Read lumasaaba Buraambi 20 Bible Online

Buraambi 20 - lumasaaba bible

Buraambi 20

¹Ulwo shisaayumba ni shawa, Paulo waarumanisa ari baleekelwa beetse is'ali. Ne n'amala khubeesamo kamaani, waabasibula, waatsya i Masedoniya.

²Aryo wakyeenda nga abira mu bisiintsa ibyo naluundi nga waamalile khubeesamo kamaani, lwanyuma waatsya woola i Buyonaani.

³Ibweene iyo waamalayo kimyeesi kitaru. Ne n'aba nga erengekharengekha khuutsya i Siriya, Bayudaaya baamukholela luwomelo. Nashiryo, waakhalawo khuukobolayo nga abirira mu Masedoniya.

⁴Babaandu baabamurongesakho baaba nibo Sopateli umwaana wa Pilo, uwama i Berowa, ni Arisitaluko, ni Sekundo khukhwaama i Sesalonika, ni Gayo khukhwaama i Derube, ni Timosewo naye, ni Tikiko, ni Tuulofimu khukhwaama mu Asiya.

⁵Babaandu bano baraangila bakhuliindila ifwe i Turowa.

⁶Lwanyuma lwe shifukhu she kimikaati kikikhasiila ta, ifwe khwarura i Filipi nga khwambukhila mu meeri. Ne nga abirirewo bifukhu biraano, khwetubaasa khu baandi i Turowa, esi khwamenya khumala bifukhu musaafu.

⁷Khu shifukhu shishinyoowa mu Sabiiti, ifwe khwabuusana atweela khufuniakila atweela kumukaati. Paulo wakanikha isi babaandu ni shitsilililwa shaba shiri niye akana khukobolayo khu shifukhu shishilakho. Aryo wakanikhila imbuka indeeyi khukhwoolisa mu shilo khukari.

⁸Mu shiseenge she khu ngaaki esi khwabuusanila mwabamo tsitaala ngali.

⁹Umusooleli mutweela nga bamulaanga bari Yutiko, aba wekhaale mwitilisa. Ne Paulo n'aba nga ashikanikha imbuka indeeyi, umusoleeli yuno liilo lyamuwaamba, wakonela ilala, khukhwoolisa n'awanukha khukhwaama khu ntsu ikhola inungo iye khataru wakwa aasi. Baryo bamwangalayo nga wafwiile.

¹⁰Paulo weekha aasi, wenama khu musooleli yuno, wamuwaamba ni kamakhono keewe, lwanyuma waaloma ari, “Mukheyembelela ta, lwekhuuba ashiilimo bulamu.”

¹¹Aryo Paulo welayo khu ngaaki mu ntsu, wamenyulamo kumukaati, walyakho. Nga waamalile weloosela khukanikha ni nabo imbuka indeeyi, khukhwoolisa antsye ni bwasha, watsya na khuutsya.

¹²Babaandu bayila umusoleeli uyo ingo nga mulamu, nga bali ni kumwikhoyo kumukali naabi.

¹³Khuryo khwelooselayo, khwatsya mu meeri, khwambukha khwatsya i Asosi, nga khukana khuri khutsye ibweene iyo ni Paulo. Lwekhuuba abe umweene wamala khaale khukhulomela aryo nga ambaasa ari niye kane atsiile bikyele.

¹⁴Ne ni khwakanana ni naye mu Asosi, wenjila mu meeri, khwatsya i Mitilene.

¹⁵Khuryo ni khwaama awo ni meeri, shifukhu shisheelakho khwoola i Kiyosi. Ni shifukhu shisheelakho khwoola i Samosi. Ne ni bwasha khu shifukhu shishiindi, khwoola i Mileto.

¹⁶Shaba shiryo lwekhuuba Paulo aakhalawo khuubira bubiri mu Efeso, ari nio alekhe khukhwoonakisila imbuka mu Asiya ta. Aba alikho atsya khaangu i Yerusalemu, nga akana oleyo, nga shinyalikhana, nga shifukhu sha Pentekote shishiili khwoola ta.

¹⁷Paulo n'aba nga ali i Mileto, warumanisa ari bamulaangile baraangilisi be bafukiilisi be mu Efeso.

¹⁸Baryo ni beetsa isi Paulo, waabaloma ari: “Inywe mwabeene mwaamanya bulayi bulamu bwase nga ni bubeele. Nga ni mbeelatsakile ni nanywe bifukhu byoosi khukhwaama khu shifukhu shishanyoowa sheesi nasambilakho shikyele shase mu Asiya.

¹⁹Ise naakaanisa Umukasya ni buwolu bwoosi naluundi nga indila ni kamasika khulwe khukhakiilisibwa khukali khweesi nabiramo lwe tsimbomelo tse Bayudaaya.

²⁰Inywe mwamanya nga ni nekhalilikha nababoolela lubuula buli shiindu shishaba she lisuno, naluundi nga imbaleekela lubuula khukhwaama khu ntsu ndweela khuutsya khu ntsu ikiindi.

²¹Ise namanyisa Bayudaaya ni Bayonaani ndi bali ni khukhwibiiyisa bibyoonako byaabwe isi Wele ni khufukiilila mu Mukasya weefwe Yesu Kristo.

²²“Ne lola ari ntsya i Yerusalemu, nga Umwoyo asiindikhilisa khuutsya, ne simanya shishiilikholikha khu bulamu bwase nga noolileyo ta.

²³Khuurusakho Umwoyo Umukhosefu waamanyisile ise ari, mu buli shiriimba bubowe ni khuutaambisibwa byaaniindiliile.

²⁴Ne buulamu bwase simbwaambaasakho khuuba shishiindu shikhulu namwe she lisuno isi ise ndi ta, khurusakho ndi singa shinyalikha imalilise lukyeendo lwase ni bubwakaanisi bwase byeesi nafuna khukhwaama isi Umukasya Yesu nga nikhwo khumanyisa Kamakhuuwa Kamalayi ke bubweela bwa Wele.

²⁵“Ne bona ari inywe mweesi beesi nakyeendatsakamo nga imboolela Buyiinga bwa Wele, simulimbonakho ise luundi ta.

²⁶Nashiryo imbamanyisa mweesi shaleelo ndi ise s'indi ni kumusaango kwoosi khu mafuki keenywe ta.

²⁷Lwekhuuba nababoolela inywe mweesi lubuula shitsilililwa sha Wele shoosi.

²⁸Ni mwiliindatsake inywe mwabeene atweela ni lituuli lyoosi lye bafukiilisi, lyeesi Umwoyo Umukhosefu umweene abawaambisa inywe nga babaayi, khuuba babaayi be babaandu ba Wele beesi umweene ekulila nga abirira mu mafuki k'Omwaana weewe umweene.

²⁹Ise namanyile ndi nga narulilewo naatsiile, bitsuutse birafu bilinjila mu lituuli lyeenywe; sibililekha khutuumbusa lituuli lyeenywe ta.

³⁰Ni khukhwaama mu lituuli lyeenywe lilyeene, mulyamamo babaandu nga baloma bilomo bibikoraanisa babaandi, bari nio bakhonjelese bafukiilisi beekele baleekelwa baabwe.

³¹Nashiryo ni mube meeso, nga mushebulila muri namala kimiiko kitaru, mu shilo ni kumuusi, nga imbareewula inywe, ni kamasika kamakali.

³²“Ne ari imbawaanayo mu mikhono kya Wele n'isi shilomo she bubweela bweewe, shishinyala khubombekha inywe ni khubawa kumukabo kwe busikha atweela ni naabo babaali bakhosefu beesi arobora.

³³Ise sinayikoombatsakakho ifeeza y'omuundu, namwe izaabu y'omuundu yeesi ta, namwe shikwaaro sh'omuundu yeesi ta.

³⁴Inywe mwamanya nga kamakhono kaase kano kameene niko kakakholatsakila ise byoosi byeesi nakanatsaka, atweela ni naabo beesi naba ni nabo.

³⁵Mu biindu byoosi byeesi nakhola, ise nabokesanisa ndi khulwe khukhalaabana khukali nga khuno, mwakhiile khuyeeta babaandu babaali batoro, ni khushebulilatsaka bilomo by'Omukasya Yesu umweene, byeesi aloma ari, ‘Khuuwaana khuli khwe khabi ngali khufuura khuweebwa.’ ”

³⁶Aryo Paulo n'amala khuuloma bilomo bino byoosi, wafukhamila aasi, waloombela atweela ni nabo boosi.

³⁷Boosi kumutaambo kwabawaamba, balila kamasika lukali, nga bakwa Paulo mu shifuba.

³⁸Ne shishabawaambisa kumutaambo khuminyisila ilala, yaba lwe lomo yeesi Paulo aloma ari sibalimubonakho luundi ta. Baryo bamuronjisa bamwoolisa khu meeri.