Read lumasaaba Buraambi 9 Bible Online

Buraambi 9 - lumasaaba bible

Buraambi 9

¹Ne Saulo aba nga ashiloosela khukhwaambaasa bye khuriisariisa ni khukhwiira baleekelwa b'Omukasya Watsya isi umusaayi ufuura bukhulu,

²ari amuwe buurone bwe khuyila mu ntsu tsye khukhwisaayilamo i Damasiko, nio bari nga wanyooleleyo babaandu be Ntsila, basaani namwe bakhasi anyale khubawaamba abareere i Yerusalemu nga babowe.

³Aryo n'aba nga atsya, nga ali aambi khukhwoola i Damasiko, khaangukho buwaanga bwaarura mwikulu bwamumulikha tsimbeka tsoosi.

⁴Waakwa aasi wawulila likono nga limuloma liri, “Saulo! Saulo, lwashiina iwe ungubyeenga ise?”

⁵Kila Saulo waamureeba ari, “Iwe naanu, Umukasya?” Likono lyamwiilamo liri, “Ise Yesu isi iwe ukubyeenga.

⁶Ne ari ni winyukhe utsye mu shiriimba, isi kane bakhuboolele bibikhwakhila iwe khukhola nga ni bili.”

⁷Ne basaani babaaba bakyeenda ni Saulo beema, nga beyaanga busa. Lwekhuuba baawulila likono, n'enga sibabonakho umuundu yeesi ta.

⁸Aryo Saulo wenyukha aasi, wakhakakho khumoka tsimoni tseewe, ne walekha khunyala khubonakho shishiindu shoosi ta. Baryo bamuwaamba kumukhono bamureera i Damasiko.

⁹Wamala bifukhu bitaru nga s'abona naluundi nga s'alya namwe nga s'anywakho shishiindu shoosi ta.

¹⁰Ne mu Damasiko mwabamo umuleekelwa mutweela ulaangiwa Ananiya. Umukasya waamulaanga mu khubonekhelwa, waamuloma ari, “Ananiya.” Naye Ananiya waamwiilamo ari, “Ise niy'oyu, Umukasya.”

¹¹Umukasya waamuloma ari, “Yinyukha utsye khu mukhoosi kwe shiriimba kukulaangibwa Kumukolole, mu ntsu ya Yuda, ureebe bakhwokyese umuundu ulaangibwa Saulo uwe Taruso. Ari uli khuloomba.

¹²Mu khubonekhelwa khweewe waboone umuundu ulaangibwa Ananiya nga enjila is'ali, amurekho kamakhono keewe, nio anyale khubona luundi.”

¹³Ananiya welamo ari, “Umukasya, babaandu bakali bayimboolela bibiindu bibiwaamba khu musaani yuno, ni bukosi bweesi akholatsakile khu bakhosefu boowo mu Yerusalemu.

¹⁴Ni na ano wetsile ni bunyala khukhwaama isi basaayi bakhulu khuwaamba ibo boosi babaakhwisaaya iwe.”

¹⁵Ne Umukasya waloma Ananiya ari, “N'utsye, lwekhuuba umusaani yuno ise samweene naamuroboole khuyila lisiina lyase isi Banaambo, n'isi bayiinga baabwe, naluundi n'isi babaandu ba Isiraeli.

¹⁶Nase samweene indimwokesanisa bikali bibilimwakhila khutaambisibwa lwe lisiina lyase.”

¹⁷Ananiya aryo waatsya, wenjila mu ntsu mweesi Saulo aba, waamurakho kamakhono, waamuloma ari, “Uwe buulebe Saulo, Umukasya Yesu umweene, uwakhubonekhela khu ntsila nga uli khukhwiitsa ino, waandumile ise bari nio ubimbukhe tsimoni ubone, luundi witsusiwe n'Umwoyo Umukhosefu.”

¹⁸Khaangukho bibiindu bibifwaana nga kamabaambu byaakwa khukhwaama khu moni tsa Saulo, waabona luundi. Aryo wenyukha waabatisibwa.

¹⁹Ne lwanyuma nga waamalile khuulyakho biilyo, wiilamo kamaani. Saulo waamala bifukhu bikalikho nga ali ni baleekelwa be mu Damasiko.

²⁰Khaangukho watsya mu ntsu tsye khukhwisaayilamo nga aboola ari, “Yesu ali Umwaana wa Wele.”

²¹Ne boosi babamuwulila nga aloma beyaanga busa nga baloma bari, “Oyu s'ali niye umusaani uwabiyila babaandu babesaaya Yesu mu Yerusalemu? Naluundi abe sishili isho nisho shishamureera ino khubawaamba, abayile nga babowe isi basaayi bakhulu?”

²²Ne Saulo niye welooselela ilala khuuba ni kamaani nga awandalasa Bayudaaya babamenyatsaka mu Damasiko ari, Yesu niye Kristo.

²³Nga bifukhu bikalikho byabirirewo, Bayudaaya baboolanila bonyene bari bamwiire.

²⁴Ne Saulo wamanya byeesi baateesa. Baryo baliindatsakila khu milyango kye shiriimba shiilo ni kumuusi bari manya bamuwaambilise bamwiire.

²⁵Ne shiilo shitweela, baleekelwa beewe baamuyila, bamurusila mu mwanya kwe khwitikiiyi, bamwikhisilamo nga bamureere mu muyayi.

²⁶Ne Saulo nga wolele mu Yerusalemu, wakhakakho ari etubaase ni baleekelwa, ne nibo boosi bamurya, nga sibafukiilisa bari naye ali umuleekelwa ta.

²⁷Ne Balunaba waamuyila, waamureera isi baarume. Aryo waabanoonosela ilala ari Saulo aabona Umukasya khu mukhoosi kwe Damasiko, luundi ari Umukasya aakanikha ni naye. Naluundi waabanoonosela nga Saulo n'aboolela Kamakhuuwa Kamalayi mu lisiina lya Yesu ni kamaani mu Damasiko, nga s'alikho ni khuurya ta.

²⁸Aryo Saulo wakyeendatsakila atweela ni nabo mu Yerusalemu, nga akanikha khu lisiina ly'Omukasya ni liefu likali.

²⁹Naluundi wakanikha ni kamaani kamakali, nga akhaandisana ni Bayudaaya babakanikha Luyonaani, ne nibo bakhakakho khumwiira.

³⁰Ne be buulebe ni bashimanyakho baryo, bamwikhisa i Kayisaliya, bamurumana i Taruso.

³¹Ulwo babaandu babaafukiilila mu Yesu babaaba mu Yuda mwoosi ni mu Galilaaya, ni mu Samariya, baafunakho mbuka iye lukoosi. Beloosela khuuba bakali, nga bakyeendela mu khwisamo Umukasya shiriifwa ni mu khwikhoyesebwa khw'Omwoyo Umukhosefu, bafukiilisi beloosela khuuba bakali.

³²Petero n'aba nga akyeendakyeenda buli andu, lutweela waatsya wakyeniyilakho babaandu bakhosefu ba Wele abe babaamenya mu Lida.

³³Ibweeneyo waanyoolayo umusaani ulaangiwa bari Ayinasi uwakataala nga abe waamala khu bulili kimiiko shinaane.

³⁴Petero waamuloma ari, “Ayinasi, Yesu Kristo akhuwonesa. Yinyukha wiyalile bulili bwoowo.” Lubaluba Ayinasi wenyukha.

³⁵Babaandu boosi babaamenya mu bifwo bibilaangibwa Lida ni Saloni ni bamubona, bashuukha bafukiilisa mu Mukasya.

³⁶Ne mu Yopa mwabamo umuleekelwa umukhasi lisiina lyeewe bari Tabisa, lilimanyisa liri Dorukasi, uwawanatsakayo imbuka yeewe khukhola bilayi ni khuyeeta bataambi.

³⁷Mu bifukhu ibyo, bulwaale bwamuwaamba waafwa. Ne ni baamala khusiinga kumulaambo kweewe, bakwalisa mu shiseenge she khungaaki.

³⁸Ne lwekhuuba Lida shaba aambi ni Yopa, baryo baleekelwa ni baawulila bari Petero ali mu Lida, bamurumanila babaandu babili baatsya khumwikontselela bari, “Yuubakho, wiitse isi khuli.”

³⁹Petero wenyukha watsya ni nabo. Ne nga woleleyo, baamuyila mu shiseenge tsana she khungaaki. Banamulekhwa boosi bemikha bamwibotokhelela nga balila, nga bamwokesa tsingubo ni bikwaaro bibiindi byeesi Dorukasi aruungatsaka nga ashiili mulamu ni nabo.

⁴⁰Petero waabarusa boosi ibulafu, waafukhama aasi, waaloomba, lwanyuma waashuukha waalomela kumulaambo ari, “Tabisa yinyukha.” Aryo Tabisa wenyusa tsimoni waamoka, ne n'abona Petero wenyukha wekhala.

⁴¹Petero waayila kumukhono kweewe, waamwinyusa weema. Lwanyuma Petero walaanga babaandu bakhosefu ba Wele, ni banamulekhwa, waabamwakaanisa nga umulamu.

⁴²Shino shamanyikhana mu Yopa mwoosi, ni babaandu bakali bafukiilila mu Mukasya.

⁴³Aryo Petero wamenyayo bifukhu bikali mu Yopa, mu ntsu ya Simoni abe uwala kamahaafu.