Read lumasaaba Buraambi 17 Bible Online

Buraambi 17 - lumasaaba bible

Buraambi 17

¹Paulo ni Silasi ni baaba nga babirire mu Anfipoli ni Apoloniya, boola i Sesalonika, shiriimba shishabamo intsu iye khukhwisaayilamo iye Bayudaaya.

²Paulo wenjila mu ntsu iye khukhwisaayilamo tsana, nga niyaba isaambo yeewe, wakhaandisana ni babaandu khu byaronebwa bikhosefu, khumala bifukhu bya Sabato bitaru nga bilondekhana.

³Aryo waba nga abasontsoola, luundi nga abaŋaŋasa ari Kristo aba ali ni khutaambisibwa, ni khulamukha khukhwaama mu bafu. Luundi waabaloma ari, “Yesu yuno isi imbaboolelakho niye Kristo.”

⁴Balala khu Bayudaaya bakhonjelesebwa betubaasa khu Paulo ni Silasi. Ni Bayonaani nabo swa busa, babaaba besaaya Wele, ni bakhasi bakalikho busa babaamanyikhana nabo babetubaasakho.

⁵Ne Bayudaaya babaandi libuba lyabawaamba, babuusanisaka babaandu babakyeendaana busa be mu shiriimba, betubaasa atweela, benyusa shisaayumba mu shiriimba. Bekhuula, baatsya bebotokhelela intsu ya Yasoni, nga baweentsa Paulo ni Silasi, bari babareere isi lituuli lye babaandu.

⁶Ne ni balekha khubanyoola ta, bakhweeselesa Yasoni ni be buulebe babaandi, babayila isi bawuli be shiriimba, nga balomela angaaki bari, “Basaani bano babareera shisaayumba mu shiibala shoosi, bona, boolele ni nahano,

⁷ni Yasoni wabakaanile muungo mweewe. Boosi balikhukhola bibikhaandisana ni kamakaambila ka Kayisaali nga baloma bari, ‘Aliwo Umuyiinga ukuundi ulaangiwa bari Yesu.’ ”

⁸Bilomo bino ni byawulilikhana, lituuli lye babaandu ni bawuli be shiriimba bakwamo isundakilisi.

⁹Bawuli baloma Yasoni ni baashe bari buli mutweela umweene eyimilile. Baryo babalekhuula baatsya.

¹⁰Antsye ni bwelabula, be buulebe baarumana Paulo ni Silasi khuutsya i Berowa. Nabo nga ni boolayo, benjila mu ntsu iye Bayudaaya iye khukhwisaayilamo.

¹¹Ne Bayudaaya be Berowa baaba balayi khufuura be Sesalonika, lwekhuuba baaba be kimyoyo kimyaangu khufukiilila Ilomo ya Wele, luundi buli shifukhu nga bemenielesa bibyaronebwa bikhosefu, khuubona oba nga Paulo ni Silasi byeesi baloma bya ŋali.

¹²Ni nashiryo, bakali khu nibo baafukiilila, ni bakhasi Bayonaani babaamanyikhana bakalikho busa, ni basaani nabo bafukiilila.

¹³Ne Bayudaaya be mu Sesalonika ni baawulila bari Paulo aaba aboolela Ilomo ya Wele mu Berowa namwo, beetsayo nayo khuukosaasa babaandu ni khukhwinyusa shisaayumba.

¹⁴Khaangukho be buulebe bakaanisa Paulo khu ndulo khwe nyaantsa bari atsye, ne Silasi ni Timosewo baarama i Berowa.

¹⁵Balebe babaarongesakho Paulo, baamwoolisa i Asene. Ne ni baaba nga beelayo, baatsya ni buurume bubwaama isi Paulo nga buloma buri Silasi ni Timosewo bamwitubaasekho khaangu nga ni banyala.

¹⁶Lutweela Paulo nga ali mu Asene, waaliindile Silasi ni Timosewo, kumwoyo kweewe kwaamutsiina, nga waaboone shiriimba shetsuule bifwaani byeesi babaandu baamwo besaayatsaka.

¹⁷Aryo wakhaandisanaatsaka ni Bayudaaya ni Bayonaani babaaba besaaya Wele mu ntsu iye khukhwisaayilamo, atweela ni mwikaantso. Na buli shifukhu wakholatsaka aryo isi babaandu beesi akananatsaka ibweeneyo.

¹⁸Babaandu babaandi be kamakyesi babalaangiwa bari ba Epikuriyo ni babaandi ba Sitoyiki, bamwakaanana baarakikha khukhaandisanatsaka ni naye. Babaandi khu nibo baloma bari, “Uwilomalomayu aloma shiina?” Kila babaandi baloma bari, “Afwaana nga ukanikha khu ba wele banaambo beesi ifwe khukhamanya ta.” Baaloma shino lwekhuuba Paulo aaba akanikha khu Yesu, ni khu khuulamukha khwe baafu.

¹⁹Baryo baamuwaamba baamuyila mu lubuusano lukhulu lwa Areopago, baamuloma bari, “Khunyala khwaamanya khuuleekela khuno khushaakha khweesi uli khuulomakho nga ni khuli?

²⁰Lwekhuuba ulikhuukhureerera indeekela ikhali iya busheele ta mu maru keefwe. Shikila khukana khumanye, bibiindu bino bimanyisa shiina?”

²¹Ne babaandu be mu Asene boosi atweela ni bakyeni beene babaamenyatsakayo, baamalatsaka imbuka yaabwe nga bakanikha, namwe nga bawuliilisa shilomo shishiiba sheetsilewo shishaakha.

²²Lwanyuma Paulo weema akari mu lubuusano lwa Areopago, waaloma ari, “Babaandu be mu Asene, mu buli saambo yoosi, ise mbabona inywe nga muli babaandu babaakana i diini naabi.

²³Lwekhuuba ni mbeele nga injeendakyeenda mu shiriimba sheenywe, imboone bibiindu byeesi mwisaaya. Aliwo isi inyoolele shisheeso shisharonebwakho shiri, ‘Sha wele ukhamanyikhana ta.’ Ni nashiryo, abe sheesi mwisaaya nga akhumanya ta, niye umweeneyo isi ise intsya khubaboolelakho.

²⁴Niye Wele uwabuumba shiibala ni bibilimo byoosi, niye Umukasya we likulu ni shiibala. Luundi niye s'amenya mu mesaayilo kakombakhiwa ni kamakhono ke babaandu ta.

²⁵Naluundi niye s'ekoomba babaandu khumuwa bibiindu, wafwaana nga utaamba shishiindu shoosi ta. Lwekhuuba niye umweene uwa babaandu boosi bulamu, ni kumuuya kweesi baheela, ni khubawa buli shiindu shoosi shishiindi.

²⁶Khurura mu muundu mutweela esi abuumba, Wele abuumba kamanaambo koosi kaketsuule babaandu, nga akana babe khu shiibala shoosi, nga umweene waamalile khukhalawo bisiintsa ni tsintsakha tse khukhwikhala khwawe.

²⁷“Wele akhola shino ari nio bamuweentsatsake, manya osi bamwababekho, luundi bamunyoole, akhaba nga s'ali aleeyi na buli mutweela khusiifwe ta.

²⁸Lwekhuuba khuubirira mu niye khuba balamu, khwakyeenda, luundi khwabawo. Nga mutweela khu baroni beenywe n'aloma ari, ‘Ifwe khuli lisaaye lyeewe.’

²⁹“Nashiryo, ifwe ni khuli lisaaye lya Wele sikhwaakha khwaambaasa khuri Wele ali shishiindu nga izaabu, namwe ifeeza, namwe libaale lilyakhengebwa ni buyungubafu, ni kamakyesi ke babaandu taawe.

³⁰Aso, bisiintsa ibyo bye khaale, bye khuulekha khumanya, Wele s'abilolelesa ta, ne ari alakila babaandu boosi isi bali khukhwibiiyisa bibyoonako byaabwe.

³¹Lwekhuuba waamala khaale khuurawo shifukhu she khuukhalilakho shiibala kumusaango kwe bukwalaafu, nga araambisa umuundu eesi umweene aarobola. Luundi aarawo shishiŋaŋasa isi babaandu boosi nga amulamusa khukhwaama mu bafu.”

³²Ne ni baawulila Paulo nga akanikha khu khulamukha khwe baafu, baalala khu nibo baamutsekhelela busa, ne babaandi baaloma bari, “Khukana khukhuwulila luundi khu lomo yino.”

³³Abweenewo, Paulo wabaruramo, watsya.

³⁴Balala khu basaani babaabawo betubaasa khu Paulo, bafukiilila mu Yesu. Mu nibo mwabamo Diyonisiyo, uwaba mutweela khu be mu Areopago, n'umukhasi lisiina lyeewe bari Damari, atweela ni babaandu babaandi.