Read lumasaaba Buraambi 19 Bible Online

Buraambi 19 - lumasaaba bible

Buraambi 19

¹Ulwo Apolo nga ashiili mu Korinso, Paulo waabirira mu shaalo shiili lwengaaki, woola mu Efeso, ibweeneyo wanyoolayo batweela khu baleekelwa.

²Waabareeba ari, “Mwaweebwa Umwoyo Umukhosefu, nga ni mwafukiilila?” Nabo baamwiilamo bari, “Taawe, ni khuuwulilakho ifwe sikhwawulilatsakakho bari aliwo Umwoyo Umukhosefu ta.”

³Paulo waabareeba ari, “Aso, ne khubatisibwa shiina khweesi inywe mwabatisibwa?” Nabo belamo bari, “Khubatisibwa khwa Yokana.”

⁴Paulo wabeelamo ari, “Yokana aabatisa khuubatisibwa khwe khukhwibiiyisa bibyoonako, nga aboolela babaandu khufukiilila muuyo uwaba alikhukhwiitsa inyuma weewe, niye Yesu.”

⁵Ne ni baawulila shino, baabatisibwa mu lisiina ly'Omukasya Yesu.

⁶Ne Paulo n'abarakho kamakhono keewe, Umwoyo Umukhosefu wabeekhakho, baakanikha tsinimi tsitsiindi, naluundi baakhola buŋoosi mu lisina lya Wele.

⁷Boosi atweela baaba basaani liikhumi na babili.

⁸Paulo wenjila mu ntsu iye khukhwisaayilamo, waakanikhatsaka nga s'arya ta, khuumala kimyeesi kitaru, nga akhaandisana ni babaandu, luundi nga akhakakho khubakhonjelesa lwe Buyiinga bwa Wele.

⁹Ne balala khu nibo, babaaba bamiinyi, balekha khufukiilila ta, nga lubuula bakhomaka Intsila y'Omukasya. Aryo Paulo wabarurakho watsya ni baleekelwa, wakhandisanaatsaka busheele mwileekelo lya Turano.

¹⁰Shino sheloosela khuumala kimiiko kibili, khukhwoolesa boosi mu Asiya ni baawulila Ilomo y'Omukasya: Bayudaaya ni Bayonaani beene.

¹¹Wele waakholela bye kamakaanga bikhabatsakawo ta khuubirira mu Paulo,

¹²ni bitambaala namwe tsingubo khukhwaama khu mubili kweewe, byayilibwatsaka isi balwaale, byabawonesa, ni kimisaambwa kimibi nakyo kyabaruratsakakho.

¹³Ne Bayudaaya babaandi babakyeendatsaka busa nga batimisa kimisaambwa, nabo bakhakakho khuraambisa lisiina ly'Omukasya Yesu, mu khutimisa kimisaambwa kimibi khukhwaama khuubo babaaba ni nakyo, nga baloma bari, “Ikhulakila khurura mu muundu uyu, mu lisiina lya Yesu isi Paulo aboolela.”

¹⁴Aabawo basooleli musaafu b'omuundu esi balaanga bari Sukewa, umusaayi umukhulu Umuyudaaya, nga nabo bakhola baryo.

¹⁵Lutweela shisaambwa shiibi shabaloma shiri, “Yesu namumanya, ni Paulo naye namumanya, ne inywe nibo ba naanu?”

¹⁶Aryo umusaani uwabakho shisaambwa shiibi wabasunakho ni kamaani koosi, wabawula boosi. Wabakhupa naabi khukhwoolesa boosi ni batitukha barura mu ntsu batima, nga bali bukhuna, luundi nga wabawunakile.

¹⁷Shino ni shamanyikhana mu Bayudaaya, ni Bayonaani, babaaba bamenya mu Efeso, khuurya khwabawaamba boosi, ni lisiina ly'Omukasya lyafumisibwa lukali.

¹⁸Bakali khuubo babafukiilila beetsa lubuula, nga babuula bibyoonako byaabwe, luundi nga bamanyisa ibyo byoosi byeesi bakholatsaka.

¹⁹Ni bakali babaakholatsaka bye khulakula, bareera buurone bwaabwe atweela, babyokhela mu lubuula. Ne ni baabalamo bukali bwe tsinusu, banyoola nga abeele byoolesa tsinusu bikana biraano.

²⁰Iryo Ilomo y'Omukasya yeloosela khuubalaaha, luundi yaaba ni kamaani.

²¹Lwanyuma ibyo ni byawa, Paulo waakhalilawo ilala mu mwoyo kweewe khuutsya i Yerusalemu, nga abirira mu Masedoniya ni Akaya nga aloma ari, “Ni ndimala khukhwoolayo, shintsakhila ise khuutsyakho ni Roma nayo.”

²²Aryo warumana babili khu baandu babamuyeetatsakakho i Masedoniya, nga nibo Timosewo, ni Erasto. Ne niye umweene waramakho mu Asiya, khumalakho imbuka ifwiiti.

²³Ne mu bifukhu ibyo, aabawo shisaayumba shikali shisheene mu Efeso khulwe bilomo bibiwaamba khu Ntsila y'Omukasya.

²⁴Lwekhuuba umusaani mutweela lisiina lyeewe Demeturiyo, uwaba umubasi we feeza, uwakholatsaka buuyu bwe feeza, bwe khukhwisaayilamo wele waabwe Aritemi, luundi niye afunatsakila babasi kamafuurisa kamakali naabi.

²⁵Umweene yuno waabuusanisa atweela abo babaakholatsaka kimilimo nikyo mitweela, waabalomela ari, “Basaani bashaase, mwaamanyile nga buyiindifu bweefwe bwaama mu milimo kino.

²⁶Ne ana ari, mubona luundi muwulila nga umusaani Paulo wakhonjelesile luundi washuusile babaandu bakali, akhuba ano mu Efeso mwonyene ta, ne aambi ni mu Asiya mwoosi. Aboola ari ba wele babaakholewa ni kamakhono, sibali ba wele babeene ta.

²⁷Ne sikhuli ifwe fwenyene khukhuuli buubi nga kumulimo kweefwe kutsya khuwawo ta, ne ni buuyu bwe khukhwisaayilamo wele umukhasi Aritemi umukhulu nabwo butsya khubonekha nga mbaamo kumukaso ta. Ni wele umukhasi umweene uwisaayibwa ambi mu Asiya mwoosi, ni shiibala shoosi, bukhulu bweewe kane burusibwewo.”

²⁸Nabo ni bawulila shino, lirima lyabawaamba, bayokesela angaaki bari, “Aritemi, wele uwe ba Efeso mukhulu.”

²⁹Shiriimba shoosi shatabukha. Babaandu boosi bawaamba Gayo, ni Arisitaluko babaama i Masedoniya nga nibo babakyeendatsaka ni Paulo, batima nga babaakhweeselesa, benjila ni nabo mwibusanilo lye kiminyawo.

³⁰Paulo wakana atsye injile mu baandu, ne baleekelwa balekha khumufukiilila ta.

³¹Ni bakhulu babaandi babawula Asiya, babaaba basaale ba Paulo, baamurumanisila buurume nga bamwikontselela, alekhe khukhwiyokesana mwibuusanilo lye kiminyawo ta.

³²Kutuuli kwe babaandu kwoosi kwaba kwatabukhile. Babaandu balala nga bayokesela angaaki lwayo, ni babaandi lwayo. Ni babaandu babafuura bukali baaba sibamanyile lwashiina babusaane ta.

³³Bayudaaya basindikhilisa Alekizanda, khuutsya mwituuli, bamwiimisa iburaangisi, shishambaasisa babaandi shiri niye uwabakho shihangafu. Alekizanda wabawutsila kumukhono nga akana basile, abasontsoole bibiindu nga ni bili.

³⁴Ne nabo ni bamumanya bari ali Umuyudaaya, boosi bayokesela atweela angaaki khumala nga tsisaawa tsibili bari, “Aritemi, wele uwe ba Efeso ali mukhulu.”

³⁵Ne lwanyuma umuroni umukhulu uwe shiriimba n'asilisa lituuli lye babaandu waabaloma ari, “Basaani ba Efeso, muundu shiina ukhamanyile ari, shiriimba sha Efeso nisho shishiliinda lisaayilo lya Aritemi, wele umukhulu, atweela ni shifwaani sheewe shishakwa nga shaama mu ngaaki?

³⁶Aso, lwekhuuba bilomo bino sibikhabisanisibwa ta, inywe shibakhila khusila ni khulekha khukhola shishiindu shoosi nga muyubakilisa ta.

³⁷Lwekhuuba mwareerire babaandu bano ano, ikhaba nga sibanuulile kamesaayilo namwe sibafwotsoole wele weefwe umukhasi ta.

³⁸Ne noola Demeturiyo ni babasi basheewe babaali ni naye, bali ni lomo khu muundu yeesi, kamakayilo kaliwo kamekule, ni bawuli nabo baliwo, ni babawabile mu bweenemwo.

³⁹Ne noola iliwo shishiindu shishindi, kane shikhaliwile mu lubusano lwabusheele.

⁴⁰Lwekhuuba khuli abi naabi, khunyala khwawabilwa lwe shisaayumba shishibelewo shaleelo, ate sikhuli ni lomo inyene yeesi khunyala khuuwa lwe shisaayumba shino ta.”

⁴¹Naye n'amala khuloma aryo, wekalawo lubusano.