Read lumasaaba Buraambi 27 Bible Online

Buraambi 27 - lumasaaba bible

Buraambi 27

¹Ni shamala khuukhaliwawo shiri khwaba khuli ni khuselengela khuutsya mu Itali, Paulo ni babowe babaandi bawaanibwayo isi umusilikhale umukhulu, lisiina lyeewe Yuliyo, uwe mwituuli lya buraawa lya Kayisaali.

²Khwaniina mu meeri iye Adiramatiyo, iyaba ikana khutsya mu bifwo bye luwaande lwe Asiya, khwawaamba intsila nga khuli atweela ni Arisitaluko, umu Masedoniya uwe Sesalonika.

³Khu shifukhu shishelakho, khwoola i Sidoni. Yuliyo wawaambila Paulo shiisa, wafukiilila Paulo khuutsya mu basaale beewe bamuwekho buyeeti.

⁴Khweloosela khukhwaama iyo, ne lwekhuuba imbewo yaba iwuutsa khukhwaama iburaangisi, khwaselengela khwabirira khu ndulo khwa Kupuro.

⁵Ne ni khwakhalisa inyaantsa ili aambi ni Kilikiya, ni Panfiliya, khwoola i Miira shiriimba she Lukiya.

⁶Ibweeneyo umukhulu we liye wanyoolayo imeeri iye Alekizandereya, nga itsya i Itali, aryo wakhuniinisamo.

⁷Khuryo khwatsya mbola nga khubira mu bukosi bukali khumala bifukhu bikali, lwanyuma khwoola aambi ni Kunido. Ne imbewo ni yakhushingilila, khwabirira khu ndulo khwa Kurete, shanjelekha sha Salumone.

⁸Khwabirira khu ndulo khuryo ni bukosi bukali, khwoola mu shifwo shilaangibwa bari mu Mafubukho Kamalayi, aambi ni shiriimba sha Laseya.

⁹Imbuka yaba yabirirewo ingali, ni lukyeendo ari lwaba lwiloosela khuuba luwaangafu, lwekhuuba bifukhu bye khubuya ntsala byaba byabirire. Shikila Paulo abareewula ari,

¹⁰“Basaani, imbona nga lukyeendo luno lutsya khubamo bukosi ni khufwilwa khukali khwe bibiindu bisutwa, ni meeri, naluundi ni bulamu bweefwe bubweene.”

¹¹Ne umusilikhale umukhulu walekha khuwulilisa byeesi Paulo aloma ta, wawulilisa by'omweene we meeri, ni nooyo uwaba alitimisa.

¹²Ne lwekhuuba mwifubukho umwo simwaba mukhulayi khukhwikhalamo mu myeesi kyoosi kye bunyifu ta, bakali khu nibo kila bafukiilisana khururayo manya lukana boole i Foyinikisi, bamalileyo kimyeesi kyoosi kye bunyifu. Muno nimwo mwifubukho lye Kurete, lilolelaniile ni akari emwaalo ni akari engaaki.

¹³Imbewo iyaama imwaalo ni yawuutsa mbola, nibo bambaasa bari banyoolile sheesi baaba bakana, barekula shishitikiya i meeri, bakisyendesa aambi ni khu ndulo khwe Kurete.

¹⁴Ne mu mbuka njeekhe busa, imbewo ingali iwuutsa nga ilola kwe ngaaki, yeetsa yawuutsa ni kamaani khukhwaama khu shikyelemeesi.

¹⁵Ne imeeri yawaambibwa ni mbewo, ni khuungu yino yalekha khunyala khukhwiloosela mu moni ta, khukhwoolisa ni khwakilekhela, khwayilibwa busa khuryo ni mbewo.

¹⁶Lwanyuma nga khwekhilile imwaalo we khakyelemeesi kheesi balaanga bari Kauda nga khubira mu bukosi bukali, khwarekana naabi khwanyala khutikiya likhoŋolo lilyaba lyabowebwele khu meeri.

¹⁷Ne basaani ni baamala khuliniinisa ibulafu, babirisa kimikosi balibowela aasi e meeri, nga barya bari, manya banyala baselengela khu muyekhe, khu lwoomu lwa Suriti. Baryo balekhuula bibibowa aasi, balekha imeeri khuutsya isi imbewo yakiyila.

¹⁸Ikhuungu yeloosela naabi, khwarekana khuryo ni nayo, ne ni bwasha shifukhu shishelakho, barusaka bibiindu bilala khu meeri, nga babitumaka mu meetsi.

¹⁹Luundi ndi khu shifukhu shishelakho, batuumaka mu meetsi bibyuuma bye meeri.

²⁰Ne khwamala bifukhu bikalikho nga sikhubonakho inyaanga namwe tsinieniesi ta, ate nga ikhuungu yiloosela bwilooseli busa khuwutsa ni kamaani. Khuryo ibumaliliso khwawamo kumwiyikino kwe khuuba balamu.

²¹Ne babaandu bano ni baamala imbuka indeeyi nga sibali ni biilyo ta, Paulo wemikha akari mu nibo waabaloma ari, “Basaani bashaase, inywe muba nga mumwambuulilisa iseese, muramayo i Kurete, khali khwawonele bukosi buno ni khufwilwa khuno khwoosi.

²²Ne ni naari, imbaboolela ndi, ni mwikumise kimyoyo kyeenywe, lwekhuuba mbaawo umuundu na mutweela khwiinywe ukana afwiilwe buulamu bweewe ta, khurusakho imeeri yonyene niyo inonekha.

²³Lwekhuuba mu shilo shishibirire, malayika uwa Wele, uwundikho ise bunyala luundi isi nisaaya, emile isiindi,

²⁴nga anomela ari, ‘Paulo ukharya ta, wakha khukhwimikha mu moni tsa Kayisaali, ne bona, Wele mu bulayi bweewe, atsya khuwonesa ibo boosi babaali khuutsya ni nawe.’

²⁵Nashiryo basaani bashaase, ni mwikumise kimyoyo kyeenywe, lwekhuuba ifukiilila mu Wele ndi, kane ashikhole aryo nga umweene n'amalile khukhumboolela ise.

²⁶Ne khwakha khuyiliwa khukhwoola khu shitweela khu bikyelemeesi.”

²⁷Ne shiilo shishakhola she liikhumi na bine ni shoola, nga khuyilibwa eyi ni neeyi ni mbewo khu nyaantsa ya Adiriya, mu shilo khukari, babaakhola khu meeri bambaasa bari, bakana khukhwoola aambi ni khu lwoomu.

²⁸Shino shakila bekhisa kumukosi mu meetsi banyoola nga koolesa buleeyi aasi tsifuuti shitoondo shitweela ni kamakhumi kabili (120). Lwanyuma batsyakho khakyeekhe iburaangisi bekhisa luundi kumukosi, banyoola nga buleeyi aasi tsili tsifuuti kamakhumi syeenda.

²⁹Ne baarya bari manya isi babiriire waliwo lulwaanda aasi, kila batuuma kimitsangi kine mu meetsi, baloomba bari khali antsye busheele.

³⁰Ne lwekhuuba ibo babaakhola khu meeri baaba bakhakakho khukhwilukhakho, baryo bekhisa khakhoŋolo khakyeekhe mu meetsi bafwaana nga babaatsya khutuuma kimitsangi mu meetsi iburaangisi we meeri.

³¹Kila Paulo aloma umukhulu we basilikhale ni basilikhale boosi ari, “Babaandu bano boosi nga bakhurama khu meeri ta, imbaawo utsya khuwona ta.”

³²Kila basilikhale bakhala kimikosi kye khakhoŋolo khakyeekhe bakhalekha khaatsya khonyene.

³³Ne antsye ni bwaba nga bukana khuusha, Paulo wabekontselela boosi balyekho biilyo, nga abaloma ari, “Shaleelo nisho shifukhu she liikhumi na bine nga muliindilila busa nga simulyakho biilyo byoosi mu mbuka iyi yoosi ta.

³⁴Aso ari imbekontselela ni mulyekho biilyo. Kane bibesemo kamaani nio inywe muramewo nga mushiili balamu, lwekhuuba mbaawo ni lutsuune na lutweela khu mirwe kyeenywe lulukane lukoraane ta.”

³⁵Paulo n'amala khuloma aryo, wabukula kumukaati, wasiima Wele akari waabwe boosi, wakumenyulamo, warakikha khuulya.

³⁶Baryo boosi belamo kamaani, nabo buli mutweela babukula biilyo baalya.

³⁷Mu meeri mwabamo babaandu bitoondo bibiili ni kamakhumi musaafu na basesaba (276).

³⁸Baryo boosi ni baamala khuulya bekura, lwe khuukana khukhwanguyisa i meeri, batuumaka iŋaano yoosi mu nyaantsa.

³⁹Ne ni bwasha kumutikhinyi, babaakhola khu meeri balekha khumanya shishaalo isho ta, ne ni baabona lukhuna nga lulikho kumuyekhe, bambaasa bari iba nga shishinyalikha khali bemisile i meeri ibweene iyo.

⁴⁰Baryo kila bakhalaka kimitsangi bakilekha mu meetsi, ni mu mbuka inyene iyo bakangululaka kimikosi kikiwaamba shishitimisa i meeri. Kila babowa ingubo iburaangisi we meeri nio manya imbewo ikiyile iburaangisi khukhwoolesa khu lwoomu.

⁴¹Iryo i meeri yakuunya kumuyekhe, yesiikha. Kuryo kumurwe kwe meeri kwenjila mu kari kwalekha khuteengala ta, ne shisiintsa she nyuma she meeri shafuniakikhakamo bisiintsa lwe mbewo iye kamaani.

⁴²Kila basilikhale baboolanila bonyene bari beere babowe boosi, ilekhe khubawo na mutweela khu nibo unyala khusuba woola khu lwoomu watima waatsya ta.

⁴³Ne umusilikhale umukhulu wakana khuwonesa Paulo, aryo wabashinjilila khukhola abe isho sheesi baakana khukhola. Kila abalakila boosi babamanya khusuba banyoowe bakwe mu meetsi, basube khukhwoola khu lwoomu.

⁴⁴Ne babaramakho boosi bewaambe khu mbaawo, ni khu biindu bibiindi bye meeri bambukhe. Baryo boosi boola khu lwoomu nga balamu.