Read lumasaaba Baroma 9 Bible Online

Baroma 9 - lumasaaba bible

Baroma 9

¹Mu lisiina lya Kristo, indikho inoma bya ŋali. S'indi khuukanikha bye bubeeyi ta. Kumwoyo kwase nga kuli atweela n'Umwoyo Umukhosefu, kuwandalasa kuri ise s'indi khukanikha bye bubeeyi ta.

²Mu khuloma bino musaambo yino, indi ni kumutaambo kumukali ni butsiina bukali mu mwoyo kwase bubukhaakama ta.

³Khulwe be buulebe baase babaali ba Isiraeli ni khulwase samweene, ise nandikanile ndi shitsubo shishiili khu Kristo, khali shibeele khus'ise nio indekha khuba uwa Kristo ta.

⁴Wele awa babaana ba Isiraeli ikhabi iye khukhwikyela babaana beewe. Wabawa ni shiriifwa sheewe, wakhola ni nabo tsindakaano tseewe, wabawa kamakaambila keewe, wabawa khukhwisaaya, naluundi abawo byeesi abasuubisa.

⁵Bakuuka baabwe beene babamanyikhana abo baaba bakuuka baabwe, ni Kristo mu khusaalikhana khweewe nga umuundu aba uwe linaambo lyabwe lyeene. Wele afumisibwe biilo ni biilo. Amiina.

⁶Ne ise s'indikho inoma ndi byeesi Wele aaloma byaakhasibwa ta; khulwekhuuba babaandu babaama mu Isiraeli boosi sibali babaandu ba Wele ta.

⁷Namwe boosi babaama munda iya Iburayimu sibali babaana beewe khulwekhuuba bari niye ubasaala ta, akhali babalikha nga babaana beewe khuubirira mu Isaaka.

⁸Shino shimanyisa shiri sibali abe babaasaalikha mu mubili nibo babaabalikha nga babaana ba Wele ta, ne akhali babaana babaasaalikha nga babirira mu khusuubisa khweesi Wele akhola, nibo babaabalibwa nga babetsukhulu beewe.

⁹Khulwekhuuba Wele mu khusuubisa Iburayimu aloma ari, “Indikobola mu mbuka nga yino iri. Isi indi kobolela, umukyelema woowo Sara akhaabe ali n'umwaana umusiinde.”

¹⁰Ne seshili isho shonyene ta. Khulwekhuuba akhaba Rebeka naye n'asaala besiinde bakhwana, paapa waabwe aaba mutweela, nga niye Kuuka weefwe, Isaaka.

¹¹Akhaba abe ni baaba nga bashiili khusaalikha ta, namwe abe bashiili khukhola shishiindu shoositsana oba shiibi namwe shilayi ta, Wele aboolela Rebeka ari, “Umwaana woowo umukhulu aliba umuraambi w'omukyeekhe.”

¹²Shino shakholebwa khulwe khulaangibwa kheewe, ari nio manya shitsilililwa sha Wele sheesi amurobolelamo shiloosele, ne shiili bari khulwe bikholwa bilayi ta.

¹³Nga ni sharonebwa shiri, “Nakana Yakobo, ne naabiyila Esau.”

¹⁴Ari khulome khuri shiina? Khulome khuri Wele akhola bye bubwoonaki? Taawe.

¹⁵Khulwekhuuba alomela Musa ari, “Indiyakhila uyo isi ingana khukhwiyakhila; naluundi indiwaambila shiisa uyo yeesi isi ingana khuwaambila shiisa.”

¹⁶Nashiryo shino shimikha khu shiisa sha Wele, ne shiili khu sheesi umuundu akana khukhola ta.

¹⁷Nga bibyaronebwa bikhosefu ni biloma khu Farawo, umuyiinga uwa Misiri biri, “Nakhwikesa umuyiinga nio akile lisiina lyase lifumisibwe mu shiibala mwoosi.”

¹⁸Nashiryo Wele eyashila umuundu isi umweene akhalilewo khukhwiyashila. Shitweela busa akhola kimyoyo kyaabo beesi ekanisa, kyaba ni shikili.

¹⁹Mutweela khusi inywe kane andeebe ari, “Ne noola shili shiryo, khulwashiina kila Wele ekiitsa babaandu baalala? Naanu unyala khuukhaandisa khuukana khwa Wele?”

²⁰Ne iwe niye naanu? Iwe umuundu shiina unyala khukhaandisa Wele? Shibuumbe shinyala khureeba uwashibuumba shiri, “Shiina kila waamuumba uri?”

²¹Umubuumbi s'ali ni bunyala khuukhola sheesi akana ni liiloba lyeewe ta? Umubuumbi s'anyala khuumekakho liiloba ilyo wakhola shibuumbe shitweela nga shimiliwu naluundi she angaaki, ni shishindi nga shiryo busa ta?

²²Shinyala shaba khana Wele, khulwe khuukana khukhwokesana lirima lyeewe, ni khuukana khukhwokesana kamaani keewe, waayikhaliilikha naabi khulwe bibuumbe ibyo abe bibyashila khukhwoonakisibwa.

²³Naluundi Wele akana okesanise buyiindifu bwe shiriifwa sheewe shikali isho, sheesi atsukha khusi ifwe khukhwakaanila shiisa sheewe, abo khusi ifwe beesi amala khuŋoonaŋoona nga bushiili.

²⁴Ifwe khuli babaandu beesi alaanga. Ne shiili ifwe Bayudaaya fwenyene ta, ne ni naabo beesi alaanga khukhwaama mu Banaambo.

²⁵Shili busa nga Wele n'alomela khuubirira mu muŋoosi Hoseya ari, “Abo makiboole babaakhaaba babaandu baase ta, indibalaanga ndi ‘Babaandu baase.’ Ni linaambo abe lyeesi ikhakana ta, indililaanga ndi, ‘Likanwa lyase.’

²⁶“Ni mu shifwo shisheene mweesi babalomela bari, ‘Simuli babaandu baase ta,’ ibweene iyo balilaangibwa bari, ‘Babaana ba Wele Umulamu.’ ”

²⁷N'umuŋoosi Yisaaya alomela angaaki khu biwaamba khu Isiraeli nga aloma ari, “Akhaba nga bukali bwe babaandu be mu Isiraeli buli nga kumuyekhe kwe khu ndulo khwe inyaantsa, ne shitweela busa bafwiiti bari nibo babaaliwonesebwa.

²⁸Khulwekhuuba Umukasya alikhalila shiibala kumusaango wangu, akhali khuliindakho na khafwiiti ta.”

²⁹Naluundi shili busa nga Yisaaya n'aloma makiboole ari, “Iba nga Wele unyala byoosi uyo alekha khukhulekhela ifwe lisaaye lyeefwe, khali nafwe khwayikyela nga Sodoma. Khali khwayikyela nga Gomora.”

³⁰Ne ari kane khulome khuri shiina? Kane khulome khuri Banaambo abe babaakhaweentsa bukwalaafu ta, ari bafunile bukwalaafu khulwe khufukiilila.

³¹Ne ba Isiraeli babaweentsa bukwalaafu nga baloondelela kamakaambila sibanyoola bukwalaafu ta, khulwekhuuba siboolelesa sheesi kamakaambila kaakana ta.

³²Ne khulwashiina kila shaba shiryo? Shaba shiryo khulwekhuuba ba Isiraeli sibaweentsa bukwalaafu nga bemikhile khu bye khufukiilila ta. Baaweentsa bukwalaafu nga bemikha khu bikholwa byaabwe. Bali busa nga babetuya khu shisiindi shishireera biwaangafu.

³³Nga ni sharonebwa mu byaronebwa bikhosefu shiri, “Bona ndi khurawo libaale mu Sayuuni, lilikane likile babaandu betuyekho. Nilyo lyeesi kane betuyekho ni bakwa aasi. Ne umuundu yeesi ufukiilila mu Yesu, s'aliwaambisibwa kamaŋaanyu ta.”