Read lumasaaba 1 Bakorinso 6 Bible Online

1 Bakorinso 6 - lumasaaba bible

1 Bakorinso 6

¹Ne umuundu yeesi mwiinywe naaba ni lomo yoosi isi uwashe, anyala aryeena khuutsya welootsela babaakhali babeyikinwa ta, mu shifwo she khuutsya isi bakhosefu?

²Inywe mushiili khumanya muri, bakhosefu nibo babaalikhalila shiibala kumusaango ta? Aso, noola inywe mulikhalila shiibala kumusaango, simunyala inywe mwabeene khukhala busaango bukyeekhe ta?

³Inywe simumanya muri, ifwe khulikhalila ni bamalayika kumusaango ta? Ne shiba shiryeena ifwe khuukhaasikha mu biindu bye mu bulamu buno?

⁴Ne ni muba ni kimisaango kyesaambo nga yino, munyala muryeena khukiyila isi babaandu be bulafu, babaakhalikho ni sheesi bamanyile mu baandu ba Wele ta?

⁵Shino ishiloma nio imbawaambise inywe tsisoni. Ne shinyalikha mwiinywe khutaambamo umuundu unyala khukaya be buulebe?

⁶Ne uwe buulebe atsya khuwotsa n'uwe buulebe, nga ubakaya niye umukayi ukhali umufukiilisi ta!

⁷Ni shibonekha shiryo shiri muli ni kimisaango akari mwiinywe, shimanyisa shiri mwaamalile khaale khukhasikhana. Inywe simumaaya mwaba nibo besi babirisa buubi? Namwe inywe mwamaaya mwaba babanuulibwa?

⁸Ne inywe mwabeene muli bababirisana buubi, luundi mwanuulana mwenyene na mwenyene, ate nga shino mushikhola khu be buulebe beenywe babeene.

⁹Inywe mushiili khumanya muri babaandu babaakhali babeyikinwa ta, si balisikhila Buyiinga bwa Wele ta? Mukhawombesebwa ta, babaandu be kumulyuulyu, namwe babesaaya bifwaani, namwe bayeyani, namwe basaani babakona ni basaani bashaabwe,

¹⁰namwe babiifwi, namwe be kumuluungo, namwe bameesi, namwe babaakhomyaasaka, namwe banuuli, sibalisikhila Buyiinga bwa Wele ta.

¹¹Ni babaandi khusiinywe mwaba muryo, ne mwasiingiwa, mwekela bakhosefu, mwakwalaasibwa mu lisiina ly'Omukasya Yesu Kristo, n'Umwoyo wa Wele weefwe.

¹²Inywe muloma muri, “Bibiindu byoosi bifukiilisibwa isiise,” ne sibili byoosi biyeeta ta. Nase nyala naloma ndi, bibiindu byoosi bifukiilisibwa isiise, ne ise sifukiilila khuwuliwa ni shishiindu shoosi ta.

¹³N'umuundu ukuundi aloma ari, “biilyo biliwo lw'enda, n'inda iliwo lwe biilyo”, ne Wele alihesa byoosi, inda ni biilyo byeene. Ni kumubili kw'omuundu sikuliwo lwe buyeyani ta, ne khulw'Omukasya, n'Umukasya aliwo khulwe kumubili.

¹⁴Wele aalamusa Umukasya mu bafu, ni nafwe aryo alikhulamusa lwe kamaani keewe.

¹⁵Inywe simumanya muri kimibili kyeenywe kili bisiintsa bya Kristo? Ise inyala naabukula bisiintsa bye kumubili kwa Kristo, naabitubaasa khu malaaya? Sishinyalikha ta!

¹⁶Inywe simumanya muri umuundu yeesi uwitubaasa ni malaaya ekyela kumubili mutweela ni naye ta? Lwekhuuba nga ni sharonebwa shiri: “Babili balikyela kumubili mutweela.”

¹⁷Ne uyo uwitubaasa n'Umukasya, aba butweela ni naye mu mwoyo.

¹⁸Ni mutataye buyeyani. Buli shoonako sheesi umuundu akhola shiba ibulafu we kumubili kweewe. Ne uyo uwoneka mu buyeyani, oneka kumubili kweewe kumweene.

¹⁹Inywe simumanya muri, kumubili kweenywe nikwo lisaayilo likhulu ly'Omwoyo Umukhosefu esi mwaweebwa ni Wele ta? Simuli khu lweenywe mwenyene ta,

²⁰ne mwakuliwa ni bukusi. Nashiryo, ni muwe Wele shiriifwa mu mibili kyeenywe.