Read lumasaaba 1 Bakorinso 1 Bible Online

1 Bakorinso 1 - lumasaaba bible

1 Bakorinso 1

¹Ibaluwa yino yaama isiise Paulo uwalaangibwa khuuba Umurume wa Kristo Yesu, lwe khuukana khwa Wele, atweela n'uwe buulebe Sosisenesi.

²Khukironela babaandu ba Wele babaali mu Korinso, babaakhosesebwa ni Kristo Yesu, balaangiwa khuuba bakhosefu, atweela ni naabo boosi babaama mu buli shifwo, babekoontselela mu lisiina ly'Omukasya weefwe Yesu Kristo, niye uli Umukasya waabwe, luundi uweefwe.

³Bubweela ni Lukoosi bibyaama isi Wele, Paapa weefwe, n'isi Yesu Kristo, bibe isi muli.

⁴Ise isiima Wele busheele khulweenywe, lwe bubweela bweewe bweesi mwaweebwa mu Kristo Yesu.

⁵Lwekhuuba mu butweela ni Kristo, mwayiindila mu biindu byoosi; mu khukanikha ni mu makyesi keenywe.

⁶Lwekhuuba mwiinywe bujulisi bwa Kristo bwawandalasibwa.

⁷Nashiryo, mbaawo shiwaanwa shoosi she kumwoyo sheesi mutaamba ta, nga ni muliindilila khubonekha khw'Omukasya weefwe Yesu Kristo.

⁸Niye ulibawangasa khukhwoolesa ibwakamilo, nio mube nga simulikho ni likoondo lyoosi khu shifukhu sh'Omukasya weefwe Yesu Kristo.

⁹Wele umweene uwabalaanga khuuba mu butweela bw'Omwaana weewe Yesu Kristo, Umukasya weefwe, ali umwiyikinwa.

¹⁰Bebuulebe, imbekoontselela mu lisiina ly'Omukasya weefwe Yesu Kristo, ndi, mufukiilisanatsake mwenyene na mwenyene, mu byeesi muloma, nio manya ilekhe khubawo khukhwawukhanamwo mwiinywe ta, ne mutubaanile ilala mu byeesi mwaambaasa ni mubitsililwa.

¹¹Bebuulebe, iliwo babaandu be muungo mwa Kulowe, babaamala khukhumboolela bari, muli ni khulomana akari enywe.

¹²Sheesi inoma nisho shino ndi, bari buli mutweela khusiinywe aloma ari; “Ise ndi uwa Paulo,” ukuundi ari, “Ise ndi uwa Apolo,” n'ukuundi ari, “Ise inondelela Kefa,” n'ukuundi ari, “Ise ndi uwa Kristo.”

¹³Ilala Kristo alimwo khukhwawukhana? Paulo niye isi batsaangilila khu musalaba khulweenywe? Namwe mwabatisibwa mu lisiina lya Paulo?

¹⁴Ise isiima Wele lwekhuuba sinabatisatsakakho umuundu yeesi khusiinywe ta, akhali Kurisipo ni Gayo.

¹⁵Nashiryo umuundu yeesi alekhe khuloma ari, mwabatisibwa mu lisiina lyase ta.

¹⁶Luundi nashebuliile ndi nabatisakho nibe mu ntsu ya Sitefanasi boosi, ne khubirisakho awo, sishebulila nga nabatisakho umuundu ukuundi yeesi ta.

¹⁷Lwekhuuba Kristo s'anduma ise khubatisa ta, nenjeeba khuboolela Kamakhuuwa Kamalayi. Akhuba khuboolela ni khuraambisa lulimi lwe kamakhula ke babaandu ta, nio lukana nikhola ndyo kumusalaba kwa Kristo kulekhe khuwamo kamaani kaakwo.

¹⁸Lwekhuuba shilomo she khu khufwa khwa Kristo khu musalaba shili she busilu isi ibo babahela, ne isi ifwe babawonesebwa, kali kamaani ka Wele.

¹⁹Lwekhuuba sharonebwa shiri, “Indyonakisa kamakyesi ke bakyesi, indusewo khumanya khwe babamanya.”

²⁰Ni nashiryo, muundu umukyesi ali waheena? Namwe uwamanya khuurona naye ali ena? Umukhaandisi we kumuboolo kuno niye ali waheena? Simubona muri Wele wakalusa bukyesi bwe shiibala shino khuuba nibwo busilu ta?

²¹Lwekhuuba Wele mu makhula keewe n'akhalawo, shiibala shikhaasikha khumumanya mu bukyesi bwasho, ne lwanyuma Wele wasiima khuubirira mu byeesi ifwe khukuukuula, byeesi babaandu bambaasa bari busilu, awonese ibo babafukiilila.

²²Bayudaaya nibo bakana khubona bubonelo, Bayonaani nibo baweentsa kamakhula,

²³ne ifwe khuboolela babaandu bibiwaamba khu Kristo isi batsaangilila khu musalaba, shino nisho shishiili nga kumusiila isi Bayudaaya, ne she busilu isi Banaambo.

²⁴Ne is'ibo beesi Wele alaanga mu Bayudaaya namwe mu Bayonaani boosi, Kristo niko Kamaani ka Wele luundi niko Kamakhula keewe.

²⁵Lwekhuuba shishibonekha nga busilu bwa Wele bufuurisa kamakyesi ke babaandu, ni shishibonekha nga butoro bwa Wele bufuurisa kamaani ke babaandu.

²⁶Ne be buulebe, inywe ni mwaambaase khu mbuka isi mwalaangibwilakho! Se shili bari bakali khusiinywe mwaba bakyesi nga babaandu ni bashibona ta, naluundi bakali khusiinywe simwaba be kamaani, namwe babaasaalikha muungo mwe angaaki ta.

²⁷Ne Wele alaanga bisilisilu bye mu shiibala, nio awaambise bakyesi tsisoni, luundi Wele arobola bitoro bye mu shiibala, nio awaambise be kamaani tsisoni.

²⁸Luundi Wele alaanga bye aasi bibileekelesebwa bye mu shiibala, naluundi ibyo bibikhalimo shoosi ta, nio arusewo ibyo byeesi shiibala shambaasilisa khuuba bikhulu.

²⁹Shino shimanyisa shiri, mbaawo sheesi umuundu ebuyililakho mu moni tsa Wele ta.

³⁰Shino shili khulwa Wele kila inywe muli mu Kristo Yesu. Kristo uyo niye uwekyela Kamakhula keefwe. Aryo niye ali bukwalaafu bweefwe, luundi mu niye ifwe khwawaanibwayo buraawa naluundi khwafuna buwonesi.

³¹Nashiryo khashibe nga ni sharonebwa shiri: “Noola umuundu yeesi ebuyila, ni ebuyilile mu Mukasya.”