Read lumasaaba 1 Bakorinso 11 Bible Online

1 Bakorinso 11 - lumasaaba bible

1 Bakorinso 11

¹Ni mwiyikile khus'ise nga she khuubonelakho, nga nase ne niyikila khu Kristo.

²Mbabuyila lwekhuuba buli busheele muushebulila ise, luundi ni lwe khuuwaamba ibyo byeesi mbaleekela.

³Ne ingana mumanye muri, Kristo nikwo kumurwe kwa buli musaani, n'umusaani nikwo kumurwe kw'omukhasi, ni Wele niye kumurwe kwa Kristo.

⁴Buli musaani yeesi uloomba, namwe ukhola buŋoosi bwa Wele, nga waabiimbile khu murwe, awaambisa Kristo kamaŋaanyu.

⁵N'umukhasi yeesi uloomba namwe waakhola buŋoosi bwa Wele nga imba khubiimba khu murwe kweewe ta, awaambisa umuseetsa weewe kamaŋaanyu, lwekhuuba umukhasi uyo afwaana nga umuundu ukhalilekho litsuune lyeewe.

⁶Noola umukhasi akhubiimbilila khu murwe ta, aakha akhalekho litsuune lyeewe, namwe khulirusakho, ne shiba shilayi ebiimbilile.

⁷Umusaani sishimwakhila khukhwibiimbilila kumurwe kweewe ta, lwekhuuba niye shifwaani ni shiriifwa sha Wele, ne umukhasi niye shiriifwa sh'omusaani.

⁸Lwekhuuba umusaani s'ali niye uwabuumbiwa khukhwaama mu mukhasi ta, ne umukhasi niye uwarura khukhwaama mu musaani.

⁹Naluundi ndi, lwekhuuba umusaani s'abuumbiwa khulw'omukhasi ta, ne umukhasi niye uwabuumbiwa khulw'omusaani.

¹⁰Ni lwe lomo yino, ni khulwe bamalayika, umukhasi aakha khukhwibiimbilila, khukhwokesanisa bunyala bwe kumurwe kweewe.

¹¹Ne mu byoosi mu Mukasya, umukhasi s'anyala khubawo yenyene akhali umusaani ta, n'umusaani naye s'anyala khubawo yenyene akhali umukhasi ta.

¹²Lwekhuuba umukhasi nga n'arura mu musaani, shiryo ari umusaani naye asaalikha n'umukhasi; ne byoosi byaama isi Wele.

¹³Ne mwabeene ni mwikhalilewo; shaakhila umukhasi khuloomba isi Wele nga akhwibiimbilila khu murwe ta?

¹⁴Ne busaalikhana bubweene sibubaleekela buri, umusaani khulehesa litsuune lyeewe, shimuwaambisa tsisoni?

¹⁵Ne umukhasi khulehesa litsuune lyeewe nisho shiriifwa sheewe? Lwekhuuba litsuune lyeewe lyamuweebwa khuuba she khukhwibiimbilila.

¹⁶Ne umuundu yeesi n'akana khureera khukhaandisana, ifwe sikhuli ni saambo ikiindi ta, namwe mu baandu ba Wele babafukiilila, nabo sibali nayo ta.

¹⁷Ne ari mu byeesi mbareewula bibiilakho bino, simbabuyila ta, lwekhuuba tsimbuusano tseenywe tsiliwo lwe buubi, ne shiili lwe bulayi ta.

¹⁸Mu khunyoowela ilala, imbulila bari iliwo khukhwawukhanamo mwituuli lyenywe, ni nase ishifukiilila nga sha ŋali.

¹⁹Muŋali khukhwawukhanamo khwakha khubawo mwiinywe, nio ibo baŋali banyale khubonekhana bulayi.

²⁰Ni muba nga mwabuusaane atweela, sishili ndi shili lwe khuulya she ashilo sh'Omukasya ta,

²¹ne lwekhuuba mu khulya khweenywe, buli muundu atsya mu moni khukhwilila biilyo byeewe, nga s'alindakho uwashe ta, isho shakila ukuundi waba ni ntsala, n'ukuundi wameela.

²²Ne lwashiina? Inywe simuli ni tsiingo tseenywe, mweesi munyala khuliila ni khunyweela? Namwe mulekelesa lisaayilo lya Wele, ni khuwaambisa tsisoni ibo babaakhali ni khakhaandu ta? Inywe mukana ise imbaboolele shiina? Inywe mukana ise imbabuyile lw'esho? Taawe! Shinyala ta.

²³Lwekhuuba ise sheesi naweebwa n'Umukasya nase naabaweele inywe. Nga Umukasya Yesu mu shilo sheesi baamuliilamo luwomelo, aabukula kumukaati.

²⁴Nga waamalile khuukuloombela ikhabi, waakumenyulamo, waaloma ari, “Kuno nikwo kumubili kwase kukuuwaanibwileyo khu lweenywe. Ni mukholatsake muryo, khukhuushebulilatsaka ise.”

²⁵Ni musaambo niyo ndweela, lwanyuma lwe she shiilo, waabukula shikhopo, waaloma ari, “Shikhopo shino niyo indakaano imbya mu mafuki kaase, ni mukholatsake muryo busheele khukhuushebulilatsaka ise.”

²⁶Nashiryo busheele buli lweesi kane mulyatsake khu mukaati kuno, ni khuunywa khu shikhopo shino, mwokesana khuufwa khw'Omukasya isi babaandu khukhwoolesa n'alikobola.

²⁷Nashiryo umuundu yeesi ukane alyatsake kumukaati, namwe anywatsake khu shikhopo sh'Omukasya nga s'akhila ta, kane abe nga wonakisile kumubili ni kamafuki k'Omukasya.

²⁸Ne umuundu umweene akhiile khukhwikhebela, nio alye khu mukaati ukwo, luundi anywe khu shikhopo isho.

²⁹Lwekhuuba umuundu yeesi ulya namwe wanywa nga wakhwofwaasa bulayi kumubili kw'Omukasya sheesi kumanyisa, aba ereerakho kumusaango, nga n'alya luundi nga n'anywa.

³⁰Isho nisho shishikila bakali khwiinywe bali batoro luundi balwaale, ni babaandi baafwa.

³¹Ne iba nga fwabeene khukhwiyimenielesa mu bwa ŋali, khali Wele s'akhukhaliile ifwe kumusaango ta.

³²Ne ni khukhalilwa kumusaango n'Umukasya, aba akhuwa shitaambiso nio khulekhe khukhwikiitsiwila atweela ni shiibala ta.

³³Nashiryo be buulebe, inywe ni mwiitsa atweela khuulya she ashilo sh'Omukasya, ni muliindanatsake.

³⁴Umuundu yeesi n'aba nga ali ntsala, n'alye ingo weewe, nio mu khubuusana khweenywe, mulekhe khukhaliwila kumusaango ni Wele ta. Ne bibiindu bibiindi ndibibaboolela nga netsile isi muli.