Read lumasaaba Buraambi 25 Bible Online

Buraambi 25 - lumasaaba bible

Buraambi 25

¹Lwanyuma lwe bifukhu bitaru, nga Fesito wekyelile niye gafana, waama i Kayisaliya, waaniina i Yerusalemu.

²Basaayi bakhulu ni baraangilisi be mu Buyudaaya, beetsa isi Fesito, baamuboolela bilomo bibiwaamba khu Paulo.

³Baryo bekontselela Fesito, nga bamuloomba lwe bulayi bwaabwe bari, arumanise bareere Paulo i Yerusalemu, ne nga sheesi batsiililila bari bamwibuulile khu ntsila bamwiire.

⁴Ne Fesito welamo ari, “Paulo aliindibwila i Kayisaliya nga ali umubowe, ni nase samweene ndi aambi khuutsyayo.

⁵Nashiryo, batweela khu baraangilisi beenywe ni beetse batsye ni nase. Ne niliiba nga iliwo ilomo yoosi imbi khu musaani yuno, mumuwabile.”

⁶Aryo n'amala khumenya ni nabo bifukhu bibyoola nga shinaane namwe liikhumi, weekha i Kayisaliya, ni shifukhu shishelakho wekhala khu shitsoloŋo she khukhalilakho kimisaango, walakila ari, bareere Paulo.

⁷Ne Paulo n'amala khukhwoola, Bayudaaya babaama i Yerusalemu beema bamubotokhelela, nga bamutsuntsumilisa bibiindu bikali, byeesi bakhanyala ni khuwandalasa babeene ta.

⁸Ne Paulo wewotsakho nga aloma ari, “Ise shina kholaatsakakho she bubwoonaki isi kamakaambila ke Bayudaaya, namwe isi Lisaayilo Likhulu, namwe isi Kayisaali ta.”

⁹Ne lwekhuuba Fesito akana khusangaasa Bayudaaya, wareeba Paulo ari, “Ukana utsye i Yerusalemu, ibweeneyo ukhaliwileyo kumusaango lwe bilomo bino mu moni tsase?”

¹⁰Paulo welamo ari, “Ise nemile ano mu moni tse shitsoloŋo sha Kayisaali, sheesi bakhalilakho kimisaango, esi nakhila khuwotsesewela. Ise sina birisakho buubi Bayudaaya, nga wamweene n'umanyiile ilala bulayi.

¹¹Aso, ne abeele nga ise naakholakho buubi bwoosi bubukila ifwe, ise sindoba khuufwa ta. Ne nga abeele bilomo byeesi Bayudaaya bareera khukhuntsuntsumilisa nga sibili byelala ta, mbaawo umuundu yeesi uli ni bunyala khukhumbaanayo mu makhono kaawe ta. Ise injulila isi Kayisaali.”

¹²Aryo Fesito n'amala khuufukiilisana nibe mu lukhobo, walaangilila ari, “Wajulile isi Kayisaali, uryo isi Kayisaali niyo isi ulitsya.”

¹³Lwanyuma lwe bifukhu bikyeekhe, umuyiinga Aguripa n'umukyelema weewe Berenike, boola i Kayisaliya khuusheesakho Fesito.

¹⁴Ne ni baamenyayo bifukhu bikalikho, Fesito waakanikhakho n'umuyiinga Aguripa khu bilomo bya Paulo, nga aloma ari: “Aliwo umuundu ano isi Felikisi aalekha nga umubowe.

¹⁵Ne ni naba nga neetsilekho i Yerusalemu, basaayi bakhulu ni basakhulu be Bayudaaya, baareera bilomo byeewe isi ndi, nga bakana bari akhalilwe kumusaango.

¹⁶Nase nabeelamo ndi siili isaambo ye Baroma khuuwayo umuundu khuuwabilwa kumusaango nga umweene ashiili khubonana ni babaamuwabiile khu moni ta, n'umweene khukhwiwotsakho lwe bilomo byeesi bamuwaabila ta.

¹⁷Baryo ni baabuusana ano, nase shinekhala ta, ne khu shifukhu shisheelakho, nekhala khu shitsoloŋo she khuukhalilakho kimisaango, naalakila ndi bareere umusaani uyo.

¹⁸Ne babaamuwaabila ni beema angaaki, baalekha khureera tsilomo tsinyene tsitsimutsuuntsumilisa nga nase ni nambaasa ta.

¹⁹Khuurusakho ndi bamutsuuntsumilisa bibiwaamba khu diini yaabwe, ni bibiwaamba khu musaani uwafwa Yesu, isi Paulo alomakho ari ali mulamu.

²⁰Nase ndyo ni nakhaasikha isaambo ye khuwentselesamo bibiindu bino, shikila nareeba Paulo nga beele akana khuutsya i Yerusalemu khuukhalibwilayo kumusaango lwa bino.

²¹Ne Paulo n'akana khuuliindiwila mu mapuusu khukhwoolisa Kayisaali n'alikukhala, nase nalakila ndi bamuliinde khukhwoolisa lweesi indimwakaanisayo isi Kayisaali.”

²²Kila Aguripa aloma Fesito ari, “Nandikanile khuuwulila khu musaani uyu samweene.” Fesito waamwiilamo ari: “Kumukaamba ukhaamuwulile.”

²³Ni bwasha, Aguripa ni Berenike beetsila mu shiriifwa shikali, benjila muntsu iye lukhobo nga bali ni bakhulu be basilikhale, ni babaandu babaandi be mu shiriimba. Fesito walakila ari bareere Paulo.

²⁴Fesito waaloma ari, “Umuyiinga Aguripa, ni nanywe mweesi mumuuli ano ni nafwe, mwaboone umusaani yuno? Bayudaaya boosi be mu Yerusalemu ni nahano mu Kayisaliya bantsikontselela nga balomela angaaki bari, sishimwakhila niye khuuba mulamu ta.

²⁵Nase ni nashifumbula nga mbaawo shishiindu shoosi shakholele shishimwakhila khumwiirisa ta, ni lwekhuuba naye umweene aba wajuliile isi Kayisaali nase nakhalawo khumwakaanisa i Roma.

²⁶Ne ise siindi ni lomo inyene iyelala khu niye isi inyala khuronela umukoosi wase ta. Shino nisho shikilile imureerire isi muli, ni khufuura isi iwe umuyiinga Aguripa. Manya khumureebelese khubone, nio imbe ni lomo iye khumuronakho.

²⁷Lwekhuuba imbona nga she busilu khukhwakaanisa umubowe nga mbaawo khukhwokesana bibyeene byelala bibimufunaanibwa ta.”