Read lumasaaba Buraambi 8 Bible Online

Buraambi 8 - lumasaaba bible

Buraambi 8

¹Ni Saulo abawo, wafukiilisana ni nabo khukhwiiribwa khweewe. Ni khu shifukhu sheenesho, aabawo khuukubyeengebwa khukali isi baafukiilisi ba Kristo mu Yerusalemu. abo boosi babaaba bafukiilisi basalanisibwila mu byaalo bye Yuda, ni mu Samariya, akhali baarume bonyene nibo babaarama.

²Babaandu babesaaya Wele basiikha Sitefano, luundi baamulilila lukali.

³Ne Saulo waakhakakho khuubona ari ahesa baafukiilisi ba Kristo, nga enjila mu buli intsu, nakhweesamo baafukiilisi, basaani ni bakhasi, waabara mu mapuusu.

⁴Ari baafukiilisi abo babaasalanisibwila oosi oosi baatsya nga baboolela Ilomo ya Wele.

⁵Filipo waatsya mu shiriimba shikhulu she mu Samariya, waaboolelayo bibiwaamba khu Kristo.

⁶Kamatuuli ke babaandu ni kaawulila Filipo, naluundi ni kaabona bye kamakaanga byeesi aakhola, baamurekeeresa ni kumwoyo mutweela.

⁷Bakali khu nibo babaabamo kimisaambwa kimibi kyabaruramo, nga kililila angaaki, ni babaandi babaakataala, ni baaleme, baawonesebwa.

⁸Aryo aabawo kumwikhoyo mukali mu shiriimba isho.

⁹Aabawo umusaani mutweela lisiina lyeewe bari Simoni, uwaba nga akholatsaka bye bufumu mu shiriimba, naluundi nga waayiyangisa be linaambo lya Samariya boosi, nga aloma ari niye umuundu umukhulu naabi.

¹⁰Babaandu boosi khukhwaama khu we aasi khukhwoola khu we angaaki baamurekeelesatsaka naabi, nga baloma bari, “Umusaani yuno niye kamaani ka Wele kakalaangibwa kamaani kamakhulu.”

¹¹Baamurekeelesatsaka baryo lwekhuuba mu mbuka ndeeyi abeeyangisatsaka lwe khukhola bye bufumu byeewe.

¹²Ne babaandu ni baamala khufukiilila kamakhuuwa kamalayi ke Buyiinga bwa Wele, ni lisiina lya Yesu Kristo byeesi Filipo ababoolela, boosi babatisibwa, basaani ni bakhasi beene.

¹³Ni Simoni mweene naye wafukiilila, nga waamalile khubatisibwa, wabetsaka atweela ni Filipo. Aryo nga wabonatsakile bye khubonelakho ni bye kamakaanga bikali bibyaba bikholebwa ni baarume, welaliila busa.

¹⁴Baryo baarume babaaba mu Yerusalemu nga baawuliile bari babaandu be Samariya baafukiiliile Ilomo ya Wele, baabarumanila Petero ni Yokana.

¹⁵Ne bano ni boolayo, baabaloombela bari bafukiilisi bafune Umwoyo Umukhosefu,

¹⁶lwekhuuba Umwoyo aba ashiili khubeekhakho na mutweela khu nibo ta, ne baaba babatisibwa busa mu lisiina ly'Omukasya Yesu.

¹⁷Lwanyuma Petero ni Yokana babarakho kamakhono kaawe, bafuna Umwoyo Umukhosefu.

¹⁸Ne Simoni tsana uwaba umufumu n'abona ari Umwoyo Umukhosefu abaweebwa lwe khureewakho kamakhono ke baarume, wabawa tsinusu,

¹⁹nga aloma ari, “Nase ni muumbe kamaani kano, nio nase buli muundu isi kane indatsakekho kamakhono kaase, afune Umwoyo Umukhosefu.”

²⁰Ne Petero waamwiilamo ari, “Iwe wamweene ni tsinusu tsoowo ni muhele, lwekhuuba waambaasa uri kane ukule shiwaanwa sha Wele nga uraambisa tsinusu!

²¹Iwe s'uli ni bufunisi namwe ni kumukabo mu bwakaanisi buno ta, lwekhuuba kumwoyo kwoowo shikuli kumukwalaafu mu moni tsa Wele ta.

²²Aso ni wibiiyise buubi bwoowo buno, uloombe Umukasya, nio manya nga shinyalikha akhwiyakhile shishambaaso shino shishiili mu mwoyo kwoowo.

²³Lwekhuuba ise imbona nga iwe uli ni libuba libiririfu, luundi uli umubowe we bubwoonaki.”

²⁴Aryo Simoni tsana naye welamo ari, “Inywe ni munoombele isi Umukasya, nio bilomo bino byeesi mulomele bilekhe khukhukholekhakho na shitweela ta.”

²⁵Baryo Simoni Petero ni Yokana ni baamala khuumanyisa ni khuuboolela Ilomo y'Omukasya, baakobolayo i Yerusalemu, nga baboolela Kamakhuuwa Kamalayi mu byaalo bikali bye mu Samariya.

²⁶Malayika w'Omukasya waaloma Filipo ari, “Yinyukha utsye wikhilile imwaalo we shiibala khukhwoola khu ntsila iyikhilila khukhwaama i Yerusalemu, khuutsya i Gaza, intsila iye kumubiimbi.”

²⁷Aryo Filipo wenyukha, waatsya. Ne n'aba nga atsya, waakanana umusaani umu Esiyopiya umwomole. Aaba umuundu umukhulu, nga niye umukhulu we libiikhilo lye tsinusu mu buyiinga bwa Kandake, umuyiinga umukhasi uwe Esiyopiya. Umusaani yuno aaba weetsile i Yerusalemu khukhwisaaya.

²⁸Ne n'aba nga akobolayo ingo, nga wikhaale mu likaali lyeewe lyeesi tsiŋwaaŋwa tsikhweesa, aaba asoma mu shitabo sh'omuŋoosi Yisaaya.

²⁹Umwoyo waloma Filipo ari, “N'utsye isi likaali ilyo, ube aambi ni nalyo.”

³⁰Filipo waatima, waatsya aambi ni likaali, waawulila umusaani nga asoma mu shitabo sha Yisaaya umuŋoosi. Filipo waamureeba ari, “Byeesi usoma uli khubimanya?”

³¹Umwomole watsana wamwiilamo ari, “Inyala indyeena khuubimanya khurusakho nga iliwo umuundu uuli khukhusontsoola?” Aryo walaanga Filipo ari aniine ekhale ni naye mu likaali.

³²Shisiintsa sheesi umwomole aaba ali khuusoma khukhwaama mu byaronebwa bikhosefu nisho shino, “Aayiliwa nga lisheese ni liyilibwa khukhwiiribwa, nga khasheese ni khakhaniaaka ta nga bakhabekakho bubwooya, naye aryo s'aloma ilomo yoosi ta.

³³Bamubirisa buubi, balekha khumwokyesanisa bwa ŋali ta. Naanu unyala wasontsoola bibiwaamba khu shikuuka sheewe? Lwekhuuba buulamu bweewe bwarusibwa khu shiibala.”

³⁴Kila umwomole areeba Filipo ari, “Nakhwikontseleele imboolele, naanu isi umuŋoosi alomakho bilomo bino? Elomakho umweene namwe aloma khu muundu ukuundi busa?”

³⁵Kila Filipo waarakikhila khu byaronebwa bikhosefu byeene bino, waamuboolela kamakhuuwa kamalayi kakawaamba khu Yesu.

³⁶Ne ni baaba nga bali khu ntsila batsya, boola mu shiifwo shishiilimo kameetsi, umwomole waaloma ari, “Bona kameetsi, shiina ndi shishindobesa khubatisibwa?”

³⁷Filipo waamuloma ari, “Noola ufukiilila ni kumwoyo kwoowo kwoosi, unyala waabatisibwa.” Naye umwomole waamwiilamo ari, “Ifukiilila ndi Yesu Kristo niye Umwaana wa Wele.”

³⁸Aryo umwomole waalakila likaali khukhwiimikha. Niye ni Filipo boombi beekha mu meetsi, Filipo wamubatisa.

³⁹Ne ni baama mu meetsi, Umwoyo w'Omukasya khaangukho wayila Filipo. Umwomole walekha khumubonakho luundi ta, ne weloosela ni lukyeendo lweewe nga ekhoya.

⁴⁰Ne Filipo lwanyuma waabonekhela mu Azoto, waabira mu biriimba byoosi nga aboolela kamakhuuwa kamalayi khukhwoolesa n'ola i Kayisaliya.