyusile shisaayumba mu shiriimba sheefwe,

²¹nga baleekela tsisaambo tse mbikho, isi ifwe Baroma khukhanyala khufukiilila namwe khwalondelela ta.”

²²Lituuli lye babaandu nalyo lyabetubaasakho khuluumba Paulo ni Silasi. Baryo bakayi balakila bari babafuule tsingubo tsaabwe, babaakhupe tsimiimbo.

²³Ne lwanyuma lwe khubakhupa naabi, babatuuma mwipuusu, balakila umuliindi khubaliindila ilala.

²⁴Naye ni baamala khumulakila baryo, umuliindi wabara mu khaseenge khe mukari, wababowela bikyele byaabwe khu bitsaangi.

²⁵Ne shiilo khukari, Paulo ni Silasi ni baaba nga baloomba, nga beembila Wele kimyeenya, ni babowe babaramile nga babarekeeresile.

²⁶Khaangukho aabawo khunikina khwe shiibala khukali, khukhwanikinisa lipuusu na musiinji kweene. Lubaluba, tsintsitsi tsoosi tsekuliwawo, ni kiminyololo kikyaba khu buli mubowe kyakangulukha.

²⁷Ne umuliindi n'asisimukha mwiilo, waabona nga tsintsitsi tsoosi tsekuliwilewo, niye waambaasa ari babowe boosi baatitukhile batsiile. Aryo kila asowolayo lurima lweewe nga akana eyire.

²⁸Ne Paulo waalomela angaaki ni likono likali ari, “Ukhikhola buubi bwoosi ta! Bona ifwe fweesi khuli ano.”

²⁹Umuliindi waaloomba ari bamureerere itaala. Wenjila mukari khaangu, wakwa aasi e bikyele bya Paulo ni Silasi, nga nanikina busa.

³⁰Aryo wabarusa ibulafu, waabaloma ari, “Basakhulu, ise nakhila khukhola shiina nio imbonesebwe.”

³¹Nabo Paulo ni Silasi baamwiilamo bari, “Fukiilila mu Mukasya Yesu, ni nawe kane uwonesewe, iwe wamweene atweela ni be mu ntsu yoowo boosi.”

³²Baryo baamuboolela niye Ilomo y'Omukasya, ni naabo boosi babaaba mu ntsu yeewe.

³³Mu saawa nyene iyo iye shiilo, umuliindi waabayila, waabasiinga kamakoontsyo, lwanyuma khaangukho niye ni be mu ntsu yeewe boosi baabatisibwa.

³⁴Aryo umuliindi uyo waabareera mu ntsu yeewe, waabawa bye khuulya, niye ni be mu ntsu yeewe boosi bekhoya, lwekhuuba boosi baaba baafukiilile mu Wele.

³⁵Ne ni bwasha kumutikhinyi, baakayi baarumana baasilikhale baabwe, nga babaloma bari, “Ni mulekhuule basaani abo batsye.”

³⁶Umuliindi we lipuusu waaboolela Paulo bilomo ibyo ari, “Baakayi baalakiile bari, iwe ni Silasi, mulekhuulibwe mutsye. Aso, ni murure, mutsye mu lukoosi.”

³⁷Ne Paulo waabaloma ari, “Baakhupiile ifwe mu moni tse babaandu, nga bashiili khukhuwotsesakho ta, akhaba nga ifwe khuli Baroma, baakhutuuma mwipuusu. Ne ari bakhurusamo mu shimoonyo baryeena? Taawe, babeene ni beetse bakhurusemo.”

³⁸Baasilikhale abo beelayo baaboolela baakayi bilomo bino. Ne ni baawulila bari Paulo ni Silasi bali Baroma, beesindukha naabi.

³⁹Ne baabeetsayo, baabekontselela babeyakhile, baabarusa mwipuusu, baabaloomba baamukhe shiriimba.

⁴⁰Lwanyuma Paulo ni Silasi nga baarurire mwipuusu, baatsya benjila mu ntsu ya Lidiya. Mubweenemwo, baakanana ni baafukiilisi, baababoolela bilomo bibisamo kamaani. Lwanyuma benyukha baatsya.