Read lumasaaba Buraambi 2 Bible Online

Buraambi 2 - lumasaaba bible

Buraambi 2

¹Shifukhu sha Pentekote ni shoola, abe bafukiilisi mu Kristo boosi baabuusaniile mu shifwo shitweela.

²Lubaluba, baawulila khuuyilila nga khuwuuma khukhwaama mu ngaaki, nga khuli nga imbewo iye kamaani ni wuutsa. Khuwuuma khuno khwetsusa intsu yoosi mweesi baaba bekhaalemwo.

³Lwanyuma abonekhawo shishafwaana nga tsinimi tse kumulilo tsitsawukhanamwo tseekha tsaakwa khu buli mutweela.

⁴Boosi betsusibwa n'Umwoyo Umukhosefu, baryo baarakikha khuukanikha mu nimi tsitsiindi busa, nga Umwoyo n'abawa khuutsiloma.

⁵Mu mbuka iyo aabawo Bayudaaya babaaba bamenya mu Yerusalemu, ni babaandu babaaba babelama naabi abe babaamile mu buli linaambo lyoosi, liliili aasi we likulu.

⁶Ne babaandu abe babamenya mu Yerusalemu bano ni baawulila kamakono kano, boosi babuusana atweela, nga beyaanga, lwekhuuba abe buli mutweela awulila bafukiilisi mu Yesu nga bakanikha mu lulimi lwe waabwe.

⁷Lituuli lye babaandu bano baasamilila busa, luundi nga beyaanga nga baloma bari, “Babaandu babaali khuukanikha bano boosi sibali ba Galilaaya?

⁸Ne ari shiitsa shiryeena ifwe buli mutweela khuuwulila nga bakanikha mu lulimi lweewe lusaalikhana?

⁹Ifwe khwaama i Paruti, babaandi i Mediya ni Elamu, ni babamenya i Mesopotamiya, Yuda ni Kapadokiya, be Pontusi ni Asiya.

¹⁰Babaama i Firigiya, ni Panfiliya, be Misiri, ni be mu bisiintsa bye Libiya bibiwulibwa ni Kurene. Balala bali bakyeni khukhwaama i Roma, ni babaandi Bayudaaya ni naabo bakhali Bayudaaya ta.

¹¹Bayudaaya ni Banaambo babashuukha bekyela Bayudaaya. Baalala khwaama i Kurete ni mu Buwarabu, bona khubawulila nibo nga bakanikha mu nimi tsitseefwe tsinyene bibiwaamba khu bye kamakaanga bya Wele.”

¹²Baryo boosi beyaanga luundi bakaraangarana busa, nga baloma bonyene bari, “Ne makhuuwa shiina kano?”

¹³Ne babaandi babaramile batsakhilila baloondeleli ba Yesu, nga baloma bari, “Iviini ishiili iŋana yabameesile.”

¹⁴Ne Petero wenyukha atweela ni basheewe liikhumi na mutweela, wasuta likono lyeewe angaaki, wakanikha isi babaandu nga aloma ari, “Babaandu be mu Yuda ni nanywe mweesi babamenya mu Yerusalemu, mweesi mwakhiile khumanya shino, nashiryo ni murekeerese bilomo byase.

¹⁵Babaandu bano sibameelile nga inywe ni mwaambaasa ta, lwekhuuba bona ari tsili tsisaawa tsitaru busa tse kumutikhinyi.

¹⁶Khurusakho bino nibyo byeesi Umuŋoosi Yoweli aloma ari,

¹⁷‘Wele aloma ari, mu bifukhu bimaliilisi, inditsukha Umwoyo wase khu baandu boosi, ni babaana beenywe besiinde ni bakhaana balikanikha bye buŋoosi. Babaana beenywe besiinde balibona khubonekhelwa, ni basaani basakhulu beenywe baliroora kamarooro.

¹⁸Ilala mu bifukhu ibyo inditsukha Umwoyo wase khu bakaanisi baase besaani ni bekhasi, nio bakhole bye buŋoosi.

¹⁹Indyokesanisa bye kamakaanga angaaki mwikulu ni khu shiibala aasi nokesanise bye khubonelakho, kamafuki, ni kumulilo, ni khukhwituukha khwe liliisi.

²⁰Nga shifukhu sh'Omukasya shishiili khwoola ta, shifukhu shikhulu naluundi she khukhwiyokesana, inyaanga ilishuusibwa yikyele shishiilima, ni kumweesi kulikyela kumubesemu nga kamafuki.

²¹Naluundi khu shifukhu isho, shiliiba ndi buli muundu yeesi uliloomba mu lisiina ly'Omukasya, aliwonesebwa.’

²²“Baandu ba Isiraeli bashaase, ni muwulile bilomo bino: Yesu uwe Nazareesi, ali umuundu isi Wele asiindikha isi muli, nga abirira mu buraambi bwe kamaani, ni bye kamakaanga, ni bye khubonelakho, byeesi Wele akhola nga abirira mu niye nga mweesi mubona. Nga inywe mwabeene ni mumanyile lwekhuuba byakholebwela akari enywe.

²³Yesu yuno uwawaanibwayo khulondekhana ni bibyamala khuŋoonebwa khaale ni khumanya khwa Wele, inywe mwamutsaangilila khu musalaba naluundi mwamwiira nga muraambisa kamakhono ke babaandu babonaki.

²⁴Ne Wele umweene wamulamusa khukhwaama mu bafu, nga waamalile khumukangulula khukhwaama mu butsiina bwe khuufwa, lwekhuuba abe sishinyalikha khuufwa khumuwaambilila niye nga umubowe ta.

²⁵Lwekhuuba Dawudi naye amulomakho ari, ‘Nabona Umukasya mu moni tsase bifukhu byoosi. Lwekhuuba ali khu mukhono kwase kumulayi, nase singene indengasiwe ta.

²⁶Nashiryo, kumwoyo kwase kwaba ni kumwikhoyo, ni lulimi lwase lwaba ni sangaalo. Ni shishifuurisa, iseese nakhaba nga ndi umuundu busa, bulamu bwase bulimenya mu khwiyikina.

²⁷Lwekhuuba iwe s'ulilekha kumwoyo kwase i makoombe ta, namwe s'ulilekha umukwalaafu woowo khubola ta.

²⁸Iwe wantsokesile tsintsila tsye buulamu, ulintsitsusa ni kumwikhoyo lwekhuuba indiiba mu moni tsoowo.’

²⁹“Bebuulebe ba Isiraeli bashaase, inyala khubaboolela ni khubawandalasa ndi, umukuuka weefwe Dawudi afwa luundi wasiikhiwa, khuli ano ni ŋani yeewe khukhwoolesa khu shifukhu she shaleelo shino.

³⁰Ne lwekhuuba aba umuŋoosi, amanya ari Wele wamwitsubila shishitsubo ari, mutweela khu betsukhulu beewe alikhala khu shitsoloŋo nga umuyiinga.

³¹Dawudi ashibona nga bushiili nio wakanikha khu biwaamba khu khulamukha khwa Kristo khukhwaama mu bafu, nga aloma ari, Kristo s'alekhebwa i makoombe ta, namwe kumubili kweewe sikwabola ta.

³²Yesu yuno Wele amulamusa khukhwaama mu bafu, ni bibiwaamba khu sheene shino, ifwe khuli bajulisi.

³³Nashiryo niye n'aba nga aniinisibwa mu ngaaki khuuba khu mukhono kumulayi kwa Wele, niye wafuna Umwoyo Umukhosefu isi Paapa amulomela, nashiryo byeesi mubona shaleelo bino ni byeesi muwulila bino nibyo biwaanwa byeesi akhutsukhiliile ifwe.

³⁴Lwekhuuba Dawudi niye s'aniina mwikulu ta, ne niye umweene aloma ari, ‘Umukasya aloma Umukasya wase ari, yikhala khu mukhono kwase kumulayi,

³⁵khukhwoolesa lweesi indireera baasiku boowo boosi aasi esi ukhaandakakho bikyele byoowo.’

³⁶“Nashiryo kha babaandu boosi ba Isiraeli bamanye akhali khukhwiririkana ta, bari Wele wakhola Yesu yuno isi mwatsaangilila khu musalaba, khuuba Umukasya luundi Kristo.”

³⁷Ne babaandu ni bawulila bilomo bino, byabatsiina naabi mu myoyo kyaabwe, kila bareeba Petero ni baarume babaramile boosi bari, “Bebuulebe ifwe kane khukhole khuryeena?”

³⁸Petero naye wabeelamo ari, “Ni mwibiiyise bibyoonako byeenywe, luundi buli mutweela khusiinywe abatisibwe mu lisiina lya Yesu Kristo, nio bibyoonako byeenywe kane bibeyakhilwe. Muryo nanywe kane mufune shiwaanwa sh'Omwoyo Umukhosefu.

³⁹Lwekhuuba khusuubisa khuno khuli khukhweenywe n'isi babaana beenywe, n'isi ibo boosi babaali aleeyi, ni naabo boosi beesi Umukasya Wele alaanga khukhwiitsa is'ali.”

⁴⁰Aryo Petero wokesanisa munganikha yeewe nga araambisa bilomo bikali naluundi wabakhupilisa nga aloma ari, “Ni mwiwonese mwabeene khurura mu muboolo kuno kumubi.”

⁴¹Nashiryo ibo boosi babakaanila shilomo sha Petero babatisibwa. Ni khu shifukhu sheenesho, babaandu bikana bitaru (3,000) babelooselakho.

⁴²Baryo beloosela khuwandalalila khu byeesi baarume babaleekela ni mu khutubaanila atweela, ni mukhumenyulila kimikaati atweela, ni mu khuloombela atweela.

⁴³Bibiyaangisa ni bye kamakaanga bikali byakholebwela mu baarume, shino shareerera babaandu bakali khuurya.

⁴⁴Ne ibo boosi babekyela bafukiilisi bamenyatsaka atweela, naluundi bakabananila atweela bibiindu byoosi byeesi baaba ni nabyo.

⁴⁵Naluundi baryo baba nga bakulisaka bibiindu byeesi baaba nabyo, babikabananisa isi boosi, nga buli mutweela abe nga n'akana khuyeetebwa.

⁴⁶Buli shifukhu boosi batsyatsaka mu Lisaayilo Likhulu, ni khumenyulila atweela kimikaati muungo tsaabwe, nga bakabanana biilyo byaabwe ni kumwikhoyo naluundi nga babaandu bali ni kumwoyo kukuwaana.

⁴⁷Baryo baruuyatsaka Wele, naluundi nga babaandu boosi babakana. Umukasya walooselatsakakho bukali bwe babaandu buli shifukhu ibo abe babaali khuwonesebwa.