Read lumasaaba 1 Bakorinso 12 Bible Online

1 Bakorinso 12 - lumasaaba bible

1 Bakorinso 12

¹Ne bibiwaamba khu biwaanwa bibyaama isi Umwoyo Umukhosefu, shingana inywe khulekha khubimanya ta, be buulebe.

²Mwamanya muri nga ni mwaba mushiili bakafwiili, mwayilibwa luundi mwakosaasibwa musaambo ngali, nga mwisaaya bifwaani busa.

³Ni lwe lomo yino, ingana inywe mumanye muri, mbaawo umuundu yeesi uraangililwa n'Umwoyo wa Wele, unyala waaloma ari, “Yesu atsubiwe ta,” namwe mbaawo umuundu ubuula ari, “Yesu niye Umukasya” ta, khurusakho nga Umwoyo Umukhosefu wamuraangiliile.

⁴Iliwo biwaanwa bye tsisaambo ngali, ne Umwoyo ali mutweela.

⁵Luundi iliwo tsisaambo ngali tse bubwakaanisi, ne Umukasya ali mutweela.

⁶Iliwo tsisaambo ngali tse khuraamba, ne Wele niye mutweela, uraamba byoosi mu baandu boosi.

⁷Umwoyo abonekhela mu buli mutweela lwe buulayi bwa boosi.

⁸Isi umuundu mutweela Umwoyo amuwa shilomo shishitsuule kamakyesi, ne isi ukuundi, Umwoyo tsanaayo, wamuwa shilomo she khumanya.

⁹Isi umuundu ukuundi, Umwoyo mweene, amuwa khufukiilila, ne isi ukuundi amuwa biwaanwa bye khuwonesa balwaale.

¹⁰Isi umuundu ukuundi, khukhola bye kamakaanga, ne isi ukuundi, khuboola bibiitsya khubawo. Isi ukuundi khumanya khukhwawulawo kimyoyo, isi ukuundi khukanikha tsinimi tse tsisaambo ngali, naluundi isi ukuundi khushuusa tsinimi tseene.

¹¹Ne bino byoosi, Umwoyo mweene mutweela niye ubikhola. Umweene awa buli muundu nga n'aba wakhalilewo.

¹²Nga esi kumubili ni kuli mutweela, n'enga kuli ni bisiintsa bikali, ni bisiintsa byeene bino ikhaba nga bili bikali, bili kumubili mutweela. Nasho shili shiryo isi Kristo.

¹³Lwekhuuba fweesi; oba Bayudaaya namwe Banaambo, bakulwa namwe balekhuule, fweesi khwaweebwa Umwoyo uyo mutweela khuunywa, khuryo fweesi khwekyela kumubili mutweela nga khubatisibwa.

¹⁴Kuryo kumubili sikuli ni shisiintsa shitweela ta, ne kuli ni bikali.

¹⁵Ne shikyele shiba shiloma shiri, “Lwekhuuba ise s'indi kumukhono ta, nashiryo ise s'indi uwe khu mubili kuno ta,” shino sishimanyisa shiri shikyele sishili shisiintsa she khu mubili ta.

¹⁶Namwe khukhuru khuloma khuri, “Lwekhuuba ise s'indi imoni ta, nashiryo ise s'indi uwe khu mubili kuno ta,” shino sishimanyisa shiri khukhuru sikhuli shisiintsa she khu mubili ta.

¹⁷Iba nga kumubili kwoosi kukwaba imoni, khali khuwulila khuli waheena? Namwe iba nga kumubili kwoosi kukwaba khukhuru, khali she khuwunyilisa shili waheena?

¹⁸Ne ari nga ni shili, Wele waaruunga bisiintsa bye kumubili buli shitweela mu shifwo shasho, nga umweene n'akana bibe.

¹⁹Iba nga byoosi bibyaba shisiintsa shitweela, khali kumubili kuli waheena?

²⁰Ne ari nga ni shili, iliwo bisiintsa bikali ne kumubili mutweela.

²¹Imoni shinyala yaaloma kumukhono iri, “Iwe sikhukana ta,” namwe kumurwe kwaaloma bikyele kuri, “Inywe ise simbakana ta.”

²²Ne khu luwaande luluundi, bisiintsa bye kumubili bibilaangibwa khuuba bitoro, nibyo bibifuura bukhulu.

²³Ni bisiintsa ibyo byeesi khwaambaasa khuri sibili bikhulu naabi ta, nibyo byeesi khuwaamba bulayi naabi, ni bisiintsa bye kumubili bibikhabonekha bulayi ta, nibyo byeesi khuwaamba ni bubuneende,

²⁴bweesi bisiintsa byeefwe bibibonekha bulayi bikhakana ta. Ne Wele umweene wara atweela kumubili nga sheesi akana nisho khuuwa shiriifwa shishiminyisa bisiintsa ibyo bibikhaweebwa shiriifwa ta.

²⁵Nio manya ilekhe khubawo khukhwawukhana mu mubili ta, ne bisiintsa byoosi bibe ni khuyeetana byonyene na byonyene.

²⁶Noola shisiintsa shitweela she kumubili shitsiinisibwa, bisiintsa bibiindi bibiramile bitsiinikhanila atweela ni nasho. Ne noola shisiintsa shitweela shibuyilisibwa, bisiintsa bibiindi bibiramile binyaayila atweela ni nasho.

²⁷Ni nanywe ari muli kumubili kwa Kristo, naluundi buli muundu ali shisiintsa shakwo.

²⁸Ni nashiryo mu baandu ba Wele, Wele khuunyoowa aarawo baarume, be khabili nibo baŋoosi, be khataru nibo baaleekeli, lwanyuma abo babaakhola bye kamakaanga, ni naabo babaali ni biwaanwa bye khuuwonesa, abo babaayeeta babaandi, abo babaali ni biwaanwa bye khuuraangilila babaandi, ni naabo babaakanikha tsinimi tse tsisaambo tsitsiindi.

²⁹Boosi bali baarume? Boosi baŋoosi? Boosi baleekeli? Boosi bakhola bye kamakaanga?

³⁰Boosi bali ni biwaanwa bye khuuwonesa? Boosi bakanikha tsinimi tsitsiindi? Boosi batsishuusa?

³¹Ne ni mwiwuumatsake biwaanwa bibifuura bukhulu. Ni nase kane imbokesane isho shishifuura bino byoosi bukhulu.