Read lumasaaba 1 Bakorinso 2 Bible Online

1 Bakorinso 2 - lumasaaba bible

1 Bakorinso 2

¹Bebuulebe, ise ni neetsa isi muli mu khubaboolela shimoonyo she bwa ŋali bwa Wele, sinaraambisa bilomo bihangafu, namwe bye buleekele bwe angaaki ta.

²Lwekhuuba ise nakhalawo khuuba ukhamanyakho shishiindu shoosi ta nga ndi ni nanywe, khurusakho khumanya Yesu Kristo yenyene, ne khuminyisa byoosi, khutsaangililwa khweewe khu musalaba.

³Ise ni neetsa isi muli naba umutoro, luundi nga ndi umuri naabi, ni khunikina khukali,

⁴sinaloma inganikha yase ni buurume bwase mu bukyesi bwe babaandu ta, ne khwaba khukhwokesanisa khwe kamaani k'Omwoyo wa Wele mus'iise,

⁵nio khufukiilila khweenywe khulekhe khuba nga khwemile khu makyesi ke babaandu ta, ne khube mu maani ka Wele.

⁶Ne ifwe khukanikhatsaka bye kamakhula isi babaandu babaatsoyile mu khufukiilila, akhuba mu bukyesi bubuurura mu shiibala shino ta, namwe bwe baawuli be kumuboolo kuno, babaatsya khukwa bawewo ta.

⁷Ne ifwe khubaboolela shimoonyo she kamakyesi ka Wele kakaabisibwa, luundi keesi Wele aaŋoonaŋoona khaale khuuba shiriifwa sheefwe, nga ni shiibala shishiili khubuumbibwa ta.

⁸Mbaawo n'umuwuli na mutweela uwe shiibala shino uwamanya shino ta, lwekhuuba iba nga babaashimanyakho khali sibatsaangilila khu musalaba Umukasya uwe shiriifwa ta.

⁹Nga ni sharonebwa shiri: “Sheesi imoni ikhaabonakho, namwe sheesi khukhuru khukhawulilakho ta, namwe sheesi umuundu yeesi akhambaasatsakakho mu mwoyo kweewe ta, nisho shishiindu sheene sheesi Wele aŋoonaŋoonela ibo babamukana.”

¹⁰Ne ifwe, Wele waakhubimbulila n'Umwoyo weewe. Umwoyo uyo aweentselesa buli shiindu shoosi, ni khutubakho ni bimoonyo bya Wele bibiili mukari aasi abweene.

¹¹Lwekhuuba muundu shiina umanya bibyambaaso by'omuundu ukuundi, khurusakho umwoyo w'omuundu umweene uwikhala mu niye? Ni musaambo niyo ndweela, mbaawo umuundu umanya bibyambaaso bya Wele ta, khurusakho Umwoyo wa Wele yenyene.

¹²Ifwe sikhwaweebwa umwoyo we shiibala ta, ne njeeba Umwoyo uwama isi Wele, khuryo nio manya khumanye biwaanwa byeesi Wele akhuwa busa.

¹³Nashiryo, ifwe sikhukanikha mu bilomo bibyaleekelwa ni kamakyesi ke babaandu ta, ne mu bilomo bibyaleekelwa n'Umwoyo nga khubikalusila ibo babaali n'Umwoyo.

¹⁴Umuundu ukhali n'Umwoyo ta, s'amanya biwaanwa bibyaama w'Omwoyo wa Wele ta, lwekhuuba isi niye biba bye busilu, ni naye s'anyala khubimenielesa ta, lwekhuuba itsamu ye biwaanwa ibyo yaama mu Mwoyo mwonyene.

¹⁵Ne umuundu uli n'Umwoyo anyala khukhwimenielesa itsamu ya buli shiindu shoosi, ne mbaawo umuundu yeesi unyala wamwimenielesa niye ta.

¹⁶Nga bibyaronebwa ni biloma biri, “Naanu uwamanya bibyambaaso by'Omukasya, nio anyale khumuwa kamakyesi?” Ne ifwe khwaamanya bibyambaaso bya Kristo.