Read lumasaaba 1 Bakorinso 15 Bible Online

1 Bakorinso 15 - lumasaaba bible

1 Bakorinso 15

¹Ni na ari be buulebe, ngana khubakhebusa Kamakhuuwa Kamalayi keesi nababoolela nanywe mwakakaanila, ni mu meeneko nimwo mweesi khufukiilila khweenywe khwiimikhile.

²Nilwe kamakhuuwa keeneko, inywe mwawonesebwa ni muba nga mwihangasila khu shilomo sheesi nababoolela; khurusakho nga mwafukiilila busa.

³Lwekhuuba ise nanyoowa khubawa inywe shikhulu isho sheesi naweebwa, ndi Kristo afwa lwe bibyoonako byeefwe, nga bibyaronebwa bikhosefu ni biloma,

⁴luundi biri, asiikhibwa, ne walamusibwa khukhwaama mu bafu khu shifukhu she khataru, nga bibyaronebwa bikhosefu ni biloma,

⁵naluundi biri, abonekhela Kefa, ne lwanyuma waabonekhela liikhumi na babili boosi.

⁶Ne lwanyuma lw'ebyo waabonekhela be buulebe babaafuurakho bikana biraano kumuluundi mutweela, ni bakali khubeenebo bashiiliwo balamu, akhaba nga babaandi khu nibo baafwa.

⁷Lwanyuma lwayo waabonekhela Yakobo, ne lwanyuma ndi waabonekhela baarume boosi.

⁸Ne lwanyuma lwa boosi, waambonekhela ni nase, ikhaba nga nafwaana nga umwaana uwasaalikhila mu mbuka ikhaaba induufu ta.

⁹Lwekhuuba mu baarume boosi, ise niye ufuura bukyeekhe, ukhaakhila khulaangiwa umurume ta, lwekhuuba ise nakubyeengatsaka babaandu ba Wele babafukiilila mu Kristo.

¹⁰Ne khulwe bubweela bwa Wele, ise ndi nga n'indi, naluundi bubweela bweewe isiise sibwaba bwa busa ta. Ne naraamba ni kamaani khubafuurakho nibo boosi, ne ndi siili ise ta, ne bubweela bwa Wele bubwaba mus'iise.

¹¹Ne mu byoosi, oba ise, namwe nibo, shino nisho sheesi khwababoolela ni nanywe mwafukiilila.

¹²Ne ari noola shiboolelwa shiri Kristo waalamukha khukhwaama mu bafu, shinyalikha shiryeena baalala khusiinywe khuuloma bari mbaawo khuulamukha khwe baafu ta?

¹³Ne ari noola mbaawo khuulamukha khwe baafu ta, shimanyisa shiri ni Kristo akhulamukha mu bafu ta.

¹⁴Ni Kristo noola akhulamukha mu bafu, shimanyisa shiri ni khuuboolela khweefwe khuli khwa busa, ni khuufukiilila khweenywe nakhwo khuli khwa busa.

¹⁵Ni khufuura, ni nafwe khunyoolekhana nga khuli bajulisi be bubeeyi khu Wele, lwekhuuba khuwa bujulisi khuri Wele aalamusa Kristo mu bafu. Ne noola shiri ndi baafu sibalamusibwa ta, ni Kristo naye aba si walamusibwa khukhwaama mu bafu ta.

¹⁶Lwekhuuba noola baafu sibalamusibwa ta, shimanyisa shiri, ni Kristo naye ashiili khulamusibwa khukhwaama mu bafu ta.

¹⁷Ne noola Kristo ashiili khulamusibwa khukhwaama mu bafu ta, khufukiilila khweenywe khuli khwa busa, ni nanywe mushiili mu byoonako byeenywe.

¹⁸Naluundi shimanyisa shiri, ni naabo babafwiila mu Kristo baahela.

¹⁹Ne noola kumwiyikino kweefwe mu Kristo kuli kwe buulamu bwa ari buno bwonyene, khwakhila khusaasiliwa naabi khufuura babaandu boosi.

²⁰Ne bwa ŋali buli buri, Kristo waalamusibwa mu bafu, nga niye umukiboole uwabo babaafwa.

²¹Lwekhuuba nga khuufwa ni khweetsa khulw'omuundu, ni musaambo nyeneyo ni khulamukha mu bafu khwiitsa khulw'omuundu.

²²Lwekhuuba nga mu Adamu babaandu boosi ni baafwa, baryo mu Kristo boosi balilamusibwa.

²³Ne buli mutweela alilamusibwa khukhwaama mu bafu mu luwalo lweewe; Kristo nga niye umukiboole, ne lwanyuma khu mbuka iye khukhwiitsa khweewe, ibo babamuloondelela.

²⁴Ne lwanyuma intsakamo ikhoole, nga Kristo awaanayo buyiinga isi Wele Paapa, nga waamalile khuhesa buwuli bwoosi, ni bunyala bwoosi, ni kamaani koosi.

²⁵Lwekhuuba shimwakhila khuwula khukhwoolesa nalira aasi ebikyele byeewe basiku beewe boosi.

²⁶N'umusiku umumalilisi uwakha khuhesebwa niye khuufwa.

²⁷Lwekhuuba bibyaronebwa biloma biri: “Wele waara bibiindu byoosi aasi ebikyele byeewe.” Ne ni shiloma shiri: “Bibiindu byoosi byaareebwa aasi,” shilomo shino shili lubuula shiri, Wele umweene siwaareebwa aasi ta, ne niye umweene niye uwara bibiindu byoosi aasi a Kristo.

²⁸Ne byoosi ni bilimala khuureebwa aasi, lwanyuma umwaana umweene naye alireebwa aasi oyo uwara bibiindu byoosi aasi ewe, nio Wele abe byoosi mu byoosi.

²⁹Ne ni shiba ndi mbaawo khuulamukha ta, babaandu babaafuna khuubatisibwa khulwe baafu, balikhola baryeena? Ne baafu ni baba nga sibalamusibwa ta, lwashiina kila babaandu babatisibwa khu lwaabwe?

³⁰Ni nafwe fwabeene, lwashiina khwiira mu bukosi buli saawa?

³¹Bebuulebe, ise ifwa busheele, shino ishitsuba mus'iinywe nga ni buyila, lwekhuuba mu Kristo Umukasya weefwe, imbebuyililamo naabi.

³²Ise ni nasoolana ni tsisolo mu Efeso nga umuundu bundu busa, shiina sheesi nafunamo? Ne noola baafu sibalamusibwa ta, khayo khulye luundi khunywe, lwekhuuba kumukaamba ni khufwa.

³³Mukhawombesebwa ta! Khuuba basaale ni babaandu be tsisaambo tsiimbi, khwoonakisa tsisaambo tsindayi.

³⁴Ni musisimukhe nga ni mwaakha khuuba, mwakamise khukhwoonaka, lwekhuuba iliwo babaandi bakhamanya Wele ta. Shino ishiloma lwe khubawaambisa inywe tsisoni.

³⁵Ne babaandi banyala bereeba bari, “Ne baafu balamusibwa barye? Ni kimibili kyeesi baliba nakyo kilifwaana kirye?”

³⁶Iwe uli umusilu! N'ubyaala imiitso mwiloba, s'irura ta, khurusakho nga yanyoowele khuufwa.

³⁷Ne isi ubyaala mwiloba iba imiitso bumiitso, khakhulome khuri ili imiitso iye ŋaano namwe imiitso ikiindi, ne akhuba nga ili ni kumubili kwe shiliimwa kukulibawo lwanyuma lwe miitso nga yatsowele ta.

³⁸Ne Wele umweene uwa imiitso kumubili nga n'akana, n'isi buli imiitso akiwa kumubili kwayo kukwakhila.

³⁹Lwekhuuba kimibili kyoosi sikifwaanana ta. Aliwo kumubili kwe babaandu, abawo kwe isolo, abawo kwe binywiinywi, luundi abawo kwe tsinyeeni.

⁴⁰Luundi ndi iliwo kimibili kye mwikulu, ni kimibili kye mu shiibala, ne shiriifwa she kimibili kye mwikulu shiindi, ni neesho she kimibili kye mu shiibala shiindi.

⁴¹Inyaanga ili ni shiriifwa shiindi, ni kumweesi kuli ni shiriifwa shiindi, ni tsinieniesi tsili na shiindi. Ni munieniesi tseene, buli ndweela ili ni bumiliwu bwayo bukhafwaanana ni bwe kiindi ta.

⁴²Ni khulamukha khwe baafu khuliba khuryo; kumubili kukusiikhibwa kuli kukubola ne kukulamusibwa khukhwaama mu bafu kuli kukukhabola ta.

⁴³Mu khusiikhibwa, kumubili sikuba kwe shiriifwa ta, ne kukulamusibwa khukhwaama mu bafu kuba kwe shiriifwa. Kumubili kukuusiikhibwa kusiikhibwa mu butoro, ne kukuulamusibwa khukhwaama mu bafu kulamukhila mu maani.

⁴⁴Kumubili kukuusiikhibwa kuli kwe nyama busa, ne kukuulamusibwa kuli kumubili kwe kumwoyo. Noola iliwo kumubili kwenyama busa, yaakha ibewo ni kumubili kwe kumwoyo.

⁴⁵Nga bibyaronebwa ni biloma biri, “Umuundu uwanyoowa Adamu ekyela shibuumbe shilamu,” ne Adamu umumalilisi wayitsa khuuba Umwoyo uwaana buulamu.

⁴⁶Ne akhuba ndi uwe kumwoyo niye uraangila ta, ne uwe kumubili kwe nyama niye unyoowa, nio lwanyuma uwe kumwoyo.

⁴⁷Adamu uwanyoowa ama mu liiloba lye shiibala, ne Adamu uwe khabili ama mwikulu.

⁴⁸Nga umuundu we mwiloba naaba, shiryo ni babaandu be mwiloba lye mu shiibala ni bafwaana. N'enga umuundu uwama mwikulu n'ali, shiryo ni babaandu be mwikulu nabo nga ni bafwaana.

⁴⁹Ne khukhwaama nga ni khwayila shifwaani sh'oyo uwe mwiloba lye khu shiibala, khuryo khuliyila ni shifwaani sh'oyo uwama mwikulu.

⁵⁰Ne ari, be buulebe, sheesi imanyisa nisho shino ndi, kumubili kwe nyama ni kamafuki sikunyala khusikhila Buyiinga bwa Wele ta, namwe ikwo kukubola sikunyala khusikhila ikwo kukukhabola ta.

⁵¹Bona, imbaboolela shimoonyo: fweesi sikhulifwa ta, ne fweesi khulikalusibwa

⁵²mu khaangu naabi nga shisike she moni ni shikhupakisa. Lwekhuuba ikhoombi imaliilisi n'ilifuura, baafu balilamusibwa nga sibanyala beelayo khubola luundi ta, ni nafwe fweesi khulikalusibwa khaangukho.

⁵³Lwekhuuba kumubili kuno kukubola kwakha kukwaare ukwo kukukhabola ta, naluundi kumubili kukuufwa kuno kukwaare ukwo kukukhafwa ta.

⁵⁴Ne kukubola kuno ni kuliba nga kwaamalile khukwaara ukwo kukukhabola ta, ni kukuufwa kuno ni kuliba nga kwaamalile khukwaara ukwo kukukhafwa ta, nio bibyaronebwa ibyo byoolele bibiloma biri, “Khuufwa khwamilikhile, ni khuwula khwoolelele.”

⁵⁵“Iwe khuufwa, khuwula khwoowo khuli ena? Iwe khuufwa, khutsiinisa khwoowo khuli ena?”

⁵⁶Khuutsiinisa khwe khuufwa khwaama mu shoonako, ni kamaani ke shishoonako kaama mu makaambila.

⁵⁷Ne Wele asiimibwe naabi, ukhuwa ifwe kamaani ke khuuwula, khuubirira mu Mukasya weefwe Yesu Kristo.

⁵⁸Nashiryo, be buulebe bakanwa, ni mwihandalase. Ikhabawo shishiindu shoosi shishibayiyanisa ta. Murabile busheele mu khukhalaabana kimiboraniso ky'Omukasya nga ni mumanya muri, mu Mukasya khukhalaabana khweenywe sikhuli khwa busa ta.