Read lumasaaba Baroma 12 Bible Online

Baroma 12 - lumasaaba bible

Baroma 12

¹Bebuulebe, khulwe shiisa sha Wele shikali isi ifwe khuli, imbekontselela ndi muwaaneyo kimibili kyeenywe isi Wele, kibe nga isaayilo iya ŋali inyene, naluundi ikhosefu iyakhila khuwaanayo isi Wele luundi imwikhoyesa. Khuno nikhwo khukhwisaaya khwenywe khwe mu mwoyo luundi khwa ŋali.

²Mukhebirisaka nga shiibala shino ni shikana ta. Ne ni mulekhe Wele abashuuse kimyoyo kyeenywe kikyele kimishaakha, nio munyalise khukhola bibiindu bilayi, bibyaakha khukholebwa, naluundi bikhosefu, ibyo byeesi Wele akana.

³Khulwe bubweela bweesi Wele aamba ise, imbaboolela inywe mweesi ndi buli mutweela khus'inywe akheyambaasakho khuuba niye uwe angaaki khufuura babaandi ta. Akhali buli mutweela ni eyambaasekho nga etsililisa, na buli mutweela khulondekhana ni bukali bwe khufukiilila bweesi Wele amuwa, nga ni khuli.

⁴Shili busa nga kumubili mutweela ni kulikho bisiintsa bikali, ne buli shisiintsa shikhola kumulimo kukwasho.

⁵Ni nafwe khuli busa khuryo. Akhaba nga khuli bakali, ne khuli kumubili mutweela mu Kristo. Buli mutweela ali uwe kumukaso isi uwashe.

⁶Biwaanwa byeefwe byeesi khwafuna khukhwaama isi Wele khulwe bubweela bweewe, bili bye tsisaambo tsitsikhali indweela ta. Noola shiwaanwa shoowo shili she buŋoosi, shiraambise nga khufukiilila khwoowo ni khukhuleekela.

⁷Noola shiili she bubwakaanisi, shiraambise mu khwakaanisa; namwe ne shiba she buleekeli, shiraambise mu khuleekela.

⁸Noola shili she khukaambila babaandi nga ubesamo kamaani, wakha khushiraambisa uryo. Noola shili she khuwaanayo isi abo babaakhali ni nabyo ta, waanayo nga siwibalilila ta. Uyo uuli ni shiwaanwa she khuwaambila babaandi shiisa, akhiile khuushikhola akhali khukhwiŋuluŋuunya ta.

⁹Khuukana khwaakha khuuba khwa ŋali khukhweene. Mukhekoomba khuukhola bibyoonako ta. Naluundi ni muwandalalile khu buli shiindu shishiili shilayi.

¹⁰Ni mukanane mwabeene bulayi nga be buulebe ni bashiile khukanana, nga buli mutweela ali ni kameelu ke khukhwisamo uwashe shiriifwa.

¹¹Raamba ni kamaani; mukhabamo butoro ta. Ni mwakaanise Umukasya nga muli basangaafu, khulw'Omwoyo.

¹²Lekha khukhwiyikina khweenywe khubareerere kumwikhoyo. Akhaba ni mubira mu bukosi, ni mube ni khukhwikhalilikha, naluundi ni mube nga muloomba busheele.

¹³Noola mutweela khu bakhosefu sibali ni shishiindu ta, ni mubawe khu byeesi muli ni nabyo, naluundi ni mube ni kimyoyo kimilayi, nga muli ni bubweela.

¹⁴Abo babaabakubyeenga inywe, ni mu baloombele ikhabi; ni mubaloombele, ne mukhabatsuba ta.

¹⁵Ni mwikhoyaatsakile atweela ni naabo babekhoya, naluundi mube mumutaambo atweela ni naabo babaali mu mutaambo.

¹⁶Ni mumenyatsake mu lukoosi ni babaandu boosi. Mukhabatsaka be shikili ta. Ni mukholakanile atweela ni bataambi. Mukheyambaasa khu mwabeene khuuba bakyesi ta.

¹⁷Nga umuundu wakhukholilekho buubi, ukhelihaasa ta, ne lekha buli muundu abone ari ukhola bilayi mu moni tsaabwe.

¹⁸Noola shinyalikha, khakakho nga ni munyala, khuumenya mu lukoosi ni babaandu boosi.

¹⁹Bakanwa baase, mukhakhakakho khukhwilihaasa ta. Ibyo ni mubilekhe mu makhono ka Wele. Khulwekhuuba bibyaronebwa bikhosefu biloma biri, “Umukasya aloma ari, khukhwilihaasa khuli khukhwase. Ise samweene niye ulilihaasa.”

²⁰Mu shifwo she khukhwilihaasa, noola umusiku woowo intsala imulya, n'umuwe she khulya. Noola ali bulesa, muwe she khuunywa. Khulwekhuuba iwe nga wakholile uryo, kamaŋaanyu kamuwaamba waba busa nga esi batsukhile kamaanda ke kumulilo khu murwe.

²¹Ukhafukiilila khukhola bibyoonako khwetsula mu bulamu bwoowo ta, ne akhali n'uwule bibyoonako nga ubirira mu khukhola bulayi.