Read lumasaaba 1 Bakorinso 14 Bible Online

1 Bakorinso 14 - lumasaaba bible

1 Bakorinso 14

¹Ni mulondelele isaambo ye khuukana luundi mwiwuume biwaanwa bibiindi by'Omwoyo, ni khufuurira ilala, shiwaanwa she khuuboolela kamakhuuwa ka Wele.

²Lwekhuuba umuundu ukanikha mu nimi tsitsiindi, s'akanikha isi babaandu ta, ne akanikha isi Wele. Lwekhuuba mbaawo umanya byaloma ta, ne aba akanikha bya ŋali bye shimoonyo by'Omwoyo mu mwoyo kweewe.

³Ne umuundu uboolela kamakhuuwa ka Wele, akanikha isi babaandu lwe khuboombekha, ni khubahangasa, ni khubekhoyesa.

⁴Uyo ukanikha mu lulimi luluundi eyombekha umweene, ne umuundu uboolela kamakhuuwa kamalayi, ombekha babaandu babaandi.

⁵Ise nandikanile inywe mweesi khuukanikha mu nimi tsitsiindi, ne khufuura nandikanile muboolele kamakhuuwa kamalayi ka Wele, lwekhuuba uyo uboolela kamakhuuwa ali mukhulu naabi khufuura uyo ukanikha mu nimi tsitsiindi, khurusakho nga abe iliwo umuundu ukuundi unyala khushuusa, nio manya babaandu ba Wele babaandi bayeetebwa.

⁶Ari be buulebe, ise noola niitsa isi muli nga nganikha mu nimi, ndibayeetakho shiina? Khurusakho nga nabareerere bukwalaafu bweesi Wele amimbuliile, namwe bye khumanya, namwe buŋoosi, namwe shilomo she khuubaboolela khukhwaama mu ngaaki.

⁷Namwe ikhaba bibiindu bibikhalimo bulamu ta, n'enga birusa kamakono, nga kumulele, namwe lituungu, ni bilekha khukhwawukhanamwo mu makono nga bikhupa, namwe nga bifuura, umuundu amanya aryeena kumweenya?

⁸N'umuundu ufuura ikhoombi ye busoolo, n'alekha khufuura likono lilyeene lilimanyikhana, naanu unyala khukhwirekekhela busoolo?

⁹Ni nanywe musaambo iyo, umuundu anyala aryeena khuumanya byeesi mukanikha, nga abeele bilomo ibyo bye mu lulimi lukyeni sibimanyikhana ta? Lwekhuuba uba nga ukanikha imbewo busa.

¹⁰Mu shiibala mulimo tsisaambo tse tsinimi ngali, ne mbaawo na lutweela lukhali ni sheesi lumanyisa ta.

¹¹Ne ise n'imba nga akhumanya sheesi umuundu ukanikha amanyisa ta, ise kane imbonekhe nga umunaambo isi uyo ukanikha, n'umukanikhi umweene naye kane abonekhe nga umukyeni is'ise.

¹²Ni nanywe muryo. Lwekhuuba mwiwuuma biwaanwa bya mwoyo, ni mukhakekho khufuurira ilala, khuraambisa ibyo bibiyeeta khukhwombekha babaandu ba Wele.

¹³Ni lwe lomo yino, umuundu ukanikha mu nimi, aakha khuuloomba isi Wele afune ni shiwaanwa she khushuusa byeesi aloma.

¹⁴Lwekhuuba ise ni noomba mu lulimi luluundi, kumwoyo kwase kuloomba, ne kamakyesi kaase sikaana bibyaano ta.

¹⁵Nashiryo, shiina sheesi naakha khukhola? Kane inoombe ni kumwoyo kwase, ne kane inoombe ni kamakyesi kaase nako. Kane niimbe ni kumwoyo kwase, ne kane niimbe ni kamakyesi kaase nako.

¹⁶Lwekhuuba iwe n'uba nga uloomba Wele mu mwoyo, umuundu uwikhaale esi iwe uli khuloombela, anyala aryeena khukhwiilamo ari, “Amiina,” mu khuloombakhwo, ate nga niye s'amanya byeesi ukanikha ta?

¹⁷Ilala khuloomba khwoowo khunyala khuuba khulayi, ne umuundu ukuundi uyo s'ombakhibwa ta.

¹⁸Ise isiima Wele lwekhuuba ise imbafuura inywe mweesi mu khukanikha mu nimi.

¹⁹Ne mukhwisaaya mwisaayilo, ngana inganikhe bilomo biraano bye kamakyesi nio indeekele babaandi, khufuurisa khuukanikha bilomo kumukaanda mutweela mu lulimi lulukhamanyikha ta.

²⁰Bebuulebe, ni mulekhe khuuba nga babaana bakyeekhe mukhwaambaasa khweenywe; ne isi shiibi ni mubaatsake nga babaana baŋaalye, ne mukhwaambaasa khweenywe ni mubaatsake nga babaandu bakhulu.

²¹Nga ni sharonebwa mu makaambila shiri, “Umukasya aloma ari, indikanikha isi babaandu bano nga inganikhila mu baandu be tsinimi tsitsiindi, ni khuubirira mu minwa kye Banaambo. Ne ikhaba shiryo, babaandu baase sibalimbulilisa ise ta.”

²²Nashiryo khuuloma mu nimi tsitsiindi shili she khubonelakho isi bakhafukiilila ta, ne akhuba isi babafukiilila ta. Ne khuboolela kamakhuuwa ka Wele, khuli khwe babafukiilila, ne akhuba babaakhafukiilila ta.

²³Ne noola babaandu ba Wele babafukiilila babuusana atweela, na buli mutweela wakanikha mu lulimi luluundi, ne be bulafu namwe babaakhali bafukiilisi benjila isi bali, sibaloma bari, bano bakwiile tsintsoli?

²⁴Ne siinga boosi bakuukuula kamakhuuwa ka Wele, ni nooyo ukhafukiilila ta, namwe uwe bulafu wenjila isi bali, naye umweene kane eyimenielese, ekiitsiwe mu mwoyo ari ali umwonaki, ni byoosi byeesi awuliile bimufuurise kumusaango.

²⁵Ni bimoonyo bye mu mwoyo kweewe bibonesebwa. Ni naye aryo akwa aasi, wesaaya Wele, nga aloma ari, “Ilala Wele ali mus'iinywe.”

²⁶Bebuulebe, ari shiina shishiramile khukanikhakho? Ni muba nga mwabuusaane atweela, buli muundu ali ni kumweenya, n'ukuundi khuleekela, ukuundi khubiimbulilwa, n'ukuundi bubakha bwe mu nimi, n'ukuundi khushuusa ibyo bibikanikhibwa. Bino byoosi byaakha khukholewa lwe khuyeeta babaandu ba Wele babafukiilila mu Kristo.

²⁷Ne n'ibawo umuundu ukanikha mu nimi tsitsiindi, ni bakanikhe babili, namwe khufuurisakho awo, babe bataru bonyene, nga buli mutweela akanikha lwanyuma lw'owashe, naluundi yaakha khubawo uyo ushuusa bibiiba byakanikhibwile.

²⁸Ne noola mbaawo umuundu yeesi unyala khushuusa ta, umuundu ukanikha mu nimi asile busa mwisaayilo, akanikhile mu mwoyo kweewe, ni esi Wele.

²⁹Khayo abo babaali baŋoosi, babe babili namwe bataru, ne babaandi bemenielese naabi ibyo bibikanikhibwa.

³⁰Ne noola umuundu mutweela khubekhaale mu lubusano abonekhelwa, uyo abe uuli khukanikha asila,

³¹lwekhuuba mweesi munyala khuboolela kamakhuuwa ka Wele mutweelatweela, nio buli mutweela eyike luundi awangasibwe.

³²Shiwaanwa she khuukhola buŋoosi bwa Wele shaakha khuuba mu bunyala bwooyo ubukanikha.

³³Lwekhuuba Wele s'ali Wele we liyoombo ta, ne Wele we lukoosi. Ne nga ni shili mu mesaayilo koosi ke bakhosefu,

³⁴bakhasi bakhiile basile busa mu mesaayilo, lwekhuuba sibafukiilisibwa khukanikha ta, ne nga likaambila ni liloma baakha khuwulilisa busa.

³⁵Ne noola iliyo shishiindu shoosi shebakana khumanya, bereebe khu baseetsa baabwe ingo, lwekhuuba shili she tsisoni umukhasi khukanikhila mwisaayilo.

³⁶Namwe mwaambaasa muri Ilomo ya Wele yarakikhila mus'iinywe, namwe yoola isiinywe mwenyene?

³⁷Ne noola umuundu yeesi eyambaasakho khuuba umuŋoosi, namwe ari waayitsusibwa ni biwaanwa by'Omwoyo, aakha amanye ari bino byeesi mbaroneele, lili likaambila ly'Omukasya.

³⁸Ne noola umuundu uyo alekelesa bino, ni naye kane alekelesebwe.

³⁹Ni nashiryo be buulebe, ni mwiwuume khuboolela babaandu kamakhuuwa ka Wele, ne mukhakhingilila khukanikha mu nimi ta.

⁴⁰Ne byoosi byaakha bikholebwe nga ni bikaniwa, luundi musaambo indayi.