Read lumasaaba Baroma 14 Bible Online

Baroma 14 - lumasaaba bible

Baroma 14

¹Umuundu uuli umutoro mu khufukiilila n'aba weetsile isi muli, ni mumwakaanile akhali khukhaandisana ni naye khu byeesi mwaambaasa ta.

²Babaandu balala banyala khuuba ni khufukiilila khubanyalisisa khuulya buli shishiindu shoosi. Ne umuundu umutoro anyala khuuba nga alya tsinyenyi tsimali tsonyene.

³Umuundu uulya buli shishiindu shoosi, akhalekelesa uyo ukhalya bibiindu bilala ta. Ni nooyo naye ukhalya bibiindu bilala ta, akhalekelesa uyo ulya buli shishiindu ta. Khulwekhuuba Wele umweene wamala khaale khubafukiilisa.

⁴Ne iwe niye naanu ukhalila umwakaanisi wabeene kumusaango? Umukoosi weewe niye ukane akhalewo, oba umwakaanisi ali umutuufu mu byeesi akhola namwe ta. Ne umwakaanisi uyo singane akhaasikhane ta, khulwekhuuba Umukoosi ali ni bunyala bwe khuumuyeeta khuurura mu byoonako byeewe.

⁵Umuundu umulala ambaasa ari bifukhu bilala bili bye shiriifwa khuuminyisakho bibiindi. Ne ukuundi waambaasa ari bifukhu byoosi bilekhaana. Buli muundu shaakha amanyile ilala sheesi ambaasa.

⁶Uyo uyila bifukhu bilala khuuba bikhulu, akhola shino khulw'Omukasya. Ni n'oyo ulya, alya nga esamo Umukasya shiriifwa. Khulwekhuuba aba aasiima Umukasya khulwe biilyo. Akhaba uyo ukhalya bibiindu bilala ta, alekha khubilya khulwe khukhwisamo Umukasya shiriifwa, naluundi aba aasiima Wele.

⁷Imbaawo na mutweela khusi ifwe uba umulamu khulweewe yenyene ta, namwe ufwa khulweewe yenyene ta.

⁸Noola khuba balamu, khuba balamu nga b'Omukasya. Noola khufwa, khufwa nga b'Omukasya. Nashiryo, oba khuli balamu, namwe oba khufwa, khuli b'Omukasya.

⁹Khulwekhuuba Kristo afwa, lwanyuma walamukha khukhwaama mu bafu, nio abe Umukasya uwe baafu ni balamu.

¹⁰Khulwashiina ukhalila umufukiilisi uwashoowo kumusaango? Namwe khulwashiina kila ulekelesa uwashoowo? Khulwekhuuba fweesi khukheeme mu moni tse shitsoloŋo sha Wele she khukhalilakho kimisaango.

¹¹Nga bibyaronebwa bikhosefu ni biloma biri, “Umukasya aloma ari, khukhwaama nga ni indi Wele umulamu, buli lisikamo kane lifukhamile ise, na buli lulimi lulimbuyila ise.”

¹²Nashiryo buli mutweela khusi ifwe umweene aliikanikhakho isi Wele.

¹³Ari lekha buli mutweela akamise khuukhalila uwasheewe kumusaango. Ne akhali ndi lekha buli mutweela akhalewo khuulekha khuratsakawo she khuuseya uwashe ta, namwe khuulekha khurawo kumureko kukuukila waakhola bibyoonako ta.

¹⁴Ise naashimanya naluundi imandalasila ilala, khuubirira mu Mukasya Yesu ndi, imbaawo she khulya shishiili she kumusilo khu bwasho busa ta. Khurusakho shiba she kumusilo isi uyo uwaambaasa ari shili she kumusilo.

¹⁵Ne noola sheesi iwe ulya shireerera umufukiilisi uwashoowo khumurunyisa, iwe ushikholile uba s'uli ni khuukana ta. Ukhakila sheesi iwe ulya shonakisa umuundu ta, khulwekhuuba Kristo afwilila umuundu uyo.

¹⁶Ukhakila shishiindu shishiili shilayi shalaangibwa khuuba shiibi ta.

¹⁷Khulwekhuuba Buyiinga bwa Wele si buwaamba busa khu bye khuulya ni bye khuunywa ta. Akhali bumanyisa bukwalaafu, ni lukoosi ni kumwikhoyo kweesi Mwoyo Umukhosefu areera.

¹⁸Umuundu uwakaanisa Kristo musaambo indayi yino, Wele amwikhoyela, naluundi ni babaandu bamusiima.

¹⁹Nashiryo lekha khulondelele ibyo bibiireera lukoosi, naluundi bibiiyeeta buli mutweela khukhwikyela umuundu umulayi.

²⁰Biilyo byonyene bikhakila wonakisa buraambi bwa Wele ta. Biilyo byoosi bili bilayi, ne shiba shiibi iwe khukila umuundu wakhola shishonako, khulwekhubeela iwe byeesi ulya.

²¹Se shiba shilayi iwe khuulya inyama, namwe wanywa iviini, namwe wakhola shishiindu shoosi shishikila umufukiilisi uwashoowo wakwa mu byoonako ta.

²²Khuufukiilila khwoowo khweesi uli ni nakhwo khu biindu bino, khuliindile akari owo ni Wele. Nga bali ni khabi abo babamanya bari sibalikho ni kumusaango kwoosi ta, singa baba bakhalilewo khukhola shishiindu shilayi.

²³Ne uyo yeesi ulya shishiindu nga ekanakana, Wele ali mukhalila kumusaango, khulwekhuuba aba s'alikho akhola shino nga alondelela bye khufukiilila ta. Khulwekhuuba buli shoosi shishikhaama mu khufukiilila ta, shiba shishonako.