Read lumasaaba 1 Bakorinso 16 Bible Online

1 Bakorinso 16 - lumasaaba bible

1 Bakorinso 16

¹Ne ari bibiwaamba khu bibuusanisibwa khulwe bakhosefu ba Wele babaafukiilila mu Yesu, nanywe ni mukhole nga ni nalakila bafukiilisi boosi be mu Galatiya.

²Khu shifukhu shishinyoowa mu buli sabiiti, buli mutweela khus'inywe akhiile awulekho tsinusu atsibiikhe, khukhwaama khwiibyo byeesi ali nabyo, nio mulekhe khubuusanisa bibiindu nga ise netsile ta.

³Ne nga nolele, indirumana babaandu beesi musiima ni tsibaluwa khuyila biwaanwa byeenywe i Yerusalemu.

⁴Ne noola shilibonekha bulayi ise khuutsya, baliitsya ni nase.

⁵Indiitsa isi muli nga naamalile khuubirira mu Masedoniya, lwekhuuba i Masedoniya nimwo mweesi indibirira.

⁶Ne manya indiramakho ni nanywe khumalakho khaseela, ni lukanile imale ni nanywe bifukhu bye bunyifu, nio manya mwanjeeta lwe khukhwiloosela ni lukyeendo lwase buli osi esi kane intsye.

⁷Ari singana khubabonakho inywe khakyeekhe busa nga nimbira ta, ne nambaasa khumalakho ni nanywe bifukhu bikalikho, nga Umukasya wasiimile.

⁸ Ne indirama mu Efeso khukhwoolesa khu shifukhu sha Pentekote.

⁹Lwekhuuba ekuliwilewo ikhabi ingali naabi iye khuraamba bulayi kumulimo kwa Wele, ikhaba nga babashingilila khukukhola nabo bakali.

¹⁰Timosewo nga wetsile isi muli, ni mubone muri s'abakho ni shishiindu shoosi shishimutaambisa ta, lwekhuuba naye akhola kumulimo kw'Omukasya, nga nase n'ikhola.

¹¹Ikhabawo umuundu yeesi umulekelesa ta, ne ni mumuyeete eloosele mu lukyeendo lweewe ni lukoosi, nio akile akobole is'indi. Lwekhuuba ise atweela ni be buulebe khwaliindiliile khumubona.

¹²Ne bibiwaamba khuwe buulebe Apolo, namwikontselela naabi ndi etse isi muli, ni be buulebe babaandi, ne walekha khukana khukhwiitsilakho ta. Ne n'alifuna imbuka, alinyala khukhwiitsa.

¹³Ni mube meeso, muwandalalile mu khufukiilila, mube ni kamaani.

¹⁴Byoosi byeesi mukhola, mubikholele mu khukana.

¹⁵Ise ndi ni sheesi ngana khubaloomba be buulebe. Mwamanya muri be muungo mwa Sitefanasi nibo babaaba baakiboole khushuukha bekyela bafukiilisi mu Akaya, luundi nga babeene ni bewaanayo khuyeeta bakhosefu ba Wele babafukiilila.

¹⁶Ingana inywe mulondelelatsake buraangilisi bwe babaandu nga bano, na buli muundu yeesi ukhalaabanila atweela ni nafwe.

¹⁷Nekhoyela naabi khukhwiitsa khwa Sitefanasi ni Forutunato, ni Akayiko, lwekhuuba nibo boolelesa ibyo byeesi inywe mukhanyala khukhwoolelesa khu mbuka iyo ta.

¹⁸Ni musaambo iyo, bekhoyesa kumwoyo kwase ni kukweenywe nakwo. Babaandu besaambo nga iyo bakhila khuweebwa lukoosi.

¹⁹Baafukiilisi boosi be mu Asiya babasheesa naabi. Akula ni Pulisikila babasheesa naabi mu Mukasya, atweela ni bafukiilisi boosi babaabuusanila mu ntsu yaabwe.

²⁰Bebuulebe b'eno boosi babasheesa. Ni musheesane mwabeene nga mukwana mu bifuba bulayi mu bukhosefu.

²¹Ise Paulo samweene uronele khuusheesa khuno ni kumukhono kwase.

²²Noola umuundu yeesi s'akana Umukasya ta, n'atsubibwe. Umukasya yiitsa!

²³Bubweela bw'Omukasya Yesu, bube ni nanywe.

²⁴Ni khuukana khwase khube ni nanywe mweesi mu Kristo Yesu. Amiina!