Read lumasaaba Buraambi 22 Bible Online

Buraambi 22 - lumasaaba bible

Buraambi 22

¹“Bebuulebe Bayudaaya bashaase ni ba paapa, ni muwulile tsilomo tsase, nga samweene ntsya khukhwiwotsakho isi muli.”

²Ne ni bawulila nga akanikha isi bali mu lulimi Luheburaniya, beloosela khusila. Paulo weloosela nga aloma ari,

³“Ise ndi Umuyudaaya uwasaalikha i Taruso, shisiintsa she Kilikiya. Ne natsowesebwela mu shiriimba shino nga umuleekeli Gamalieli niye umuleekeli wase, khukhwiyika kamakaambila ke bakuuka beefwe, nga intsiinikhanila naabi bya Wele, nga nanywe ni muli ana ari.

⁴Nakubyeengatsaka naabi babaandu be Intsila yino, naboolesa ni khubeera, nga imaamba basaani ni bakhasi boosi khubayila mu mapuusu.

⁵Umusaayi ufuura bukhulu ni basakhulu boosi banyala baawa bujulisi lwe shilomo isho. Nafuna tsibaluwa khukhwaama isi bali, tsitsinganikhakho khus'ise isi be buulebe be Damasiko, khuutsya khuwaamba babaandu b'eyo, imbareere i Yerusalemu nga babowe khufuna shitaambiso.”

⁶“Ne ni naba nga ntsya, nga ndi aambi ni shiriimba Damasiko, saawa tsye mwihangilwe, khaangu akho khumulikha khukali khwaama mwikulu, khwaamulikhila tsimbeka tsoosi.

⁷Ise nakwa aasi, naawulila likono nga lindeeba liri, ‘Saulo, Saulo, lwashiina kila iwe ungubyeenga ise?’

⁸Nase nilamo ndi, ‘Umukasya, Iwe naanu?’ Naye waanoma ari, ‘Ise Yesu we Nazareesi, isi iwe ukubyeenga.’

⁹Abo babaaba ni nase baabona khuumulikha, ne sibawulila likono ly'oyo uwakanikha ni nase ta.

¹⁰Ise namureeba ndi, ‘Umukasya, kane ise ikhole ndyeena?’ Umukasya waantsilamo ari, ‘Yinyukha utsye i Damasiko. Ibweeneyo, kane bakhuboolele she khuukhola.’

¹¹Ne ise ni khanyala khuubona lwe khuumulikha khuukali khwe buwaanga ta, abo babaaba ni nase bamaamba kumukhono, bananjilila khukhwoola i Damasiko.

¹²“Aabawo umusaani lisiina lyeewe bari Ananiya mu shiriimba isho, uwaba esaaya naabi Wele, nga kamakaambila ni kaloma, naluundi nga Bayudaaya b'eyo boosi bamwisamo naabi lukoosi.

¹³Umweeneyo weetsa wimikha ise isiindi wanoma ari, ‘Uwe buulebe Saulo, n'ubone luundi.’ Ni nase mu mbuka nyeneyo nabimbula tsimoni, namubona.

¹⁴Lwanyuma waaloma ari, ‘Wele we bakuuka beefwe, waakhuroboole iwe umanye ibyo byeesi akana, ubone Umukhosefu weewe, luundi uwulile likono lilyaama mukhanwa mweewe.

¹⁵Lwekhuuba uliiba umujulisi weewe isi babaandu boosi mwibyo byeesi uboone naluundi byeesi uwuliile.

¹⁶Aso, ari waliindile shiina? Yinyukha ubatisibwe, usingibwekho bibyoonako byoowo, nga uloomba mu lisiina lya Wele.’

¹⁷“Lulwoola ni naba nga nakobooleyo i Yerusalemu, nga ndi mu Lisaayilo Likhulu inoomba, nafwaana nga uroora.

¹⁸Nabona Umukasya nga anoma ari, ‘Yuubakho khaangu urure mu Yerusalemu, lwekhuuba singene bafukiilise bujulisi bweesi ubawa khusiise ta.’

¹⁹Nase nilamo ndi, ‘Umukasya, babaandu bano bamanya nga ni natsyatsaka mu ntsu tsye khukhwisaayilamo, nembowa luundi ne khupa ibo babafukiilila mwiiwe.

²⁰Naluundi ni kamafuki k'omujulisi woowo Sitefano ni katsukhiwa, nase samweene nabawo, nga iŋaŋasa khukhwiribwa khweewe, luundi nga iniinda bikwaaro byaabo babamwiira.’

²¹“Luundi Umukasya wanoma ari, ‘N'utsye, lwekhuuba ndikhurumana aleeyi mu Banaambo.’ ”

²²Lituuli lye babaandu lyarekeeresa Paulo khukhwoolesa khu shilomo shino, lwanyuma benyusa kamakono kaawe angaaki nga baloma bari, “Murusewo, lwekhuuba umuundu ufwaana aryo sishimwakhila khuuba mulamu khu shiibala ta.”

²³Ne ni baaba nga bashiyokesela angaaki, nga bawuutsa tsingubo tsaabwe, luundi nga bahanyaka lifukhuulu mu ngaaki,

²⁴umukhulu we liye umu Roma walakila ari Paulo bamuyile mu lumako, bamukhupe nga bamureebelesa, nio bamanye lwashiina babaandu baaba bayokesa naabi baryo.

²⁵Ne ni baamala khumubowa tsikhoba nio bamukhupe, Paulo waloma umukhulu we liye uwaba wamwimilewo ambi ari, “Shifukiilisibwa mu makaambila khukhupa umuundu umu Roma nga bashiili khumukhalila kumusaango ta?”

²⁶Ne umukhulu uyo n'awulila aryo, watsya isi umukhulu umweene uwe liye, wamuloma ari, “Ari, unakhola uryeena? Lwekhuuba umusaani yuno ali umu Roma.”

²⁷Umukhulu we liye wesyeenda aambi isi Paulo waamureeba ari, “Imboolele khubone, iwe uli umu Roma?” Paulo naye welamo ari, “E e!”

²⁸Kila umukhulu we liye aloma ari, “Ise nasasula tsinusu tsingali busa khukhwikyela umu Roma.” Paulo waamwiilamo ari, “Ne ise ndi umusaalikhana umu Roma umweene.”

²⁹Baryo ibo babaabawo nga bakana khumureebelesa, barurawo khaangu akho. N'umukhulu we liye umweene, naye warya naabi, nga n'amanya ari Paulo umu Roma, ate nga wamubowele.

³⁰Ne ni bwasha khu shifukhu shishelakho, nga umukhulu we liye akana ekure buulayi ilomo yeesi Bayudaaya bawabila Paulo, wamukangulula, ne walakila basaayi bakhulu ni lukhobo lwoosi khubuusana, wareera Paulo wamwiimisa mu moni tsaabwe.