Read lumasaaba Baroma 11 Bible Online

Baroma 11 - lumasaaba bible

Baroma 11

¹Lekha indeebe shireebo shishiindi: Shinyalikha Wele khukhwikaana babaandu beewe? Seshinyala shaaba shiryo ta. Khulwekhuuba ise samweene indi mutweela khu ba Isiraeli babeene, ndi umwitsukhulu uwa Iburayimu, naluundi ndi mutweela khu be mu shikuuka sha Benyamini.

²Wele siwayikaana babaandu beesi arobola khaale ta. Inywe simumanya sheesi bibyaronebwa bikhosefu biloma khu Eliya, nga n'ekontselela Wele khulwe ba Isiraeli, nga aloma ari,

³“Umukasya, bamalile khukhwiira baŋoosi boowo, naluundi bafuniakile bibyeeso byoowo. Ise senyene niye uramilewo, ne akhaba ni nase balikho bakana khuurusawo bulamu bwase.”

⁴Ne Wele amwiilamo aryeena? Amuloma ari, “Nayibikhila samweene babaandu bikana musaafu, babaakhafukhama aasi khu masikamo kaabwe, besaaya Baali, wele uwe bubeeyi ta.”

⁵Shitweela busa, ni aluno ari iliwo babaramile bafwiiti beesi Wele amala khurobola khulwe bubweela bweewe.

⁶Ne khurobola khweesi Wele akhola khuli khulwe bubweela bweewe, ne s'ili khulwe bikholwa byeesi bakhola ta. Iba nga bari khurobola khweesi Wele akhola khwimikha khu byeesi babaandu bakhola, khali bubweela bwa Wele buba sibushiili bubweela ta, ne khali buli shishiindu shishindi busa.

⁷Shinaanu shishalooselakho? Babaandu ba Isiraeli bakhasikha khunyoola abe sheesi baweentsa. Bafwiti bari khu nibo babanyoola abe sheesi baweentsa, ne babaramile barama nga baminyaliile buurume bwa Wele.

⁸Shaba nga bibyaronebwa bikhosefu ni biloma biri, “Wele aabawa kumwoyo kukukhamanya mangu ta, ni tsimoni tsitsikhabona ta, ni kamaru kakaakhawulila ta. Ni khukhwoolisa khu shifukhu she shaleelo, bali busa baryo.”

⁹Ni Dawudi naye aloma ari, “Khali imeetsa iye kamayiiya kaabwe inyene yikyelile kumureko isi bawaambikhila, nio akile bakwe mu byoonako, naluundi khali bafunile shitaambiso!

¹⁰Khali tsimoni tsaabwe tsimaliile nio balekha khubona ta, naluundi khali balemaale befuumba kimikoongo kyaabwe buulamu bwaabwe bwoosi.”

¹¹Ari khandeebe shireebo shishiindi: Bayudaaya ni betuya khu mureeko kukwabawo, baakwa aasi boonakisibwa, namwe baataalataala busa? Ni betuya sibakwa aasi boonakisibwa ta, akhali indi khuubirira mu khwooneka khwaabwe, Banaambo nabo baafuna buuwonesi, nio akile liibuba liwaambe ba Isiraeli.

¹²Bibyoonako bye babaandu ba Isiraeli byakila byaareera tsikhabi tsingali khu shiibala, naluundi khuukhasikhana khwaabwe khwakila khwareera tsikhabi tsingali isi Banaambo. Nashiryo, tsikhabi tsiliba tsingali naabi nga buukali bwe Bayudaaya boosi bwongesebwile khu baandu bano.

¹³Ari khanganikhe isi inywe Banaambo. Khukhwaama nga ise n'indi umurume isi Banaambo, kane imbuyile naabi buurume bwase,

¹⁴nio manya liibuba liwaambe babaandu babaali Bayudaaya bashaase, nio musaambo iyo ise inyalise khuwonesakho batweela khu nibo.

¹⁵Khulwekhuuba Wele n'abaloba nibo, shishamamo shaba busaale ni shiibala. Ne naanu umanya, oba Wele n'abafukiilisa nibo kane shimanyise shiina? Seshinyala shaaba shishiindu shishiindi ta, akhali khuulamukha khwe babaandu khukhwaama mu bafu.

¹⁶Umuundu n'abukula khu byaamo bikiboole waabiwaanayo nga bikhosefu isi Wele, aba nga uwaanileyo bibyaamo byoosi. Naluundi kuusina kwe kusaala ni kuba kukhosefu, ni kusaala kwoosi nakwo kuba kulayi.

¹⁷Umuundu anyala wafuniaaka tsisakya tsye kusaala kweesi balyakho bibyaamo warusakho, wesakho tsisakya tsye kusaala kwe muusiru busa, nio bari nanywe mukabane khu buyiindifu bwe kusaala kweesi balyakho bibyaamo?

¹⁸Munyala mwebuyila muri inywe mufuura tsisakya tsye kusaala tsye khubweene? Ne abe noola mwibuyila, shebulila muri s'ali inywe nibo mumutikiya shisina ta, ne akhali shisina nisho shishibatikiya inywe.

¹⁹Munyala mwaloma muri, “Baafuniaakakho tsisakya tsye khubweene nio akile ise nilekho.”

²⁰Ilala, isho shili sha ŋali. Ne baatsifuna batsirusakho khulwe khulekha khuba ni khufukiilila ta. Ne inywe mwemikhile mu shifwo shabwe khulwe khufukiilila khweenywe. Nashiryo mukhaba ni khukhwibuyila ta, ne ni mube ni khukhwisanamo lukoosi khukali.

²¹Ne oba nga Wele s'alekha khuuwa ba Isiraeli shitaambiso ta, nibo babaali nga tsisakya tsye khubweene, mwaambaasa muri alilekha khubawa inywe shitaambiso.

²²Ari ni mubone shiisa ni burafu bya Wele nga ni bili; okesanisa burafu isi abo babaakhola bibyoonako, ne wabokesanisa inywe shiisa, khukhwaama n'ashiili uwe shiisa isi inywe. Ne busa ta, nanywe akhaabakhalekho.

²³Ne akhaba Bayudaaya nabo singa baba ni khufukiilila, Wele alibakobosa mu shifwo sheesi baabamo makiboole. Khulwekhuuba Wele ali ni bunyala bwe khubakobosakho luundi.

²⁴Khulwekhuuba khulondekhana ni busaalikhana bwenywe, inywe Banaambo muli nga lusakya lulwaama khu kusaala kwe muusiru. Ne mwareebwa khu kusaala kweesi balyakho bibyaamo. Seshiba shaangu, naluundi she busaalikhana khukhwiisakho tsisakya tsisaalikhana tsinyene khu kusaala khweesi batsirema?

²⁵Bebuulebe, ingana mumanye bye shimoonyo shino. Khulwekhuuba kane shibayeete inywe mulekhe khukhwaambaasa nga ni muli bakyesi ta. Shimoonyo nisho shili indi: bumiinyi bwengiile mu luwaande lutweela lwe ba Isiraeli. Ne bumiinyi buno kane bubewo khukhwoolisa nga Banaambo boosi bamalile khukhwiitsa isi Wele.

²⁶Ne lwanyuma lwabo, ba Isiraeli babaramile nabo nio bawonesebwe. Nga bibyaronebwa bikhosefu ni biloma biri, “Umuwonesi aliitsa khukhwaama i Sayuuni. Niye ulileekela babetsukhulu ba Yakobo khurya Wele.

²⁷Iyino niyo iliba indakaano yase ni nabo nga naamalile khuurusawo bibyoonako byaabwe.”

²⁸Khu bye Kamakhuuwa Kamalayi, Bayudaaya bali baasiku isi Wele. Ne bali baasiku isi Wele khulweenywe Banaambo. Ne khu biwaamba khuuba barobole, Wele ashiikana ba Isiraeli; abakana khulwe bakuuka baabwe.

²⁹Khulwekhuuba nga Wele waamalile khurobola namwe nga Wele waweeleyo shiwaanwa, s'ashuusakho shishambaaso ta.

³⁰Shili nga abe khaale inywe Banaambo ni mwaminyaalila Wele, ne ari wabawaambila shiisa khulwe bumiinyi bwe Bayudaaya.

³¹Ni musaambo niyo ndweela, Bayudaaya ari bali bamiinyi isi Wele nio akile Wele mu khubawa inywe shiisa, nabo bafunilemo shiisa.

³²Khulwekhuuba Wele wakalusa babaandu boosi khuuba babowe aasi e bumiinyi, nio akile okesanise babaandu boosi shiisa.

³³Nga buyiindifu bwa Wele bwe kamaani! Nga Wele ali ni kamakyesi naluundi wamanya bibiindu bikali! Naanu unyala wamanya sheesi Wele atsya khukhalawo? Naanu unyala wamanya isaambo yeesi Wele araambamo kimilimo kyeewe?

³⁴Bibyaronebwa bikhosefu biloma biri, “Naanu unyala wamanya khukhwaambaasa khw'Omukasya? Namwe iliwo umuundu yeesi uwawakho Wele kamakyesi?

³⁵Namwe naanu uwawakho Wele shishiindu shoosi, ari manya nyaanga Wele ashimukobosele?”

³⁶Bibiindu byoosi bibiiliwo byaama isi Wele; naluundi byoosi biliwo khulweewe, nga bibyeewe. Shiriifwa shibe isi Wele biilo ni biilo. Amiina.