Read lumasaaba Buraambi 4 Bible Online

Buraambi 4 - lumasaaba bible

Buraambi 4

¹Baarume Petero ni Yokana ni baaba nga bashikanikha isi babaandu, basaayi atweela n'umukhulu we liye liliinda khu Lisaayilo Likhulu, ni Basadukaayo, beetsa isi bali,

²beetsa nga bakhalaale bari lwekhuuba abe baarume balikho baleekela babaandu, naluundi nga belwaatsa bari khuubirira mu Yesu, iliwo khuulamukha khwe baafu.

³Baryo bawaamba baarume Petero ni Yokana, baabara mu mapuusu khukhwoolesa khu shifukhu shisheelakho. Lwekhuuba abe bulikho bwilabula.

⁴Ne bakali khu baandu babaawulila bilomo baafukiilila, ni bukali bwaabwe bweloosela khukhwoolesa babaandu bikana nga biraano (5,000).

⁵Antsye ni bwasha, baraangilisi be babaandu, ni basakhulu, atweela ni baleekeli be kamakaambila ka Musa, babuusanila atweela mu Yerusalemu.

⁶Beetsa atweela ni Anasi umusaayi ufuura bukhulu, ni Kayafa, Yokana ni Alekizanda, ni babaandi babaaba beenda y'omusaayi umukhulu.

⁷Baryo ni baamala khukhwiiimisa baarume Petero ni Yokana akari abwe, babareeba bari, “Mwiimile khu bunyala shiina, namwe mwiimile khu lisiina lya naanu khukhola shino?”

⁸Kila Petero nga wetsuule Umwoyo Umukhosefu abaloma ari, “Inywe bawuli be babaandu atweela ni basakhulu,

⁹noola mulikho mukhureebelesa ifwe shaleelo lw'ebyo bibiwaamba khu shiindu shilayi shishakholebwa khu musaani uwakataala, ni khumanya musaambo shiina yeesi umusaani yuno awonesebwamo,

¹⁰khayo shimanyikhane isi inywe mweesi ni babaandu boosi ba Isiraeli shiri, umusaani uyo awonesebwa mu lisiina lya Yesu Kristo uwe Nazareesi. Umweene uyo isi inywe mwabeene mwatsaangilila khu musalaba ne Wele wamulamusa khukhwaama mu bafu. Shili khulwo mweeneyo kila umusaani yuno emile mu moni tseenywe nga wawonisibwile.

¹¹Yesu mweeneyo niye isi bibyaronebwa bikhosefu bilomakho bili, ‘Libaale lyeesi babombekhi bekaana, lyakalukhile khuuba nga nilyo likhulu lye musoonda.’

¹²Naluundi mbaawo buwonesi khuubirira mu muundu ukuundi yeesi ta, lwekhuuba mbaawo lisiina liliindi aasi e likulu lyeesi babaandu banyala babiriramo bawonesebwa ta akhali lya Yesu.”

¹³Baryo babaandu be mu lukhobo ni baabona nga Petero ni Yokana bali bebumanyilifu bukali, ate nga bashimanya bari bali busa babaandu ba busheele, abe babaakhafunakho buleekele ta, beyaanga naabi. Ne bakyelawo bashifuumbula bari, babaandu bano babaakho ni Yesu.

¹⁴Ne ni babona umusaani uwawonesebwa nga wemilewo, be lukhobo bakoraana she khukhwiilamo.

¹⁵Ne nga balakiile baarume khurura ibulafu we lukhobo, be mu lukhobo bekuta bonyene nga baloma bari,

¹⁶“Babaandu bano kane khubakhole khuryeena? Lwekhuuba shamanyikhiile ilala lubuula isi babekhali be mu Yerusalemu boosi shiri, she kamakaanga shikhulu shakholikhile khuubirira mu nibo, naluundi mbaawo isaambo yeesi khunyala khwashikanamo ta.

¹⁷Ne khubona khuri shishiindu shino sishisalanila mu baandu ta, kane khubareewule balekhelewo khukanikha mu lisiina lino luundi.”

¹⁸Baryo be mu lukhobo babalaanga bakobolayo mukari, babareewula khulekha khwilayo na khafwiiti khukanikha luundi mu Lisiina lya Yesu ta.

¹⁹Ne Petero ni Yokana baabeelamo bari, “Inywe mwabeene ni mukhalewo noola shili shilayi mu moni tsa Wele khukhola sheesi inywe mukana mu shifwo she khukhola byeesi Wele akana.

²⁰Lwekhuuba ifwe sikhunyala khwasila busa ta, akhali ifwe khuli ni khukanikha khwiibyo byeesi khuboone naluundi byeesi khuwuliile.”

²¹Baryo be mu lukhobo ni baamala khuriisariisa baarume musaambo tsitsiindi, babalekhuula baatsya, nga sibabona isaambo ikiindi iye khubawa shitaambiso ta, lwekhuuba baarya babaandu. Lwekhuuba babaandu boosi baaba babuyila Wele khu lw'ebyo byoosi bibyaba byakholikhile.

²²Umuundu yeesi khabonelo khano khe khuwona khakholekhakho aba afuurisa mu miiko kamakhumi kane kye bukhulu.

²³Baryo nga babalekhuulile, baarume Petero ni Yokana baatsya isi bashaabwe, bababoolela byoosi byeesi basaayi bakhulu ni basakhulu baloma.

²⁴Ne ni bawulila bino, basutila atweela kamakono kaawe isi Wele, baloma bari, “Umukasya uwe kamaani, iwe uwabuumba likulu ni shiibala, ni inyaantsa ni bibinyoolikhanamo byoosi,

²⁵waba nga ubirira mu Mwoyo Umukhosefu wakanikha khuubirira mu kuuka weefwe Dawudi, umwakaanisi woowo uri, ‘Lwashiina kila kamanaambo katimaana? Lwashiina kila kamanaambo kambaasa bibikhalimo ta?

²⁶Bayiinga be mu shiibala benyukha ni kamaani, ni bawuli babuusanila atweela, khukhaandisa Umukasya, ni khukhaandisa umurobole weewe Uwatsukhiwakho kamafura.’

²⁷Lwekhuuba muŋali, mu shiriimba shino, Herode ni Pontiyo Pilato, atweela ni Banaambo ni babaandu be mu Isiraeli, babuusana atweela bakhaandisa Yesu, umwakaanisi woowo umukhosefu yeesi watsukhakho kamafura,

²⁸nga bakhola byeesi kumukhono kwoowo ni nengarengekha yoowo ni byaba, byeesi waŋoonaŋoona khaale uri bibewo.

²⁹Ne ari Umukasya, n'ubone khuriisariisa khwawe, ukhuwe ifwe babakaanisi boowo kamaani ke khukanikha shilomo shoowo ni bunyindalifu bwoosi,

³⁰nga iwe wamweene ukolola kumukhono kwoowo khuwonesa balwaale, ni bubonelo ni bye kamakaanga bibikholekhela khuubirira mu Lisiina ly'omwakaanisi woowo Umukhosefu Yesu.”

³¹Baryo ni baamala khuuloomba, shiifwo sheesi babuusanilamo shoosi shatengasibwa naabi, boosi betsusibwa n'Umwoyo Umukhosefu, baarakikha khuukanikha Ilomo ya Wele ni kamaani koosi.

³²Ari lituuli lye babaandu babaafukiilila mu Yesu lyaba ni kumwoyo mutweela ni bulamu butweela. Nga mbaawo na mutweela uloma ari bibiindu byeesi aba nabyo bibyeewe khubweewe ta, ne khurusakho byoosi babikabananila atweela.

³³Nga baraambisa kamaani kamakali, baarume bawaanayo bujulisi bwaabwe khu khulamukha khwa Yesu khukhwaama mu bafu, ni bubweela bwa Wele bwe kamakana bwababaakho boosi.

³⁴Mu lituuli lyaabwe abe mbaawo uwikoomba shishiindu shoosi ta, lwekhuuba bakali babaaba ni kamaswa, namwe tsiintsu, babikulisaka, bareera byeesi bamisamo,

³⁵babiwaanayo isi baarume, babikabananisamo isi babaandu khulondekhana nga abe buli mutweela n'akana.

³⁶Ni Yusufu isi baarume baatwiikha bari, Balunaba (lilimanyisa liri, umuundu uwisamo kamaani), uwaba umu Levi, uwasaalikha i Kupuro,

³⁷aakulisa liiswa lyeewe, waareera tsinusu, waatsira mu moni tse baarume.