Read lumasaaba Baroma 15 Bible Online

Baroma 15 - lumasaaba bible

Baroma 15

¹Ifwe babaali ni khuufukiilila khukhumala khwakhiile khuuyeeta abo babaashiili batoro mu khufukiilila khwaabwe, mu shifwo she khuuwosiina nga khubatsekhelela.

²Lekha buli mutweela khus'ifwe ekhoyese uwashe khuubirira mu bilayi byeesi khukhola, nio akile amwombakhe mu khufukiilila khweewe.

³Khulwekhuuba Kristo s'eyikhoyesa umweene ta, ne akhola nga ni sharonebwa shiri, “Tsikhomo tseesi bakhukhoma iwe, tsakwa khus'ise.”

⁴Khulwekhuuba buli shisharonebwa khaale, sharonebwa khulwe khuukhuleekela ifwe. Ari nio bibyaronebwa bikhosefu bikhureere ifwe khuba ni khukhwiyikina khuubirira mu khwikhalilikha ni khukhwisibwamo kamaani.

⁵Lekha Wele ukhuwa ifwe khukhwikhalilikha naluundi ukhwisamo ifwe kamaani, abawe inywe khukholakanila atweela, nga mulondelela Kristo Yesu, nga niye she khubonelakho.

⁶Nio inywe mweesi atweela, nga likono litweela mubuyile Wele, naluundi niye uli Paapa w'Omukasya weefwe, Yesu Kristo.

⁷Buli mutweela ni ekhoyele uwashe, khulwe khuuwa Wele shiriifwa, nga Kristo n'amala khubekhoyela inywe.

⁸Khulwekhuuba imbaboolela inywe ndi ni Kristo ekyela umwakaanisi isi Bayudaaya ari nio okesanise bwa ŋali bwa Wele, ari nio awandalase byeesi Wele aloma nga abirira mu bakuuka beefwe.

⁹Naluundi ari nio be kamanaambo babuyile Wele khulwe shiisa sheewe. Nga bibyaronebwa bikhosefu ni biloma biri, “Nashiryo kane ikhuyile iwe nga ndi akari mu manaambo. Kane niimbe nga imbuyila lisiina lyoowo.”

¹⁰Naluundi sharonebwa shiri, “Banaambo ni mwikhoyele atweela ni babaandu ba Wele.”

¹¹Mu shifwo shishiindi bibyaronebwa biloma biri, “Inywe be Kamanaambo kakakhali ke ba Isiraeli ta, mweesi ni mubuyile Umukasya; inywe babaandu boosi ni mumubuyile.”

¹²Naluundi Yisaaya eloosela khuloma ari, “Umwitsukhulu uwa Yese aliitsa, atsowesebwe khuuba umuwuli uwe kamanaambo, ni Banaambo balira khukhwiyikina khwaabwe mu niye.”

¹³Khali Wele umweene uwe khukhwiyikina abetsusile inywe ni kumwikhoyo, ni lukoosi mu khufukiilila khwenywe, nio manya khulwe kamaani k'Omwoyo Umukhosefu mwiloosele khuuba ni khukhwiyikina.

¹⁴Bebuulebe, ise samweene ishihandalasa ndi inywe mwabeene mwetsuule buulayi, ni khumanya, naluundi namanyile ndi mwabeene khu mwabeene buli mutweela anyala khuleekela uwashe.

¹⁵Ne khu bilomo bitweela naabaronele ni bunyindaalifu mu saambo iye khubashebusa, khulwe bubweela bweesi Wele amba ise.

¹⁶Amba ise khuuba umwakaanisi wa Kristo Yesu isi Banaambo, mu khuboolela Kamakhuuwa Kamalayi ka Wele, nga umusaayi. Shino ise ishikhola nio akile Banaambo babe shiwaanwa sheesi Wele asiima, nga Umwoyo Umukhosefu abarobola khuuba ba Wele.

¹⁷Nashiryo indi ni shishikila nebuyila samweene khulwe buraambi bwase bweesi ikholela Wele, nga ndi atweela ni Kristo Yesu.

¹⁸Kane imbe umunyindalifu inganikhe khwibyo byonyene byeesi Kristo amalile khukhola khuubirira mus'iise, nga nikhwo khuraangilila Banaambo banyalisa khulondelela Wele. Ibyo Kristo wabikholile nga abirira mu byeesi ise ikholile ni byeesi ise inomile,

¹⁹nga araambisa kamaani ke bibibonekha ni bye kamakaanga, ni khulwe kamaani k'Omwoyo Umukhosefu. Shishikila khukhwaama i Yerusalemu, ni khukhwibotokhelela ilala mu Ilikumu, naboolela Kamakhuuwa Kamalayi kakawaamba khu Kristo.

²⁰Shitsilililwa shase busheele shaba she khulaangilila kamakhuuwa kamalayi, mu bifwo mweesi bashiili khumanya Kristo ta. Khulwekhuuba ise nakana khunanikha mu shifwo sheesi ukuundi ashiili khunanikha ta.

²¹Ne akhali ndi ise ikhola nga ni sharonebwa shiri, “Abo babaashiili khuwulila khu biwaamba khu Kristo ta, bali mubona, ni naabo babaashiili khuwulila khu bimuwaambakho ta, balimanya.”

²²Ni khulwe ilomo yino, kimiluundi kimikali shayishinjilila ise khukhwiitsa isi muli.

²³Ne ari khukhwaama nga ni malile buraambi bwase mu bisiintsa bino, naluundi khukhwaama nga abe namalile kimiiko mikali nga nikoomba khukhwiitsa khu babona,

²⁴ari nambaasa khubabona nga ndi khu lukyeendo lwase, nga intsya i Sipeyini. Namanyile ndi lwanyuma lwe khuuba ni nanywe khafwiiti, kane munjeete nio niloosele mu lukyeendo lwase.

²⁵Ne ari indikho intsya i Yerusalemu, nga nakaanisa buyeeti isi bakhosefu ba Wele.

²⁶Khulwekhuuba babaandu be Masedoniya ni be Akaya baboone bari shili shilayi khubukula khu biindu byaabwe bayeete batweela khu bakhosefu ba Wele babaali mu Yerusalemu babaali bataambi.

²⁷Nibo babeene babaakhalawo khukhola baryo. Ne nga washimenielesile, bali ni likatala lye khuyeeta babaandu be Yerusalemu. Khukhwaama nga ari bali shitweela ni Banaambo mu khukabanana tsikhabi tse mu mwoyo khukhwaama isi Wele, nabo shandyashiile babakabilekho tsikhabi tsye bibiindu byeesi bali ni nabyo.

²⁸Nashiryo nindiba nga namalile shino, naluundi nga namalile khubakaanisa byeesi babaabuusanisiile, indibirira isi inywe muli nga intsya i Sipeyini.

²⁹Ne namanyile ndi nga niitsa isi muli, indibareereera tsikhabi tsya Kristo mu bwitsufu.

³⁰Indikho mbaloomba inywe be buulebe, indi khulw'Omukasya weefwe Yesu Kristo, ni khuukana khweesi Umwoyo areera, mukhakekho naabi muntsitubaasekho munoombele ise isi Wele.

³¹Ise ingana munoombele indi ni babaakhafukiilila mu Wele ta be mu Yuda balekhe khukhuntsolisakho ise bukosi bwoosi ta. Naluundi ndi nio bakhosefu ba Wele be Yerusalemu bafukiilise buraambi bwase.

³²Noola abe Wele wakanile, shino shikile niitse isi muli nga ndi ni kumwikhoyo. Naluundi ndi nio mu khubakyeniyila inywe, nase ifune kamaani.

³³Lukoosi lulwaama isi Wele lube ni nanywe mweesi. Amiina.