Read lumasaaba Baroma 10 Bible Online

Baroma 10 - lumasaaba bible

Baroma 10

¹Bebuulebe, ise khuukana khwe kumwoyo kwase ni khuuloomba khwase isi Wele khu lwe ba Isiraeli bili biri, khali Wele abawonesele.

²Ise ishiwandalasa ndi mu bulamu bwaabwe, Wele bamukana naabi. Ne khuukana khwaabwe khutaambamo khuumanya khukhuumala.

³Khulwekhuuba mu saambo yeesi balekha khubamo ni bibiwaamba khu bukwalaafu bubwama isi Wele bibiimala ta, baalekha khulondelela bya Wele ta, ne akhali baweentsa khurawo bukwalaafu bubwaabwe.

⁴Khulwekhuuba ari Kristo wakila kamakaambila kayakama khuraamba, nio buli muundu yeesi umufukiililamo abe umukwalaafu isi Wele.

⁵Nga Musa arona khu bibiwaamba khu bukwalaafu bubunyolikhana khuubirira mu makaambila aaloma ari, “Umuundu yeesi ukhola nga kamakaambila ni kaloma, alifuna buulamu khulwe kamakaambila.”

⁶Ne bukwalaafu bubwiimile khu khufukiilila khw'omuundu buloma buri, “Ukhereeba mu mwoyo kwoowo uri, ‘Ne naanu ukane aniine mwikulu akhureerere Kristo asi khu shiibala?’

⁷Namwe ukhereeba uri, ‘Naanu ukane eekhe aasi imakoombe khukhureera Kristo khungaaki, khukhwaama mu bafu?’ ”

⁸Shisharonebwa shiloma shiryeena? Sishiloma shiri, buurume bwa Wele, nga nibwo buli shilomo she khuufukiilila sheesi ifwe khukuukuula, shili aambi ni nawe. Shili khu minwa kyoowo, naluundi shili mu mwoyo kwoowo?

⁹Khulwekhuuba iwe n'ufukiilisa ni kumunwa kwoowo uri Yesu niye Umukasya, naluundi wafukiilila mu mwoyo kwoowo uri Wele amulamusa khukhwaama mu bafu, uliwonesebwa.

¹⁰N'ufukiilila ni kumwoyo kwoowo, wikyela umukwalaafu; ne n'ubuula ni kumunwa kwoowo, uwonesebwa.

¹¹Nga bibyaronebwa bikhosefu ni biloma biri, “Mbaawo umuundu namutweela ufukiilila mu Yesu, uliwaambisibwa kamaŋaanyu ta.”

¹²Khulwekhuuba mbaawo khuromboosa akari w'Omuyudaaya n'Umunaambo ta. Umukasya mutweela uyo, niye Umukasya uwa boosi. Naluundi niye ukabila boosi babamwiitsayo buyiindifu bweewe.

¹³Nga ni sharonebwa shiri, “Buli muundu yeesi uwisaaya Umukasya, aliwonesebwa.”

¹⁴Ne babaandu banyala baryeena besaaya Umukasya nga bashiili khumufukiililamo ta? Naluundi banyala baryeena bamufukiililamo, nga bashiili khuwulila buurume bubwaama isi Umukasya ta? Naluundi banyala baryeena baawulila bibiwaamba khu Mukasya, nga imbaawo ubakhupiile kumulaanga ta?

¹⁵Naluundi babaandu banyala baryeena bakhupa kumulaanga kwe buurume, nga imbaawo ubarumanile ta? Ne nga bibyaronebwa bikhosefu ni biloma biri, “Babareera kamakhuuwa kamalayi nga bali ni bikele bilayi!”

¹⁶Ne seshili bari boosi bakaanila kamakhuuwa kamalayi kano ta. Nga Yisaaya n'aloma ari, “Umukasya, babaandu beenga babafukiilila kamakhuuwa keesi ifwe khwakuukuula?”

¹⁷Nashiryo, khufukiilila khwaama mu khurekeeresa buurume, naluundi buurume bwiitsa khukhwaama mu khulaangila khweesi Kristo akhola.

¹⁸Lekha ise indeebe shireebo: Shinyala shaba shiri bashiili khuwulila buurume ta? Ilala bawulila buurume, nga bibyaronebwa bikhosefu ni biloma biri, “Likono lye babaandu babakuukuula buurume lyayola mu shiibala shoosi. Naluundi buurume bwaabwe bwayola isi shiibala shakama.”

¹⁹Khayo indeebe shireebo shishikhola khabili: Shinyala shaba shiri babaandu be mu Isiraeli sibamanya buurume ta? Musa anyoowa khukhwiilamo shireebo shino khaale busa nga aloma ari, “Ise indiraambisa linaambo lilishiili khukhwikyela linaambo ta, indikila liwaambise babaandu baase libuba, ni lwe linaambo lye babaandu babaali basilu indikyelisa babaandu khuuba be lirima.”

²⁰Ni Yisaaya ashilomakho ni kamaani nga n'aloma ari, “Babaandu babaakhameentsa ta, nibo babanyoola ise; naluundi ari samweene neyokesanile isi abo babaakhaamentsa ta.”

²¹Ne nga Yisaaya akanikha khu ba Isiraeli aloma ari, “Buli shifukhu ise indi umwirekefu khukhwakaanila babaandu babaakhakana khuwulila ta, naluundi babaali ni bituluungu.”