Read lumasaaba 1 Bakorinso 4 Bible Online

1 Bakorinso 4 - lumasaaba bible

1 Bakorinso 4

¹Ni nashiryo, babaandu baakha khuukhubona ifwe nga babakaanisi ba Kristo, naluundi nga baaloleleli be bimoonyo bya Wele.

²Ni shishiindu shitweela shishaakhila umuloleleli nisho khuuba umwiyikinwa isi umukoosi weewe.

³Ise sininaanayo naabi inywe, namwe umuundu ukuundi yeesi khukhukhalila ise kumusaango ta, ni nase samweene shinikhalila kumusaango ta.

⁴Lwekhuuba ise siniwulila kumusaango mu mwoyo kwase ta. Ne shino sishimanyisa shiri ndi umulayi ta. Ne uyo ukhala kumusaango kwase niye Umukasya.

⁵Nashiryo, mukhakhalatsaka kumusaango kwoosi nga imbuka inyene ishiili khwoola ta, ni muliinde khukhwoolesa Umukasya weefwe n'aliitsa. Niye alimulisa buwaanga khu biindu ibyo bibyabisibwa, bibiili mu shilima, luundi okesane bibyambaaso bya buli mutweela bibiili mu mwoyo kweewe. Ni khu mbuka nyeneyo, buli mutweela aliweebwa shiriifwa sheewe khukhwaama isi Wele.

⁶Ni mu bino bebuulebe, naalekhaanisile bibiindu bino byoosi khu Apolo ni khusiise samweene, khulwe buulayi bweenywe, nio akile mwiyikile khusiifwe lwe bibyaronebwa bibiloma biri: “Mukhebiririsa mwaatsya ibulafu we kamakaambila ta.” Umuundu yeesi alekhe khukhwibuyila khulw'omuundu mutweela, ne waleekelesa ukuundi ta.

⁷Naanu uwakhwikyelisa iwe umukhulu khu baandi? Shiina sheesi uli nasho sheesi ukhaweebwa? Ne noola waweebwa, lwashiina wibuyila nga ukhaweebwa busa shiwaanwa?

⁸Ne lola, ari muli nga babaamalile khaale khuufuna bye mukana! Muli nga babaamalile khaale khuuyindila! Mwekyelile khaale bayiinga ikhaba nga ifwe sikhuli bayiinga ta. Ni nase nandikanile ndi khali mwaba bayiinga babeene, nio manya nafwe khuba bayiinga atweela ni nanywe.

⁹Lwekhuuba shibonekhana nga Wele waakhuwa ifwe khukhuuli baarume shiifwo shimaliilisayo nga babaandu babafuuriwile kumusaango, bakhaliwila kwe khuufwa mu lubuula. Khwaabeele she khuulolakho isi shiibala shoosi, isi bamalayika, n'isi babaandu.

¹⁰Khulwa Kristo ifwe khuli nga baasilu, ne inywe muli nga bakyesi mu Kristo. Ifwe khuli baatoro, ne inywe muli be kamaani. Inywe muli mu shiriifwa ne ifwe khutsekhelelwa busa.

¹¹Ni khukhwoola khu saawa yino, khuli ntsala naluundi khuli bulesa, khukwaara bitsina, khukhupiwa, luundi khuutsya iyi ni naayi.

¹²Khuraamba fwabeene ni kamakhono keefwe. Bakhoma ne ifwe khuwa tsikhabi. Ni bakhukubyeenga ifwe khwikhalilikha.

¹³Nibo bakhuyina, ifwe khwiilamo ni buwolu. Ni khukhwoola khu saawa yino, ifwe khwayikyela nga kamasanikho ke buumbi, bibiindu busa bye shiibala.

¹⁴Ise s'indikhurona bino khubawaambisa inywe tsisoni ta, ne njeeba, khubakaambila inywe nga babaana baase bengana.

¹⁵Lwekhuuba ikhaba nga muli ni baloleleli bakali mu Kristo, ne simuli ni ba paapa bakali ta, lwekhuuba mu Kristo Yesu, ise niye paapa weenywe, uwabareerera kamakhuuwa kamalayi.

¹⁶Shikila imbekontselela ndi, mulondelele she khuubonelakho shase.

¹⁷Ni lwe lomo yino, imbarumila Timosewo, niye umwaana wase umweene, esi ingana, luundi umwiyikinwa mu Mukasya. Niye alibakhebusa lukyeendo lwe buulamu bwase mu Kristo Yesu, nga esi indeekela oosi oosi, isi babaandu ba Wele baba.

¹⁸Ne aliwo babaandi mwiinywe babebuyila nga bambaasa bari shingene niitse imbakyeniyile ta.

¹⁹Nga Umukasya wakanile, indiitsa isi muli khaangu, ni nase samweene indibona, akhuba sheesi babaandu bano babebuyila banyala khuloma bulomi ta, ne isho sheesi banyala khukhola.

²⁰Lwekhuuba Buyiinga bwa Wele sibuli bwe khuloma bulomi busa shonyene ta, ne buli bwe kamaani.

²¹Shiina sheesi inywe mukhalawo? Mukana ise niitse ni miimbo isi muli, namwe mu khukana ni kumwoyo kumuwolu?