Read lumasaaba Buraambi 24 Bible Online

Buraambi 24 - lumasaaba bible

Buraambi 24

¹Lwanyuma lwe bifukhu biraano, umusaayi ufuura bukhulu Ananiya weekha i Kayisaliya, ni babaandi khu bakhulu n'umuundu ukuundi umunamakaambila umukanikhi naabi ulaangiwa Terutuulo. Baboolela gafana Felikisi bilomo bye khuwabila Paulo.

²Ne Paulo n'alaangibwa, Terutuulo waarakikha khuumuwaabila nga aloma ari: “Uwe lukoosi Felikisi, khulwoowo khwayikhala mu lukoosi, nilwe buraambi bwoowo bulayi, bibiindu bikali byaŋonewele mu linaambo lino.

³Bino byoosi khubifukiilila musaambo yoosi, ni mu bifwo byoosi nga khukhusiima naabi, uwe lukoosi Felikisi.

⁴Ne khulekha khukhwonakisila iwe imbuka yoowo ta, ikhuloomba lwe shiisa shoowo ukhureekelesekho khafwiiti.

⁵“Umusaani yuno khwamunyoolile nga umusaani umubi naabi, enyusa bisaayumba mu Bayudaaya boosi, babaali mu shiibala shoosi. Niye umuraangilisi we khatuuli khe Banazareesi.

⁶Naluundi akhakilekho khuukhola bye imbikho mu Lisaayilo lyeefwe Likhulu, nafwe khuryo khwamuwaamba, (khwakana khumukhalile kumusaango nga kamakaambila keefwe ni kaloma.

⁷Ne Lusiya umukhulu we liye, weetsa wamukhurusakho mu makhono keefwe ni kamaani,

⁸aryo walakila ari babamuwabila beetse is'uli). Ne iwe wamweene nga wamureebelesile, kane umanye khukhwaama is'ali ibyo byoosi byeesi khumuwabila.”

⁹Ni Bayudaaya boosi betubaasa khu Terutuulo nga baloma bari ibyo byoosi byeesi aloma byaba bya ŋali.

¹⁰Ne lwanyuma nga gafana wameseele Paulo ari naye akanikhe, Paulo waaloma ari: “Musakhulu, lwekhuuba naamanyile ndi ubeele umukayi we linaambo lino khuumala kimiiko mikali, nase nekhoyele khukhwiwotsakho is'uli.

¹¹Nawe wamweene nga n'ukane ushimanye, bifukhu sibifuura mwikhumi na bibili ta, khukhwaama nga ni naniina i Yerusalemu khukhwisaaya.

¹²Ne babaandu babambaabila sibanyoolakho nga ndi khukhaandisana n'umuundu yeesi mu Lisaayilo Likhulu ta, namwe nga ninyusa shisaayumba mu ntsu tsye khukhwisaayilamo namwe mu shiriimba ta.

¹³Namwe sibanyala khukhuntsuntsumilisa lwe bilomo byeesi bambaabiile ise is'uli ana ari ta.

¹⁴Ne shino ishibuula ndi ise nisaaya Wele we bakuuka beefwe, nga inondelela Intsila nibo yeesi balaanga bari iye bubeeyi. Naluundi ifukiilila byoosi bibyaronebwa mu makaambila ka Musa ni mu baŋoosi.

¹⁵Ndi ni khukhwiyikina mu Wele nga bano nabo babeene ni beyikina; indi ilibawo khulamukha khwe bakhosefu ni naabo babaakhali bakhosefu ta.

¹⁶Shikila mu bino byoosi, ikhakakho naabi khuuba ni kumwoyo kukhali ni kumusaango isi Wele n'isi babaandu ta.

¹⁷“Lwanyuma lwe kimiiko mikalikho ni kyabirawo, ise natsya i Yerusalemu khuyilila babaandu be linaambo lyase babaali bataambi biwaanwa ni bibiwaanibwayo.

¹⁸Ni naba nga ikhola shino, banyoola mu Lisaayilo Likhulu nga namalile khukhola bye khukhwipyeluusa, nga mbaawo lituuli lye babaandu namwe khutabukha khwoosi ta.

¹⁹Ne Bayudaaya babaandi khukhwaama mu Asiya, abe nibo babaakhiile babeene khuuba ano khureera khuwaba khwawe, noola bali ni lomo yoosi khusiise.

²⁰Namwe bano babeene babaali ano baakha baboola likaambila lyeesi ise nafuniaaka, nga ni baambonamo ise ni nemikha mu moni tse lukhobo lukhulu.

²¹Akhali shishiindu shitweela sheesi nalomela mu likono lye angaaki, nga nemile akari mu nibo ndi, ‘Ise ndi khukhalilwa kumusaango ni nanywe lwekhuuba ifukiilila ndi baafu balilamusibwa.’ ”

²²Lwanyuma Felikisi uwaba wamanya bulayi bye Ntsila, wikalawo lubusano, nga aloma ari, “Nga Lusiya umukhulu we liye wetsile, kane ise ikhalewo bye kumusaango kwoowo.”

²³Aryo walakila umusilikhale khuliindila ilala Paulo, ne nga amufukiilila khubakho ni lukoosi, ni khufukiilila basaale beewe khumwakaanisayo byakana.

²⁴Lwanyuma lwe bifukhu bibyoolakho, Felikisi weetsa n'umukhasi weewe Durusiila, uwaba Umuyudaaya. Warumanisa ari balaange Paulo, wamuwuliilisa byaloma khu bilomo bye khufukiilila mu Kristo Yesu.

²⁵Ne Paulo n'aba nga akanikha khubye bukwalaafu, khukhwiliinda bulayi, ni khubye shifukhu khweesi Wele alikhalilakho kumusaango, Felikisi warya naabi, nga aloma ari, “Ibyo bimala, ari unyala watsya. Nindiba nga nakhukanile, indikhurumanisa.”

²⁶Ne lwekhuuba mu mbuka nyeneyo aba weyikinile ari Paulo kane amuweyo tsinusu khumukulilila, weloosela khumurumanisatsaka, ni khukanikhakho ni naye.

²⁷Ne ni abirawo kimiiko kibili, Porukiyo Fesito weela mu bukhulu bwa Felikisi nga gafana. Ne Felikisi lwe khuukana Bayudaaya bamusiime, walekha Paulo nga ashiili mu mapuusu.