Read lumasaaba 1 Bakorinso 3 Bible Online

1 Bakorinso 3 - lumasaaba bible

1 Bakorinso 3

¹Bebuulebe, khu luwaande lwase, ise sinanyala khukanikha ni nanywe nga ni nandikanikhile ni babaandu babaali mu Mwoyo ta, ne nakanikha ni nanywe nga babaandu be mu shiibala busa, babaashiili babaana bafwiiti mu bye khufukiilila Kristo.

²Nabanyweesa kamabeele ne akhuba biilyo bibyoomu ta, lwekhuuba khali simwanyalisa ta. Ne ikhaba ari, mushiili khunyalisa ta.

³Lwekhuuba mushiili nga be mu shiibala shino. Niiba nga ishiiliwo libuba mwiinywe, ni khulomana akari enywe, simuba nga mushiili be shiibala? Inywe simwibirisa busa nga babaandu babusheele?

⁴Lwekhuuba umuundu mutweela n'aloma ari, “Ise ndi uwa Paulo,” n'ukuundi ari, “Ise ndi uwa Apolo,” inywe simuba be shiibala busa?

⁵Aso, aluno Apolo niye naanu? Namwe Paulo niye naanu? Akhuba nibo babakaanisi busa ba Wele babaakila inywe mwaafukiilila ta? Buli mutweela khusiifwe aakhola buuraambi nga Umukasya n'amukabila khuukhola.

⁶Ise nabyaala imiitso, Apolo waatsukhiilila kameetsi, ne Wele niye uwakitsowesa.

⁷Nashiryo uyo ubyaala namwe uyo utsukhiilila kameetsi, sibali shikhulu ta, ne khuurusakho Wele utsowesa yenyene.

⁸Umuundu ubyaala ni nooyo utsukhiilila kameetsi, bali ni shitsilililwa shitweela, na buli mutweela alinyoola kumukheemba kweewe, nga esi buuraambi bweewe ni buli.

⁹Lwekhuuba ifwe khuli baraambi mu mulimo kwa Wele, ne inywe muli kumukuunda kwa Wele, naluundi inywe muli shishombekhe sha Wele.

¹⁰Ni lwe bubweela bwa Wele bweesi amba, ise nakhola kumulimo kw'omwombakhi umukhulu narawo kumusiinji, n'umuundu ukuundi niye uli khukhwombekhakho. Ne buli mutweela aakha khuuba umwitsililisi musaambo yeesi ombekha khu musiinji kuno.

¹¹Lwekhuuba shinyala yabayo kumusiinji kukuundi khweesi umuundu yeesi anyala khurawo ta, akhali ukwo kweesi Wele amala khurawo: nikwo Yesu Kristo.

¹²Ne umuundu yeesi uwombekha khu musiinji kuno, nga araambisa izaabu namwe ifeeza, kamabaale ke bukusi bwe angaaki, kimisaala, bunyaasi, namwe kamasaantsa,

¹³kumulimo kwa buli muundu kulimanyikha. Lwekhuuba shifukhu khweesi Kristo alikhalilakho kimisaango shilikwokesanisa. Lwekhuuba khu shifukhu isho, buli buraambi bulyokesanisibwa ni kumulilo, ni kumulilo kulikhaka khubona buraambi shiina bweesi buli muundu akhola.

¹⁴Ne noola buraambi bw'omuundu bweesi ombekha khu musiinji bulekha khwonakisibwa ni kumulilo ta, umuundu uyo alifuna shiwaanwa.

¹⁵Ne noola buraambi bw'omuundu bweesi ombekha khu musiinji bwokhewa, umuundu uyo alifwiilwa, ne umweene aliwonesebwa, ne alifwaana busa nga ubiriire mu mulilo.

¹⁶Inywe simwamanya muri muli lisaayilo likhulu lya Wele, luundi n'Umwoyo wa Wele ekhala mus'iinywe ta?

¹⁷N'umuundu yeesi uwoonakisa lisaayilo likhulu lya Wele, naye Wele alimuhesa, lwekhuuba lisaayilo likhulu lya Wele likhosefu, ni nanywe mwabeene muli lisaayilo lyeene.

¹⁸Umuundu yeesi akhewombesa umweene ta. Noola umuundu yeesi eyambaasakho umweene khuuba umukyesi nga shiibala shino ni shili, aakha wekyela umusilu, nio ekyele umukyesi.

¹⁹Lwekhuuba kamakyesi ke shiibala shino, kali busilu isi Wele, nga ni sharonebwa shiri: “Wele awaambisa bakyesi mu bukyesikyesi bwaabwe.”

²⁰Naluundi sharonebwa ahaandi shiri: “Umukasya waamanya ari bibyambaaso bye bakyesi, mbaamo shiindu ta.”

²¹Nashiryo umuundu yeesi akhebuyila lw'ebyo byeesi babaandu bakhola ta, lwekhuuba byoosi bibyeenywe.

²²Oba Paulo, namwe Apolo, namwe Kefa, namwe shiibala, namwe buulamu namwe khuufwa, namwe bibiiliwo ari, namwe bibiitsya khubawo, byoosi bili bibyeenywe.

²³Ni nanywe muli ba Kristo, ni Kristo niye ali uwa Wele.