Read lumasaaba Baroma 6 Bible Online

Baroma 6 - lumasaaba bible

Baroma 6

¹Ne ari kane khulome khuryeena? Khulome khuri khwiloosele khuukhola bye bubwoonaki nio bubweela bwa Wele bwiloosele?

²Taawe. Shinyalikha shiryeena ifwe babekaana bibyoonako khukhwiloosela khuumenya mu byoonako?

³Simumanya muri ifwe fweesi khukhwabatisibwa mu Kristo Yesu, khwabatisibwa mu khufwa khweewe ta?

⁴Nashiryo mu khubatisibwa khweefwe khwasiikhibwa atweela ni naye mu khufwa khweewe, nio akile ari nga Kristo n'alamusibwa khukhwaama mu bafu khuubirira mu shiriifwa sha Paapa, ni nafwe khuryo khunyalise khukyendela mu bulamu bushaakha.

⁵Ne ni khuba nga khwatubaasibwa ni Kristo mu khufwa khukhuuli nga khukhweewe, aba luundi khuryo khulitubaasibwa mu khulamukha nga khukhweewe.

⁶Khulwekhuuba khwaamanya khuri isaambo isi khwabamo khaale yatsaangiliwa khu musalaba ni Kristo. Nio akile kumubili kumwoonaki kuwewo, naluundi nio khulekhe khuuba babakaanisi isi bibyoonako ta.

⁷Khulwekhuuba umuundu n'afwa aba wawonisibwile khukhwaama mu maani ke khukhola bye bubwoonaki.

⁸Ne ni khuba nga khwafiile ni Kristo, khufukiilila khuri khulimenya ni naye.

⁹Khwaashimanya khuri Kristo n'amala khuulamusibwa khukhwaama mu bafu, s'alifwa luundi ta. Khuufwa sikhumulikho ni kamaani koosi ta.

¹⁰Khuufwa khweesi Kristo aafwa, aafwa musaambo iye bibyoonako, kumuluundi mutweela kwonyene. Ne buulamu bweesi amenya, abumenya mu Wele.

¹¹Nashiryo ni nanywe mweesi shandyashiile mwiyambaase mwabeene khuuba baafu isi bibyoonako, ne nga muli balamu isi Wele, khuubirira mu Kristo Yesu.

¹²Nashiryo mukhafukiilisa bibyoonako byaaba ni bunyala mu bulamu bweenywe, khuubakhonjelesa mulondelele byeesi kimibili kyeenywe kikoomba ta.

¹³Namwe mukhawanatsakayo bisiintsa bye kimibili kyeenywe khuuraambisibwa khulwe bubwoonaki ta. Ne ni mwiwaaneyo mwabeene nga babaandu beesi bakobosa mu bulamu khukhwaama mu bafu. Naluundi muwaaneyo kimibili kyeenywe isi Wele kiraambisibwe khulwe bukwalaafu.

¹⁴Khukhwaama nga ni mukhayilibwa ni kamakaambila ta, ne mwaba nga muyilibwa ni bubweela bwa Wele, bibyoonako sibibalikho ni bunyala ta.

¹⁵Ari khulome khuryeena? Khulome khuri lwekhuuba khuli aasi e bubweela bwa Wele, ne akhuba aasi e kamakaambila ta, nashiryo khwiloosele khukhola bibyoonako? Seshinyalikha ta.

¹⁶Ne simumanya muri ni muba mwewanileyo mwabeene isi umuundu khuuba bakulwa beewe babamuwulila, muba muli bakulwa bomweene uyo isi muba muwulila ta? Nashiryo muba bakulwa oba be bibyoonako bibireera khufwa, namwe bakulwa babawulila, shishireera bukwalaafu.

¹⁷Ne Wele asiimibwe! Khulwekhuuba inywe mumwabakho bakulwa be bibyoonako, ari mwekyelile babamurekeeresa, khukhwamila ilala nga mushiili munda, mu myoyo kyeenywe, bya ŋali bibiili mu khuleekela khweesi mwaweebwa.

¹⁸Ne khukhwaama ni mwalekhuulibwa khukhwaama mu byoonako, mwekyelile bakulwa be bukwalaafu.

¹⁹Indikho inganikha mu saambo iye babaandu babusheele, khulwe butoro bwenywe bubuuli busaalikhana. Khulwekhuuba nga lutweela ni mwawaanayo bisiintsa byeenywe khuukhola bye bunyaalu, ni mu khwoonaka khuubiririfu, ni aluno ari mwaakha muwaaneyo bisiintsa byeenywe isi bukwalaafu khu lwe bikholwa bikhosefu.

²⁰Ne ni mwaba bakulwa be bibyoonako, mwaba nga simwinaanayo isi bukwalaafu ta.

²¹Ne mafuurisa shiina keesi mwafuna khukhwaama mu biindu ibyo ari biibi bibiwaambisa kamaŋaanyu? Intsakamilo iye bibiindu ibyo nikhwo khuufwa.

²²Ari ni mwalekhuulibwa khukhwaama mu byoonako naluundi mwekyela bakulwa isi Wele, kamafuurisa keesi mwafuna nibwo bulamu bubuwaanibwilayo ilala isi niye. N'ibwakamilo wayo, nibwo bulamu bubukhawawo ta.

²³Khulwekhuuba kumusheemba kwe bibyoonako nikwo khuufwa. Ne shiwaanwa sha busa sheesi Wele akhuwa nisho buulamu bubukhawawo ta, nga akhuwa buulamu buno khuubirira mu Kristo Yesu, Umukasya weefwe.