Read lumasaaba Baroma 3 Bible Online

Baroma 3 - lumasaaba bible

Baroma 3

¹Bayudaaya bafuurira shiina abo babaakhali Bayudaaya? Namwe lisuno shiina liliili mu khwinjila imbalu?

²Mulimo bibiindu bikali mu saambo tsoosi. Khunyoowa, Wele eyikina Bayudaaya kila abawaambisa buurume bweewe.

³Ne singa shinyoolikhana shili batweela khu Bayudaaya sibali ni khufukiilila ta? Shino shinyala shareerera Wele khulekha khuba umwiyikinwa ta?

⁴Seshinyalikha taawe. Wele ali ni khuuba uwa ŋali, abe ikhaba nga buli muundu akhaba umubeeyi. Nga shisharonebwa ni shiloma shiri, “Uli ni khukhwokesana uri uli umukwalaafu khuubirira mu lomo tsoowo; naluundi uli ni khufuura kumusaango kwoowo nga balikho bakhuwotsesa.”

⁵Ne siinga bubwoonaki bweefwe buraambisibwa khukhwokesanila ilala bulayi bubweene khuri Wele ali umukwalaafu, isho shinyala shaakila ifwe khwaloma khuri Wele s'aali umwiyikinwa ta nga wakhukhaliile ifwe kumusaango? Ari ano indikho inoma nga babaandu babusheele ni baloma.

⁶Seshinyalikha taawe. Noola Wele s'ali umukwalaafu ta, anyala aryeena khukhalila shiibala kumusaango?

⁷Ne noola ise khuuba umubeeyi khukila bwa ŋali Wele bwokesanisibwa bulayi bubweene, khulwashiina ndi luundi ise nikiitsibwa khuuba umwonaki?

⁸Khulwashiina kila khukhaloma khuri, “Khakhukhole buubi nio akile buulayi bwa Wele bubonekhe?” Babaandu baalala baakhukhomyaasa ifwe bari khuloma khuryo. Babeene abo balikiitsibwa, nga ni shaakhiile khuuba.

⁹Ari ifwe Bayudaaya khulome khuri khuli bulayi khufuura babaandu babaakhali Bayudaaya ta? Nakhafwiiti khari ta! Khulwekhuuba naamalile khaale khukhwokesanisa ndi babaandu boosi, nga mulimo Bayudaaya ni Banaambo boosi, bali aasi e kamaani ke bibyoonako.

¹⁰Nga bibyaronebwa ni biloma biri, “Imbaawo umuundu na mutweela uli umukhosefu ta, imbaawo na mutweela ta;

¹¹imbaawo na mutweela uli umukyesi ta. Naluundi imbaawo na mutweela uwisaaya Wele ta.

¹²Boosi bashuukha barura isi Wele; boosi bayonaka. Imbaawo na mutweela ukhola bulayi ta; imbaawo akhaba na mutweela ta.

¹³Kimimilo kyaabwe kili busa nga tsiŋani tsitsiili khwaashe. Baraambisa tsinganikha tsaabwe khuuwombesa, ni tsilomo tsitsaama mukhanwa mwaabwe tsili nga butsiba bwe indemu.

¹⁴Tsilomo tsaabwe tsaayitsula bitsubo ni lirima.

¹⁵Seshibayilila imbuka ingali khukhwiira umuundu ta.

¹⁶Buli andu osi eesi batsya balekha kumutaambo ni khukhwonakisa bibiindu.

¹⁷Bashiili khumanya kumukhoosi kukureera lukoosi ta.

¹⁸Mu myoyo kyaabwe imbaamo nakhari khuurya Wele ta.”

¹⁹Ari khwaamanyile khuri shoosi shishiili mu makaambila, shiwaamba khu baandu abo babawulibwa ni kamakaambila, nio akile alekhe khubawo uyo uwihaambilisa shishiindu shoosi ta. Ne Wele akhalile shiibala shoosi kumusaango.

²⁰Khulwekhuuba imbaawo umuundu yeesi ulibalibwa ari ali umukhosefu mu moni tsa Wele, khulwe khukhola byeesi kamakaambila kaloma ta. Sheesi kamakaambila kakhola, nikhwo khukhumanyisa ifwe bubwoonaki nga ni buli.

²¹Ne ari bukhosefu bwa Wele bwayokesanisibwa musaambo ikiindi, akhali khuubirira mu makaambila ta. Akhaba nga kamakaambila ni baŋoosi bawayo bujulisi khu shiindu shino,

²²ne bukhosefu bwa Wele bunyolikhanila mu khufukiilila mu Yesu Kristo. Wele akhola shino isi abo boosi babafukiilila mu Kristo akhali khuromboola ta.

²³Khulwekhuuba babaandu boosi bayonaka, naluundi sibashiile ni khufuna shiriifwa shishaama isi Wele ta.

²⁴Babaandu boosi bakwalaasibwa ni shiwaanwa she bubweela bwa Wele, khuubirira mu buwonesi, nga nibwo buli mu Kristo Yesu.

²⁵Uyo niye isi Wele arumana ari bare khufukiilila mu niye, nio asikule babaandu nga araambisa kamafuki keewe. Shino shakholekha khukhwokesanisa bukhosefu bwa Wele. Khulwekhuuba khaale, lwe khukhwikhaliilikha khweewe, Wele abe siwayinaanayo khu byoonako bye babaandu ta.

²⁶Ne mu mbuka iye aluno ari, shili she khuwandalasa khuri Wele umweene ali umukhosefu, naluundi abo boosi babaali ni khuufukiilila mu Kristo, Wele abekyesa bakhosefu.

²⁷Ari khukhwibuyila khweefwe khuli waheena? Imbaawo ta! Khukhwibuyila khweefwe khwiima khu lomo shiina? Khwibuyila khulwe kamakaambila? Taawe. Khwibuyila khulwe khufukiilila.

²⁸Khulwekhuuba khwawandalasa khuri umuundu ekyela umukwalaafu khulwe khufukiilila, ne shili khulwe khukhola byeesi kamakaambila kaloma ta.

²⁹Namwe khulome khuri Wele ali Wele uwe Bayudaaya bonyene? Wele s'ali uwe Banaambo nabo ta? Ilala, Wele ali uwaboosi.

³⁰Khulwekhuuba Wele ali mutweela. Naluundi alishuusa Bayudaaya bekyele Bakwalaafu nga emikha khukhufukiilila khwaabwe. Ni Banaambo nabo alibashuusa bekyele bakwalaafu nga emikha khu khufukiilila khwaabwe.

³¹Ari khulome khuri shino shimanyisa shiri khulwe khufukiilila khuno, kamakaambila khukarusawo? Seshinyalikha ta. Akhali khuli ni khuukakumisila ilala.