Read lumasaaba Buraambi 28 Bible Online

Buraambi 28 - lumasaaba bible

Buraambi 28

¹Ni khwamala khubira mu buwaangafu akhali ilomo ta, khwashifumbula khuri shikelemeesi isho abe bashilaanga bari Malita.

²Banaambo beeyo bakhwokesanisa bubweela bwe kamaani, nga bakhwakaanila naluundi nga bakhubwamila kumulilo, lwekhuuba abe antsye anyiriire, ni ifula abe yaarakikhile khuukhupa.

³Paulo abe waarenyile kumurwe kwe tsiikhu nga alikho ara khu mulilo. Abweene awo khulwe buukhafu, indemu yasookhamo, yaamwibowelela khu mukhono.

⁴Ne banaambo b'eyo ni baashibona baryo nga indemu yaamwiwaambile khu mukhono, belomela bonyene bari, “Umusaani yuno ali ni khuuba nga umwiiri, akhaba nga awonile khukhwaama khu nyaantsa, lirima lya wele silyakanile abe mulamu ta.”

⁵Ne ni abweene awo, Paulo wasisakulila indemu tsana mu mulilo, nga mbaawo shishimukholikhilekho ta.

⁶Babaandu baliinda nga bambaasa bari kane abiimbe namwe ekhupe busa aasi afwe. Ne ni bayilawo imbuka nga mbaawo shiibi shishimukholikhilekho ta, barakikha khukhwaambaasa ni khuloma bari Paulo niye ali mutweela khu ba wele.

⁷Ambi ni shifwo isho sheesi khwabamo, abawo kimikuunda ky'omuundu ulaangiwa ari Pubuliyo, uwaba umuwuli we shikelemeesi isho. Umweene yuno wakhwakaanila bulayi naluundi wakhuliinda khumala bifukhu bitaru.

⁸Shanyolekhana nga abe paapa wa Pubuliyo yuno aba ali mulwaale, kamayima ni shihalukho she kamafuki abe byamuwaambile. Paulo watsyayo wamuloombela, wamurakho kamakhono keewe, wamuwonisa.

⁹Ne babaandu babaandi be khu shikelemeesi babaaba balwaale ni baabona shino nga shakholikhile, beetsaka isi Paulo bawonisibwa.

¹⁰Baryo bakhuwa ifwe biriifwa bye angaaki naabi. Ne ni khwaba khwinjila mu meeri, bakhuwa bibyakanibwa bye lukyeendo byoosi.

¹¹Lwanyuma lwe kimyeesi kitaru, khwenjila mu meeri abe iyakama khu shikelemeesi shino Malita lwe bunyifu bukali. I meeri yino abe yaama i Alekizandereya nga khabonelo khaayo nikho, “Ba wele bakhwana Kasita ni Polukisi.”

¹²Khwatsya khwoola i Sirakuse, isi khwamala bifukhu bitaru.

¹³Khwaama iyo khwaatsya khwebotokhelela khwoola i Regiyo. Lwanyuma lwe shifukhu shitweela, imbewo yaama i mwaalo we shiibala, yawuutsa, lwanyuma khu shifukhu shishelakho khwoola i Puteli

¹⁴Ibweene iyo khwanyoolayo be buulebe, babaakhuloomba khwaamala ni nabo bifukhu musaafu. Khuryo khweloosela khuutsya khukhwoolisa ni khwoola i Roma.

¹⁵Ne be buulebe babaaba ibweene iyo ni bawulila bari khwoolile, beetsa khukhwakaanila, nga baama ni mu bifwo nga Mwikaantso lya Apusi ni mu shifwo shilaangibwa shiri Bukono Butaru. Lwanyuma lwe khubona khu be buulebe bano, Paulo wasiima Wele luundi welamo kamaani.

¹⁶Ne ni khwoola i Roma, Paulo wafukiilisibwa khumenya khubweewe yenyene, atweela n'umusilikhale uwamuliinda.

¹⁷Lwanyuma lwe bifukhu bitaru, Paulo walaanga atweela baraangilisi be Bayudaaya. Ni bamala khubuusana, waabaloma ari, “Bebuulebe, ise imbaawo shishiindu shiibi sheesi nakhola isi babaandu beefwe ta, namwe khukhaandisa bye kimisilo kye bakuuka beefwe ta. Ne shitweela busa bona ise nabowebwa nareerebwa mu makhono ke Baroma khukhwaama i Yerusalemu nga ndi umubowe.

¹⁸Ne ni baamala khukhundeebelesa, bakana bari bangangulule intsye, lwekhuuba aba mbaawo ilomo yoosi mu musaango kwase ikila ise neribwa ta.

¹⁹Ne Bayudaaya ni bashikhaandisa, nase kila najulila isi Kayisaali. Akhaba nga namujulila, sinabakho ni kumusaango kwoosi kweesi imbaabila linaambo lyase ta.

²⁰Nilwe lomo yino ikilile naloomba ndi imbonanemo ni nanywe, naluundi imbakanikheyo. Lwekhuuba shishindeerera ise khubowebwa kiminyololo kino shili khukhwiyikina khweesi babaandu ba Isiraeli bali nakhwo.”

²¹Nabo bamwiilamo bari, “Ifwe khushiili khufunakho ibaluwa yoosi khukhwaama i Yuda ikhuwaambakho khusiiwe ta. Naluundi mbaawo khu be buulebe namutweela khubeetsile ino, ukhuwabiile, namwe wakhukanikhakho khwiiwe shishiindu shoosi shiibi ta.

²²Ne khukana khumanye khukhwaama khwiiwe wamweene byeesi waambaasa. Lwekhuuba khwaamanyile khuri buli andu bakanikha buubi khu lituuli lino.”

²³Baryo baŋoonaŋoona bafukiilisana khu shifukhu ni Paulo, bari beetse mu bukali isi abe amenya. Naye Paulo aryo khukhwaama kumutikhinyi khukhwoolisa angoloobe, waba nga abasontsoola khu lomo yino, nga ababoolela bibiwaamba khu Buyiinga bwa Wele. Wakhakakho khuraambisa bibyaama mu makaambila ka Musa, ni bibyaama mu baŋoosi khubaŋaŋasa bibiwaamba khu Yesu.

²⁴Batweela khu nibo bafukiilisa byeesi aloma, ne babaandi balekha khufukiilisa ta.

²⁵Ni balekha khufukiilisana ta, barakikha khuutsya. Ne ni baaba nga bashiili khuutsya ta, Paulo waabaloma ilomo yino: “Umwoyo Umukhosefu akanikha bya ŋali nga n'alomela bakuuka beenywe nga abirira mu muŋoosi Yisaaya ari,

²⁶‘N'utsye isi babaandu bano ubalome uri, Khurekeeresa mulirekeeresa, ne simulibimanya ta; naluundi khubona mulibona, ne simulibimanya ta.’

²⁷‘Lwekhuuba kimyoyo kye babaandu bano kyasiluwale. Kamaru kaawe kaminyaalile, naluundi ni tsimoni tsaabwe sitsibona ta. Bari nio bakhanyala khubona ni tsimoni tsaabwe ta, naluundi balekhe khuwulila ni kamaru kaawe ta bari nio balekhe khuwaamba bibiindu bino mu myoyo kyaabwe ta, balekhe khwinyukha khukobola isi ise ta khubawa buwonesi.’ ”

²⁸Paulo weloosela ari, “Ni mushimanye muri buwonesi bwa Wele buno bwakaanisibwile isi Banaambo. Nibo kane baburekeerese.”

²⁹Lwanyuma Paulo n'amala khuloma ibyo, Bayudaaya basalanila, nga bakhaandisana naabi bonyene na bonyene.

³⁰Paulo wamenya ibweene iyo khumala kimiiko kibili kimibuufu nga umweene esasulila intsu iye khumenyamo. Waba nga akaanila ibo boosi babeetsatsakayo khumubona.

³¹Nga ababoolela bibiwaamba khu Buyiinga bwa Wele ni kamaani koosi naluundi nga mbaawo shishimushinjilila, khukanikha khu bibiwaamba khu Mukasya Yesu Kristo ta.