Read lumasaaba Baroma 4 Bible Online

Baroma 4 - lumasaaba bible

Baroma 4

¹Ne ari kane khulome khuri shiina khu Iburayimu, kuuka weefwe mu khusaalikhana khwe babaandu?

²Noola Iburayimu ayilibwa khuuba umukwalaafu khulwe byo byeesi akhola, aba ali ni shishikila webuyila. Ne s'anyala khukhwibuyila busa mu moni tsa Wele ta.

³Bibyaronebwa bikhosefu biloma biryeena? Sibiloma biri, “Iburayimu aafukiilila mu Wele, nio khulwe khuufukiilila khweewe mu Wele, waabalibwa khuuba umukwalaafu.”

⁴Umuundu yeesi n'aba nga waamalile buraambi, kumukheemba kweewe sikubalibwa nga shiwaanwa ta. Kubalibwa nga isho shishimwaakhila khulwe buraambi bweewe.

⁵Ne umuundu yeesi ufukiilila mu Wele uyo uwiyakhila abo babaali ni bibyoonako, walekha khukhwiyikina buraambi bweewe ta, khuba khufukiilila khw'omuundu uyo nikhwo khweesi Wele emakho nio wabala umuundu uyo khuuba umukhosefu.

⁶Akhaba Dawudi naye afukiilisana n'umuundu yeesi isi Wele abona ari ali umukwalaafu, khulwe khufukiilila ne akhali khulwe buraambi bweewe nio aweebwe tsikhabi ta. Khulwekhuuba aloma ari,

⁷“Bali ni tsikhabi abo beesi beyakhila bibyoonako byaabwe, abo beesi Wele arusawo bibyoonako byaabwe.

⁸Nga ali ni ikhabi uyo isi Umukasya alibala nga ukhali ni bibyoonako ta.”

⁹Ne ikhabi iyo yabiitibwa khu ba Isiraeli bonyene, namwe ni khu banaambo nabo? Khulwekhuuba ifwe khuloma khuri, khufukiilila khwa Iburayimu nikhwo khukhwakila niye wabaliwa nga umukwalaafu.

¹⁰Shino sheetsa shiryeena nio Iburayimu abaliwe aryo? Nga ashiili khukhwinjila imbalu ta, namwe nga wamala khukhwinjila imbalu? Shino sishaba nga wamala khukhwinjila imbalu ta, akhali nga ashiili khukhwinjila imbalu ta.

¹¹Enjila imbalu lwanyuma lwayo, nga khabonelo namwe nga shishiŋaŋasa bukwalaafu bweesi aba ni nabwo, khulwe khufukiilila khweesi aba ni nakhwo nga ashiili umusiinde. Shitsilililwa shaba nisho khumushuusa niye khumwikesa umukuuka uw'abo boosi babafukiilila, akhaba nga bali basiinde, ne nga babalibwa khuuba ni bukwalaafu.

¹²Naluundi shitweela busa abe umukuuka uw'abo babenjila imbalu. S'ali khulwe khukhwinjila bwingili imbalu ta, ne nga bali babaloondelela mu khufukiilila khweesi umukuuka weefwe Iburayimu aba ni nakhwo, nga ashiili khukhwinjila imbalu ta.

¹³Wele n'alomela Iburayimu ni babetsukhulu beewe ari alimulaamila shiibala shoosi khuuba shisheewe, s'aloma shino khulwekhuuba bari Iburayimu atsiila khu makaambila ta. Ne khulwekhuuba Iburayimu afukiilila mu Wele. Wakila Wele wamubala khuuba umukwalaafu.

¹⁴Ni shiba bari sheesi Wele asuubisa shiweebwa abo babaloondelela kamakaambila, shimanyisa shiri aba khufukiilila sikhulimo itsamu yoosi ta. Naluundi khusuubisa khweesi Wele akhola nakhwo khuba nga mbaamo shishiindu shoosi ta.

¹⁵Khulwekhuuba kamakaambila kareera lirima lya Wele. Ne akhaliwo likaambila ta, s'abawo khufuniaaka likaambila lyoosi ta.

¹⁶Shino nisho shishikila khusuubisa khweesi Wele akhola khweemikha khu khufukiilila. Nio khusuubisa khweesi Wele akhola isi babetsukhulu ba Iburayimu khube nga khweemikhile khu bweela bweewe, ne akhali isi abo babaloondelela kamakaambila ta. Ne shino seshikholikha isi abo babaloondelela kamakaambila bonyene ta, ne ni isi abo boosi babafukiilila nga Iburayimu n'afukiilila, khulwekhuuba niye ali umukuuka uweefwe fweesi.

¹⁷Nga shisharonebwa ni shiloma shiri, “Naakhukalusile iwe khuuba umukuuka uwe kamanaambo kamakali.” Nashiryo khusuubisa ukhwo khuli khulayi mu moni tsya Wele, isi Iburayimu afukiilisamo. Wele uyo niye ulamusa baafu, naluundi niye ukila bibiindu abe bibikhaliwo ta, byabawo.

¹⁸Iburayimu aaba ni khufukiilila naluundi waba ni khukhwiyikina, shaakila wekyela umukuuka uwe kamanaambo kamakali. Nga shisharonebwa ni shiloma shiri, “Babetsukhulu boowo nabo baliba bakali.”

¹⁹Ne Iburayimu abe uwolesa kimiiko kye bukhulu ambi shitoondo shitweela, s'aba ni butoro mu khufukiilila khweewe ta, akhaba nga kumubili kweewe abe kwaweelemo kamaani. Namwe s'ambaasakho ari Sara anyala khumusaalila umwaana ta.

²⁰Ne khufukiilila khweewe sikhwamuwamo ta, namwe s'ekanakana sheesi Wele amulomela ta. Akhali eloosela khutsowa mu khufukiilila khweewe, nga abuyila Wele,

²¹nga amanya bulayi busa ari, Wele akhaakhole isho sheesi amulomela.

²²Khufukiilila khweewe nikhwo khukhwakila Wele wamubala khuuba umukwalaafu.

²³Ne bilomo bibiiloma biri, “Alibaliwa nga umukwalaafu,” sibyaronebwa khulwekhubeela niye yenyene ta.

²⁴Byaronebwa khulweefwe nafwe, babaalifukiilisibwa nga bakwalaafu, khulwekhuuba khufukiilila mu Wele, uwalamusa Yesu Kristo Umukasya weefwe, khukhwaama mu bafu.

²⁵Kristo uyo bamwiira khulwe bibyoonako byeefwe, ne lwanyuma Wele wamulamusa khukhwaama mu bafu, ari nio akile khube bakwalaafu isi Wele.