Read lumasaaba 1 Bakorinso 7 Bible Online

1 Bakorinso 7 - lumasaaba bible

1 Bakorinso 7

¹Ne bibiwaamba khu lomo tseesi mwarona. Shili shilayi umuundu khuulekha khuyila umukhasi ta.

²Ne lwekhuuba ndi iliwo khuukhonjelesebwa khukhuukila umuundu waakwa mu buyeyani, shaakhila buli musaani khuuba n'umukhasi weewe, n'umukhasi naye abe n'umuseetsa weewe.

³Buli museetsa aakha khukhwoolelesa bibimwaakhila isi umukhasi weewe, n'umukhasi naye aryo isi umuseetsa weewe.

⁴Lwekhuuba umukhasi s'ali niye uwula kumubili kweewe yenyene ta, ne njeeba umuseetsa weewe; n'umuseetsa s'ali niye uwula kumubili kweewe yenyene ta, ne njeeba umukhasi weewe.

⁵Babaandu babaali bakhwaalikhe, mukheyimanatsaka ta, khurusakho nga mwanyoowele khufukiilisana khu mbuka, nio munyale khukhwiwaanayo mu khuloomba. Ne lwanyuma mwileyo mwitubaase luundi, mulekhe khukhonjelesebwa ni Sitaani, lwe khulekha khunyala khukhwiwula mwabeene ta.

⁶Shino ishiloma ndi munyala mwaafukiilisana, ne akhuba nga likaambila ta.

⁷Ne abe ise nandikanile ndi babaandu boosi khali babeele nga ise. Ne lwekhuuba buli muundu ali ni shiwaanwa sheewe khukhwaama isi Wele: mutweela ali ni na shino, n'ukuundi isho.

⁸Isi abo babaakhali bakhwaalikhe ta, ni banamulekhwa, ise inoma ndi: shilayi nibo khuurama busa nga ise.

⁹Ne noola sibanyala khukhwiwula babeene ta, baakha bakhwe namwe bakhwalikhe, lwekhuuba shilayi khuukhwa namwe khukhwalikha khuminyisa khukyendaana busa.

¹⁰Ne isi bakhwaalikhe imbawa likaambila lino, akhuba ise ta, ne Umukasya umweene: umukhasi umukhwaalikhe s'akha khurura w'omuseetsa weewe ta.

¹¹Ne noola arurayo, aakha khuurama busa, namwe akoboleyo atubaane n'umuseetsa weewe; n'umuseetsa naye s'akha khuwoona umukhasi weewe ta.

¹²Ne isi babaaramile boosi, ise imbaloma khu lwase, ne akhuba Umukasya ta; indi noola iliwo uwe buulebe yeesi uli n'umukhasi ukhali umufukiilisi ta, ne wafukiilila khumenya ni naye, s'akha khumuwoona ta.

¹³Naluundi, noola umukhasi umufukiilisi ali n'umuseetsa ukhali umufukiilisi ta, ne ndi umuseetsayo waafukiilila khuumenya ni naye, umukhasi uyo s'akha khumururakho ta.

¹⁴Lwekhuuba umuseetsayo ukhali umufukiilisi, asiimibwa mu moni tsa Wele khulw'omukhasi weewe. N'umukhasi ukhali umufukiilisi uyo naye asiimibwa mu moni tsa Wele khulw'omuseetsa weewe. Ne shino ni shilekha khuba shiryo, khali babaana baabwe babeele babaalikho shiibi; ne nga ni shili bali bakhosefu.

¹⁵Ne noola mutweela ukhali umufukiilisi khu babili bano n'akana khukhwawukhana khu washe, khashibe shiryo. Umusaani namwe umukhasi umufukiilisi aba ali ni lukoosi khurobolawo shakana lwekhuuba ifwe Wele wakhulaanga khumenya mu lukoosi.

¹⁶Lwekhuuba iwe umukhasi umufukiilisi umanya uryeena uri s'uliwonesa umuseetsa wo ta? Ni nawe umuseetsa, umanya uryeena uri s'uliwonesa umukhasi wo ta?

¹⁷Buli muundu naabe mu shifwo sheewe nga Wele n'amuwa, naluundi abe nga esi Umukasya amulaangila. Shino ishilomela babaandu ba Wele boosi babafukiilila mu Yesu.

¹⁸Noola iliwo umuundu uwalaangiwa nga wayinjila imbalu, nalekhe khukhola nga ukhenjila ta. Noola iliwo umuundu uwalaangiwa nga ali umusiinde, alekhe khukhwinjila imbalu ta.

¹⁹Lwekhuuba khukhwinjila imbalu namwe khulekha khwinjila imbalu, sishili shiindu ta, ne khuliinda kamakaambila ka Wele, nisho shishiindu shikhulu.

²⁰Buli muundu n'arame nga khu shifukhu sheesi afukiilililakho nga Wele wamulaangile.

²¹Iwe waba uli umukulwa nga ni walaangiwa? Ukhenaanayo ta. Ne noola unyala khunyoola ikhabi iye khukangululiwa, raambisa ikhabi iyo.

²²Lwekhuuba uyo uwalaangibwa nga ali umukulwa, ali umuundu umukangulule w'Omukasya. Aryo ni nooyo uwalaangiwa nga ali umukangulule, ali umubowe wa Kristo.

²³Wele abakula inywe ni bukusi, nashiryo mukhaba bakulwa be babaandu ta.

²⁴Bebuulebe, buli muundu naabe mu busaale ni Wele musaambo iyo yeesi abamo nga Wele n'amulaanga.

²⁵Ne ari bibiwaamba khu bakhali bakhwalikhe ise s'indi ni likaambila khukhwaama isi Umukasya ta, ne imbawa shishambaaso shase, nga umuundu esi Wele eyikina lwe bubweela bweewe.

²⁶Ise nambaasa ndi, lwe bikosi bibiliwo ari, shiba shilayi umusaani khuuba busa nga n'ali.

²⁷Iwe wayila umukhasi? Ukhaweentsa khumuwoona ta. Iwe ari uli busa? Ukhaweentsa khuukhwa ta.

²⁸Ne n'uba umukhwaalikhe s'uba wonakile ta. N'umukhasi ukhali umukhwaalikhe nakhwalikha, naye s'aba wonakile ta. Ne babaandu babaakhola baryo, banyoola bihangafu mu shiibala. Ne ise ngana imbawonese inywe bibyeene ibyo.

²⁹Bebuulebe, sheesi imanyisa nisho shino ndi, imbuka yaaramile ifwiiti. Ni khukhwaama ari, abo babaali ni bakhasi, khali babeele nga babaakhali ni bakhasi ta.

³⁰Ni naabo babaalila babe busa nga babaakhali khuulila ta. Abo babekhoya babe busa nga babaakhekhoya ta. Ni naabo babakula babe nga babaakhali ni bibiindu byeesi bakulile ta.

³¹Ni naabo babaraambisa bibiindu bye shiibala bafwane nga babaakhayilibwa ni nabyo ta. Lwekhuuba shiibala shino nga ni shili shitsya khuwawo.

³²Ni nase ngana inywe mulekhe khukhwiyembelela ta. Umuundu ukhali n'umukhasi ta eyembelela by'Omukasya, ni saambo isi anyala khukhwikhoyesamo Umukasya.

³³Ne umuundu uli n'umukhasi, eyembelela lwe bye shiibala shino, isaambo isi kane ekhoyesemo umukhasi weewe.

³⁴Ni nashiryo, niye aba wawukhanilemo khabili. Ne umukhasi ukhali umukhwaalikhe ta namwe indungubaasi, eyembelela by'Omukasya. Shitsilililwa sheewe shiba khukhwiwaanayo mu bukhosefu isi Umukasya mu mubili ni mu mwoyo. Ne umukhasi umukhwaalikhe eyembelela bye shiibala shino, isaambo isi kane ekhoyesemo umuseetsa weewe.

³⁵Ise inoma bino lwe bulayi bweenywe, akhuba ndi ngana khubabowa bubowi ta, ne lwe bulayi nio manya mwakaanisatsake Umukasya yenyene akhali khutitila ta.

³⁶Ne umuundu yeesi n'ambaasa ari s'ali khukhola bulayi isi umukhaana esi aselela ta, khuumanya nga kumubili kweewe kumuli shifwaabi, ate nga ni shaakha khuuba, umuundu uyo aakha khuukhola nga n'akana; bayilane. Sishili shishoonako ta.

³⁷Ne umuundu yeesi umalilile mu mwoyo kweewe, akhuba nga awanyinyibwa ta, nga aloma ari s'akana khuukhwa ta, nga wawuliile kumubili kweewe, ni khukhalawo mu mwoyo kweewe ari s'akane ayile umukhasi ta, umuundu uyo aba wakholile bulayi.

³⁸Nashiryo uyo ukhwa umukhaana, akhola buulayi, ne uyo ukhakhwa ta, akhola buulayi khufuurisakho.

³⁹Umukhasi umukhwaalikhe abowebwa khu museetsa weewe, n'aba nga ashiili mulamu. Ne umuseetsa weewe n'afwa, aba ali ni lukoosi khukhwalikha khu museetsa ukuundi isi akana. Ne umusaani uyo aakha khuuba mu Mukasya.

⁴⁰Ne mu khubona khwase, ise nambaasa ndi, umukhasi uyo n'arama busa yenyene, aba ni kumwikhoyo kumukali khufuurisakho n'akhwaalikha luundi. Iyo niyo intsambaasa yase naluundi nase nambaasa ndi indi n'Umwoyo wa Wele.