Read lumasaaba 1 Bakorinso 13 Bible Online

1 Bakorinso 13 - lumasaaba bible

1 Bakorinso 13

¹Ikhaba nga inyala khukanikha ni tsinimi tse bamalayika, ne nalekha khuba ni khuukana ifwaana busa nga liyiimba lilikhupa, namwe isaasi busa.

²Ise n'imba nga ndi ni shiwaanwa she buŋoosi, naaba ni kamakhula khumanya bibyabisibwa byoosi, nakhaba ni khufukiilila khukhunyala khurusawo tsinjiinji, ne nga s'indi ni khuukana, imba ndi shishiindu shikhalimo ta.

³Ise nakhaba nga ingabila bataambi ibyo byoosi byeesi ndi nabyo, ni khuwaanayo kumubili kwase nakuwaanayo khukhwokhewa kumulilo, ne nga s'indi ni khuukana, imbaawo sheesi shino shinjeeta ta.

⁴Khuukana khwikhalilikha, luundi khuli khwe shiisa. Khuukana sikhuli ni libuba ta, namwe sikhwimanya khwonyene ta, namwe sikhwiyiinga ta.

⁵Khuukana sikhukhola isaambo imbi ta, namwe sikhuweentsela bibyakhwo khukhweene khwonyene ta, sikhukhalalaka mangu khuryo ta, namwe sikhubiikha buubi khu mwoyo ta.

⁶Khuukana sikhwikhoyela bye bubwoonaki ta, ne khukhwikhoyela bwa ŋali.

⁷Khuukana khwinyindaalila byoosi, khuufukiilila khwakhwo sikhwakama ta, khukhwiyikina khwakhwo sikhuwawo ta, luundi khwikhalilikha bibiindu byoosi.

⁸Khuukana sikhwakama ta, ne nga buŋoosi buliwawo, ni tsinimi natso tsilyakama, ni khumanya nakhwo khuliwawo.

⁹Lwekhuuba khuumanya khweefwe khuli khwe shisiintsa busa, ni buŋoosi bweefwe nabwo buli bwe shisiintsa busa.

¹⁰Ne bubwitsufu ni buliitsa, bye shisiintsa biliwawo.

¹¹Ne ise ni naba nga ishiili mwaana, nakanikhatsaka nga umwaana, nambaasatsaka ndyo nga umwaana, ni mu mbonekha yase nga ndi umwaana. Ne ni natsowa, nalekha bye shishaana.

¹²Byeesi khubona ari, khubona maweeliweeli, nga ni khubonela mu ndolelo, ne lwanyuma khulibona mu moni khu moni. Ne ari imanyakho shisiintsa busa, ne lwanyuma ndimanyila ilala mu bwitsufu, nga nase aluno Wele n'amanyiile ise ilala.

¹³Ne ari bitaru bino nibyo bibiliwo; khuufukiilila, khukhwiyikina, ni khuukana, ne khubyeene bino shishifuura bukhulu nikhwo khuukana.