Read lumasaaba Baroma 16 Bible Online

Baroma 16 - lumasaaba bible

Baroma 16

¹Naasiindikhile umukooko weefwe Foebe, uuli umwakaanisi mu baandu ba Wele, i Kengeliya, khukhwiitsa isi muli.

²Ni mumwakaanile mu lisiina ly'Omukasya, nga bakhosefu ba Wele ni bashiile khuukhola. Ni mumuwe buyeeti bwoosi bweesi kane ekoombe khukhwaama isi muli, khulwekhuuba abeele umuyeeti isi babaandu bakali, ni isi ise samweene.

³Ni mulome Pulisikila ni Akula, babaali baraambi bashaase mu Kristo Yesu, muli naabasheesele.

⁴Khulwase samweene ni khulwe Banaambo babaali bafukiilisi, isiima naabi Pulisikila ni Akula, khulwe khuwaanayo buulamu bwaabwe, khulweefwe.

⁵Naluundi ni musheesele bafukiilisi babaabuusanila mu ntsu iye babili abo. Musheesele umukanwa wase Epaeneto. Niye ali mutweela khu baandu babaali mu Asiya, uwanyoowa khushuukha wekyela umufukiilisi mu Kristo.

⁶Ni musheesele Malyamu, uraamba ni kamaani mus'iinywe.

⁷Musheesele balebe baase Anduroniko ni Yuniya. Nibo babaaba mu lipuusu atweela ni nase. Baamanyikhana naabi mu baarume naluundi nibo babanyoowa khuuba bakristo nga ise ishiili khushuukha ta.

⁸Musheesele Ambilato, umukanwa wase khulw'Omukasya.

⁹Musheesele Alubano, umuraambi uwashaase mu bwakaanisi bwa Kristo, n'umukanwa wase Sitakisi.

¹⁰Musheesele Apelesi, uli umwilama naabi mu khufukiilila mu Kristo. Ni musheesele ni naabo boosi be mu ntsu iya Alisitobulo.

¹¹Ni musheesele umulebe wase, Helodioni. Musheese ni naabo boosi be mu ntsu iya Nakisosi babaali ni khufukiilila mu Mukasya.

¹²Musheese Tulifena ni Tolofosa, babaraambila Umukasya. Musheesele n'umukanwa wase Pelesisi, naye uraamba naabi khulw'Omukasya.

¹³Musheesele Rufusi, umanyikhanile naabi nga umwakaanisi w'Omukasya, musheesele ni maayi weewe, uyo uuli busa nga maayi wase.

¹⁴Musheesele Asingilito, Fulegoni, Herimesi, Patobasi, Heremasi, ni be buulebe boosi beesi bamenya ni nabo.

¹⁵Ni musheesele Filologasi, Yuliya, Neresi atweela n'umukooko weewe. Isheesele Olimbasi ni bakhosefu boosi beesi ali ni nabo.

¹⁶Ni musheesane nga buli mutweela akwa uwashe mu shifuba khukhosefu. Kamatuuli koosi kakafukiilila mu Kristo kabasindikhiile kimilembe.

¹⁷Bebuulebe, imbakhupilisa ndi mwitsililise naabi babaandu babareera buwaangafu ni khukhwawukhanamo. Ni mwihalabe babaandu babaakhaandisa khuleekela khweesi inywe mwamala khukhwiyika.

¹⁸Khulwekhuuba babaandu babafwaana baryo sibaraambilila Kristo ta, ne akhali baraambilila kameelu kaabwe babeene. Baraambisa tsilomo tsaabwe tsitsikhongelesa, khuwombesa kimyoyo kyaabo babaashiili batoro mu khufukiilila.

¹⁹Buli muundu wamanya nga inywe ni muli babaandu babaloondelela kamakhuuwa kamalayi. Ni nase indi ni kumwikhoyo khulwe lomo yino. Ingana mwiloosele khuuba bakyesi mu khukhola bibiindu bilayi. Ni mulekhe khukhwihaambila mu khukhola bibyoonako ta,

²⁰nio Wele nga niye isebele iye lukoosi, khaangu akho, asibiilisile Sitaani aasi, e bikele byeenywe. Bubweela bw'Omukasya weefwe Yesu Kristo bube ni nanywe.

²¹Timosewo umuraambi washaase wabasheesele. Akhaba ni balebe baase Lusiyo, ni Yasoni, ni Sosipateli, nabo babasheesele.

²²Ise Telutisi, umuroni uwe baluwa yino, nabasheesele mu lisiina ly'Omukasya.

²³Gayo naye washeesele. Ise imenya mu ntsu mweewe, naluundi mubweene umwo nimwo mweesi lituuli lye bafukiilisi lisaayila. Erasto, nga niye umubiikhi uwe mu shiriimba, naye wabasheesele. Akhaba Kwalito wandaayefwe, naye wabasheesele.

²⁴Bubweela bw'Omukasya weefwe Yesu Kristo bube ni nanywe mweesi. Amiina.

²⁵Ari lekha khuwe Wele shiriifwa. Khulwekhuuba niye unyala khubayeeta inywe nga abakumisila mu khufukiilila khwenywe, khulondekhana ni kamakhuuwa kamalayi, kakawaamba khu Yesu Kristo keesi ise nabaleekela. Naluundi niye unyala khubawandalasila mu khubiimbulilwa khwe shimoonyo sha ŋali abe shishabisibwa khumala kimiiko kimikali.

²⁶Ne ari bwa ŋali buno bwakangululibwa khukhwaama mu shimoonyo sheesi bwabamo, bwarusibwa ibulafu. Ni khuubirira mu byaronebwa bikhosefu bye ba baŋoosi, kamanaambo koosi kamanya bwa ŋali buno, nio akile babaandu boosi baloondelele Wele uwe biilo ni biilo, nga babirira mu khufukiilila.

²⁷Shiriifwa shibe isi Wele niye uwe kamakyesi koosi biilo ni biilo, khuubirira mu Yesu Kristo. Amiina.