Read lumasaaba Buraambi 5 Bible Online

Buraambi 5 - lumasaaba bible

Buraambi 5

¹Ne aabawo umusaani mutweela, lisiina lyeewe Ananiya, n'umukhasi weewe Safira, baakulisa liiswa lyaabwe.

²Waabukulakho tsinusu tsindala waatsibiikha, n'umukhasi weewe nga waashimanyilekho, ne tsitsiramile waatsiyila isi baarume.

³Petero waamuloma ari, “Ananiya, shiina kila Sitaani akhwitsuulemo mu mwoyo kwoowo woola ni khuwoombesa Umwoyo Umukhosefu nga uramisakho shisiintsa she tsinusu tsitsamile mu liiswa?

⁴Abe nga liiswa ni lishiili khukulisibwa ta, shilyaba nga lilyoowo? Abe akhaba nga ni lyaakulisibwile, sishabeele khuusi iwe khukhola sheesi abe ukana? Ne lwashiina kila waambaasile shishiindu nga shino mu mwoyo kwoowo? Iwe siwawoombesele babaandu ta, ne wawoombesele Wele.”

⁵Aryo Ananiya nga n'awulila bilomo bino, welima aasi kumubwi, wasumbukha. Ni khuurya khukali khwawaamba ibo boosi babashiwulilakho.

⁶Basooleli benyukha bamubowa mu ngubo, bamurusa ibulafu baatsya bamusiikha.

⁷Lwanyuma lwe khuubirawo tsisaawa nga tsitaru, umukhasi weewe naye woola, n'enga siwaamanyile bibibeelewo ta.

⁸Kila Petero waamureeba naye ari, “Imboolele khubone, tsinusu tsino tsonyene nitso tsitsaamile mu khukulisa liiswa?” Umukhasi uyo naye welamo ari, “E e, ni tsinyene itso.”

⁹Ne Petero wamuloma ari, “Shiina kila iwe n'umuseetsa woowo mufukiilisaane khukhakilisa Umwoyo w'Omukasya? Khekhuboolele, bikyele byaabo babaama khusiikha umuseetsa woowo byoolile amulyaango, ni nawe banakhusuta bakhuruse.”

¹⁰Khaangukho, naye welima aasi kumubwi mu bikyele bya Petero, wasumbukha. Basooleli baatsya khwinjila mu ntsu banyoola nga wasumbukhile khaale, bamusuta bamurusa ibulafu, baatsya bamusiikha andulo isi umuseetsa weewe.

¹¹Khuurya khukali khwakwawo mu bafukiilisi mu Kristo boosi, ni khuusi ibo boosi babaawulila bibiindu bino.

¹²Ari bibiyaangisa ni bye kamakaanga bikali, byakholebwatsaka mu baandu, nga bibirira mu makhono ke baarume. Abe bafukiilisi boosi babusaanile mwitikiiyi lililaangibwa lya Solomoni.

¹³Khu baandu babaramile, mbaawo na mutweela uwe sungula khubetubaasakho ta. Ne babaandu boosi bakanikhatsaka khu baarume bibiindu bilayi byonyene.

¹⁴Wanamuundu we bafukiilisi nga mulimo basaani ni bakhasi, beloosela khukhwitubaasatsaka khu Mukasya, khuminyisakho tsifuunda tsindaayi.

¹⁵Bano boosi boola ni khusuta batsiina baabwe khubara khu ntsila, nga babaalisa khu bulili ni khu masisinwe, bari nio uri Petero abira, shishiniini sheewe sholekho khu balala.

¹⁶Kamatuuli ke babaandu kabuusana khukhwaama mu biriimba bibibotokhelele Yerusalemu, nga bareera batsiina ni naabo abe babataambisibwa ni kimisaambwa kimibi. Abo boosi bawonesebwa.

¹⁷Lwanyuma Umusaayi ufuura bukhulu wenyukha, nga ali atweela ni be mwituuli lye Basadukaayo boosi, nga betsuule likoko,

¹⁸baryo bawaamba baarume baabekalila mwipuusu lye babaandu baabusheele.

¹⁹Ne mu shilo malayika w'Omukasya waabekulilawo lulwiitsi lwe lipuusu waabarusa antsye, kila abaloma ari,

²⁰“Ni mutsye mwiimikhe mu Lisaayilo Likhulu, muboolele babaandu bilomo byoosi bye buulamu buno.”

²¹Baarume ni baawulila shino, baatsya benjila mu Lisaayilo Likhulu kumutikhinyi, baarakikha khuuleekela. Ne Umusaayi ufuura bukhulu n'ola, atweela ni naabo babaaba ni naye, wekhasa lukhobo nga lulimo baraangilisi ba Isiraeli boosi. Kila barumanisa mwipuusu bari babareerere babowe tsana.

²²Ne basilikhale babaatsya ni boolayo, baalekha khunyoola babowe tsana nga bali mwipuusu ta. Kila belayo baboolela bakhulu bari,

²³“Khunyoolele nga lipuusu likhomekhe bulayi bubweene, ni babaaliinda nga beemile khu mulyaango, ne ni khulomile khuri khwikulawo, khwalekha khunyoola umuundu yeesi mukari ta.”

²⁴Aryo umusilikhale umukhulu uwe Lisaayilo Likhulu ni basaayi bakhulu ni baawulila bilomo bino, byabeyangisa naabi, nga bekanakana byeesi bibiindu bino sheesi bimanyisa.

²⁵Abweenewo, umuundu mutweela weetsa waababoolela ari, “Bona babaandu beesi mwareere mwipuusu anaari bali mu Lisaayilo Likhulu balikho baleekela babaandu.”

²⁶Khaangukho umusilikhale umukhulu we Lisaayilo Likhulu, ni basilikhale beewe baatsya babareera, nga sibaraambisa kamaani ta, lwekhuuba abe bariire bari babaandu banyala khubakhupa kamabaale.

²⁷Ne ni baamala khubareera, baabeemisa akari mu lukhobo. Umusaayi ufuura bukhulu wabareeba,

²⁸nga aloma ari, “Ifwe khwabakhoonyakilile khuulekha khuleekela mu Lisiina lino ta. Ne bona inywe mwetsusile Yerusalemu ni khuleekela khweenywe, naluundi mukana khukhubowa khuusi ifwe khuufwa khw'omusaani yuno.”

²⁹Kila Petero ni baarume belamo bari, “Khwandyakhiile khuuwulila Wele, ne shiili babaandu ta.

³⁰Wele uwe bakuuka beefwe uwalamusa Yesu khukhwaama mu bafu, isi inywe mweera nga mumutsaangilila khu musalaba kwe kusaala.

³¹Wele waamuniinisa khuuba khu mukhono kweewe kumulayi nga umuraangilisi naluundi Umuwonesi, ari nio babaandu be mu Isiraeli bafune khukhwibiiyisa ni khukhwiyakhilwa bibyoonako byaabwe.

³²Ni nafwe khuli bajulisi be bibiindu bino, ne shiili ifwe fwenyene ta, ne n'Umwoyo Umukhosefu isi Wele amalile khuuwa ibo babamuwulila niye.”

³³Ne be mu lukhobo ni bawulila bino, byabatsiina naabi bakana beere baarume.

³⁴Ne Umufarisaayo mutweela, uwaba abe mutweela khube mu lukhobo lweene, uwalaangiwa Gamalieli, naye uwaba umuleekeli we kamakaambila ka Musa, naluundi abe isi babaandu besamo naabi shiriifwa, weema khu ngaaki, walakila ari baarume barusiwe ibulafu khakyeekhe.

³⁵Kila Gamalieli tsana alomela be mu lukhobo ari, “Inywe babaandu ba Isiraeli, muli ni khukhwitsililisa naabi isaambo yeesi mubirisamo babaandu bano.

³⁶Lwekhuuba mu mbuka ibirire ifwiiti iri, Tewudasi enyukha aasi, weyila nga niye umuundu we angaaki naabi. Ni babaandu baboola nga bitoondo bine bamwitubaasakho. Ne ni eribwa, ibo boosi abe babamuloondelela, basalanisibwa, byaweela awo biryo.

³⁷Lwanyuma lwooyo aabawo Yuda uwama i Galilaaya, naye uwenyukha aasi mu bifukhu bye khuubala babaandu naye wabakho ni babaandu babamuloondelela. Naye aryo wahela, ni naabo abe babamuloondelela boosi basalanila.

³⁸Nashiryo, ni nebyo bibiiliwo aluno ari ise imbaloma ndi, ni murure khu baandu bano mubalekhe babe. Lwekhuuba noola inengekharengekha yino, namwe kimilimo kyaabwe kino kili kye babaandu busa, kane kikhaasikhane.

³⁹Ne noola byeesi bakhola bya Wele, singene munyalise khubaakamisa ta. Lukana mwinyoola muri mulikho musoolanisa Wele.”

⁴⁰Baryo baayila kamakyesi keewe keesi aabawa. Balaanga baarume baakobola mukari, baabakhupa tsiinga, naluundi baabareewula khuulekha khukanikha mu Lisiina lya Yesu luundi ta. Baabalekhuula baatsya.

⁴¹Baarume baarura mu lukhobo, nga bekhoya lwekhuuba baabona nga she lisuno khuubirisibwa buubi khulwe Lisiina lya Yesu.

⁴²Na buli shifukhu Baarume baaba mu Lisaayilo Likhulu ni muungo tsaabwe nga beloosela khukhwilwatsa Kamakhuuwa Kamalayi kakawaamba khu Yesu nga niye Kristo.