Read lumasaaba 1 Bakorinso 5 Bible Online

1 Bakorinso 5 - lumasaaba bible

1 Bakorinso 5

¹Ari ise mbulila shilomewa shiri, iliwo tsisaambo tsiimbi tse buyeyani mwiinywe, tsitsikhanyala ni khunyoolekhana mu baandu Banaambo ta! Imbulila bari iliwo umuundu wutsya waba n'umukhasi wa paapawe.

²Muryo khana mwibuyila busa? Khali mubeele mu mutaambo! Ni nooyo ukholele isho arusibwa mu lubusano lweenywe.

³Lwekhuuba ise na khaba nga s'indiyo mu mubili ta, ne indiyo mu mwoyo; ni mu Lisiina ly'Omukasya Yesu Kristo, namalile khaale khukhalila umuundu uyo ukholele shishiindu shiibi shino kumusaango, nga ifwanikhana nga uli atweela ni nanywe.

⁴Ne ni muba nga mwabuusanile atweela mu lisiina ly'Omukasya weefwe Yesu, ni nase nga ndiyo ni nanywe mu mwoyo, ni kamaani k'Omukasya Yesu nga kaliwo ni nafwe,

⁵mwakha khuwayo umuundu uyo isi Sitaani, nio bibyoonako byeewe bye kumubili byoonakisibwe, nio akile kumwoyo kweewe kunyale khuwonesebwa khu shifukhu sh'Omukasya.

⁶Khukhwibuyila khweenywe sikhuli khulayi ta. Inywe simwamanya muri kamamela makyeekhe kari, kakila buufu bwoosi bwasiila ta?

⁷Ni murusemo kakamela kano ke khaale ke shishonako, nio akile mube bakwalaafu ilala, nga buufu bukhalimo kamamela ta, luundi namanyile ndi muli muryo. Lwekhuuba Kristo, nga niye kamayiiya keefwe kakalaangibwa ke Khuubirakho waamalile khuwaanibwayo.

⁸Ni nashiryo khayo khwikhoye lwe kamayiiya keefwe, akhuba ni kamamela ke khaale, kamamela ke lirima ni buubi ta, ne ni kumukaati kukhalimo kamamela ta, nikwo kumukaati kwe bwa ŋali, mumukhalimo khukhwiwombesa ta.

⁹Ise naamala khaale khuubaronela mu baluwa yase, nga mbaloma ndi, mulekhe khukhwitubaasa ni babaandu bayeyani ta.

¹⁰Ne sinaba imanyisa ibo bakafwiili babamenya mu buyeyani, namwe be kumuluungo, namwe babiifwi, namwe babisaaya bifwaani ta, lwekhuuba ni shiba shiryo, khali mubeele babarurira ilala mu shiibala shino.

¹¹Ne sheesi nakana nisho shaba ndi, mulekhe khutubaana n'umuundu yeesi uwilaanga uwe buulebe, ne nga ali umuyeyani, namwe uwe kumuluungo, namwe nga esaaya bifwaani, namwe ukhomaka, namwe umumeesi, namwe umunuuli. Ni khukhwikhala aasi, mukhekhala mwalya n'umuundu ufwaana aryo taawe.

¹²Kuli mulimo kwase ise khuukhalila abo babaali ibulafu we bafukiilisi kumusaango? Ne inywe simuli ni khuukhalila kumusaango abo babaali mu ntsu ye khuufukiilila?

¹³Wele niye ulikhalila be bulafu kumusaango. Bibyaronebwa biloma biri, “Umuundu umubi ni mumuruse mwituuli lyeenywe.”