Read lumasaaba 1 Bakorinso 8 Bible Online

1 Bakorinso 8 - lumasaaba bible

1 Bakorinso 8

¹Ne bibiwaamba khu biliibwa bibiwaanibwayo isi bifwaani: khwaamanyile khuri fweesi khuli ni khumanya. Ne khumanya khwesaambo iyo khukila umuundu weyiingayiinga, ne khukana nikhwo khukhwombekha.

²Umuundu uwaambaasa ari wamanya, aba ashiili khumanya shishiindu shoosi nga ni shimwakhila khumanya ta.

³Ne umuundu ukana Wele, umweeneyo amanyikha isi Wele.

⁴Ne khu bilomo bye khuulya bibiliibwa bibiwaanibwayo isi bifwaani: Ifwe khwaamanya khuri shifwaani sishili shiindu mu shiibala ta, luundi khuri mbaawo Wele ukuundi ta, khurusakho Wele mutweela yenyene.

⁵Abe ikhaba nga iliwo ibyo bibilaangibwa ba wele mwikulu namwe khu shiibala (nga n'iliwo ba wele bakali, ni bakasya bakali),

⁶ne isi ifwe, iliwo Wele mutweela yenyene, niye Paapa mu niye mwamamo bibiindu byoosi, ni khu bw'omweeneyo, ni nafwe khuliwo. Naluundi iliwo Umukasya mutweela yenyene niye Yesu Kristo. Khuubirira mu niye bibiindu byoosi byabawo, ni naye niye ukila khwabawo.

⁷Ne sishili ndi buli muundu waamanya shino ta. Babaandu babaandi baanaliila bifwaani khukhwoolesa ari, babeen'abo ni balya bibiliibwa bibiwaanibwileyo isi bifwaani, lwekhuuba kimyoyo kyaabwe mitoro, boonakisibwa lwe bibiliibwa ibyo.

⁸Ne bibiliibwa sibinyala khukhusyendesa ifwe aambi ni Wele ta. Mbaawo sheesi khufwilwa ni khulekha khubilya ta, namwe mbaawo sheesi khuloosewelakho singa khubilya ta.

⁹Ne ni mwitsililise, lukoosi lweenywe ulwo lulekhe khuuba shishibaseya isi batoro ta.

¹⁰Lwekhuuba umuundu yeesi uli umutoro mu mwoyo n'akhubona iwe, uli ni khumanya khuno, nga uliila mwisaayilo lye bifwaani naye s'alikhonjelesebwa khuulya bibiwaanibwayo mwisaayilo lye bifwaani?

¹¹Nashiryo lwe kamakyesi koowo umuundu yuno umutoro, uwe buulebe woowo, esi Kristo afwililila, onakisibwa wahela.

¹²Ni musaaambo iyo, n'uba wonakile isi be buulebe, luundi weloosela khutolwasa kimyoyo kyaabwe kimitoro, uba wonakile isi Kristo.

¹³Nashiryo, noola biilyo byeesi ndya bikila uwe buulebe waakwa, indyo sindiilya bibiliibwa ibyo luundi ta, indekhe khureerera uwe buulebe khuukwa mu bwoonaki ta.