Read lumasaaba 1 Bakorinso 10 Bible Online

1 Bakorinso 10 - lumasaaba bible

1 Bakorinso 10

¹Bebuulebe, ingana inywe mumanye muri, bakuuka beefwe baaba aasi a namufweeli, luundi boosi babira bulayi akari mu nyaantsa ilaangibwa Imbesemu.

²Boosi babatisibwa nga baloondeleli ba Musa, mu namufweeli ni mu nyaantsa.

³Luundi boosi baalya biilyo bitweela bye kumwoyo,

⁴baanywa ni bye khuunywa bitweela bye kumwoyo. Lwekhuuba baanywa khukhwaama mu lwaanda lwe kumwoyo lulwatsya ni nabo, ni lulwaanda luno nilwo Kristo Umweene.

⁵Ne khubeenebo bakali busa, Wele s'abekhoyela ta, nashiryo kimilaambo kyaabwe kyasalanisibwa mu mubiimbi.

⁶Ne bibiindu bino byoosi bili bye khubonelakho isiifwe, khukhureewula khulekhe khukhwiisa kimyoyo kyeefwe khu biindu biibi nga nibo ni baakhola ta.

⁷Mulekhe khuuba babesaaya bifwaani nga babaandi khu nibo ni baakhola ta. Bibyaronebwa biloma biri: “Babaandu bekhala aasi khuunywa, ni khuulya, benyukha baarakikha khushina.”

⁸Sikhwakha khukhola bye buyeyani nga babaandi khu nibo ni bakhola ta, ni shishamamo babaandu kimikaanda kibili ni bikana bitaru (23,000), baafwa khu shifukhu shitweela.

⁹Ifwe sikhwakha khukhaka Umukasya Kristo, nga babaandi khu nibo ni baakhola ta, lwanyuma beeribwa ni tsindemu.

¹⁰Namwe sikhwakha khweŋuluŋuunya nga babaandi khu nibo ni baakhola ta, lwanyuma malayika umuhesi wabahesa boosi.

¹¹Bibiindu bino byoosi byababaakho khuuba nga she khubonelakho isi babaandi, naluundi byaronebwa biryo khukhureewula ifwe beesi intsakamilo ye kimiboolo kino yoolelekho.

¹²Nashiryo, khayo umuundu yeesi uwaambaasa ari wemile, etsililise naabi, alekhe khukwa ta.

¹³Mbaawo khukhakibwa khwoosi khubabelekho khukhali khwe babaandu ta, ne Wele umwiyikinwa singene abafukiilile inywe khukhakibwa khufuura nga ni munyalisa ta, luundi khu mbuka ndweela nyene yeesi mukhakiwiilamo, kane Wele abawe intsila ye bubwilukhilo, nio munyale khukhwikhalilikha.

¹⁴Aso, bakanwa baase, ni mwibebeehe khukhwisaaya bifwaani.

¹⁵Ise inganikha isi muli nga babaandu bakyesi, ni mwaambaase mwabeene khu byeesi inoma.

¹⁶Shikhopo she tsikhabi, sheesi khuloombela tsikhabi, sishili nisho mweesi khunyoolela butweela mu mafuki ka Kristo? Ni kumukaati kweesi khumenyulamo, sikuli nikwo mweesi khunyoolela butweela mu mubili kwa Kristo?

¹⁷Lwekhuuba iliwo kumukaati mutweela, ifwe khukhuuli bakali, khuli kumubili mutweela, lwekhuuba fweesi khukabanana kumukaati mutweela.

¹⁸Ni mubone babaandu ba Isiraeli, ibo babaalya byeesi bamalile khuwayo nga tsisaayilo sibali butweela ni bubwakaanisi bwe shisheeso isi Wele?

¹⁹Ne shiina sheesi inoma? Biilyo bibiwaanibwayo isi bifwaani sibili shiindu ta, namwe inoma ndi shifwaani sishili shiindu ta?

²⁰Taawe. Sheesi inoma nisho shino ndi, isho shishiwaanibwayo khu sheeso she Banaambo, shiwaanibwayo isi bisaambwa, ne akhuba isi Wele ta. Ni nase shingana inywe mube mu butweela ni bisaambwa ta.

²¹Inywe simunyala khunyweela khu shikhopo sh'Omukasya, ni khu shikhopo she bisaambwa ta. Inywe simunyala khukabanana khubye khu meetsa y'Omukasya, luundi mwakabanana nibye khu meetsa ye bisaambwa ta.

²²Ifwe khukana khuwaambisa Umukasya weefwe libuba? Ifwe khumufuura niye kamaani?

²³Babaandu baalala muloma muri, “Bibiindu byoosi bilayi,” ne bibyaakha sibili byoosi ta. Luundi muloma muri, “Byoosi bilayi,” ne sibili byoosi bibyombekha ta.

²⁴Ikhabawo umuundu yeesi uweentsa bibyeewe khubweewe yenyene ta, ne njeeba ni byowashe.

²⁵Ni mulyatsake shoosi sheesi bakulisa mu khatale, ne mulyatsake nga akhureebelesa ta, lwe bulayi bwe kumwoyo.

²⁶Lwekhuuba shiibala shili sh'Omukasya ni bibilimo byoosi.

²⁷Noola mutweela khubakhali bafukiilisi akhulaanga mu ntsu yeewe khuutsya khulya, ni nawe uryo wafukiilila khuutsya, ulyatsaka shoosi shebareere mu moni tsoowo nga akhwireebelesa ta, lwe bulayi bwe kumwoyo.

²⁸Ne umuundu n'akhuloma ari, “Biilyo bino biwanibwileyo isi bisaambwa,” ukhalyatsaka biilyo ibyo ta, lwe bulayi bw'omuundu ukhuboolele, nilwe bulayi bwe kumwoyo.

²⁹Sheesi inoma nisho shino ndi, akhuba lwe bulayi bwe kumwoyo kwoowo ta, ne lwe kumwoyo kw'omuundu ukuundi. Ne lwashiina lukoosi lwase lwikiitsibwa khulw'omuundu ukuundi?

³⁰Ise n'indya ni khusiima, lwashiina kila ise ikhomebwa lweesho sheesi isiimila Wele?

³¹Aso, noola mulya, namwe munywa, namwe byoosi byeesi mukhola, ni mukhole byoosi lwe shiriifwa sha Wele.

³²Mukhareera shishituyisa isi Bayudaaya, namwe isi Banaambo, namwe isi babaandu ba Wele babafukiilila ta.

³³Ni nase nga nikhola, ikhakakho khukhwikhoyesa buli mutweela nga simeentsa kamafuurisa kaase ta, ne khulwe babaandu babaandi ndi, nio bawonesebwe.