Read lumasaaba 1 Bakorinso 9 Bible Online

1 Bakorinso 9 - lumasaaba bible

1 Bakorinso 9

¹Ise s'indi umuundu umulekhuule ta? Ise s'indi umurume ta? Ise sinaabona Umukasya weefwe Yesu ta? Inywe simuli buraambi bwase mu Mukasya ta?

²Ise noola s'indi umurume isi babaandu babaandi ta, ilala isiinywe, ndi umurume. Lwekhuuba inywe nibo babaŋaŋasa buurume bwase mu Mukasya.

³Isi abo babaantsimenielesa ise, mu khukhwiilamo khwase ise imbalomela indi:

⁴Ifwe sikhwaakha khuulya ni khuunywa ta?

⁵Ifwe sishikhwakhila khukyenda n'umukhasi umufukiilisi, nga babaandi khu baarume ni bakhola, ni khurakho ni babandaaye b'Omukasya, ni Kefa?

⁶Namwe shili ndi ise ni Balunaba fwenyene khukhwakha khuraambilila bye buulamu bweefwe?

⁷Naanu uwawulilakho umusilikhale uwe kamaye wutsya mu busoolo khulweewe nga esasulila? Namwe mulimi shiina uba ni kumukuunda kweewe, ne walekha khulyamo bibyaamo byamwo ta? Namwe mwaayi shiina uwaaya bibyaayo byeewe, ne walekha khunywamo kamabeele kamwo ta?

⁸Inywe mwaambaasa muri, inoma bino nga umuundu busa mu bunyala bwase, namwe likaambila nalyo liloma liryo?

⁹Lwekhuuba sharonebwa mu makaambila ka Musa shiri: “Ukhabowatsaka kumunwa kwe iyeeyi, nga iwuula buulo ta.” Inywe mwaambaasa muri, iyeeyi niyo isi Wele enaanakho?

¹⁰Nga Wele n'aloma aryo, aba s'alikho amanyisa ifwe? Ilala sharonebwa khulweefwe, lwekhuuba umuundu ulima ni nooyo uwuula buulo, baakha khuraamba nga beyikina khufunakho.

¹¹Ni nafwe khwabamiitsamo imiitso iye kumwoyo, shibeyaangisa noola ifwe khubakyesamo bye kumubili?

¹²Noola iliyo babaandu babaandi babaali ni lukoosi khubafunamo, ifwe sikhwandifuurirekho nibo? Ne ifwe sikhwaraambisa lukoosi ilwo ta, ne khwekhalilikha byoosi, nio akile khulekhe khureera shishiindu shishishinjilila Kamakhuuwa Kamalayi ka Kristo ta.

¹³Inywe simumanya nga, ibo babakaanisa mu Lisaayilo Likhulu, banyoola byakhulya byaabwe mu lisaayilo lyeene? Ni naabo babakaanisa khu sheeso bakabananila atweela khu bye khu sheeso bibiwaanibwayo?

¹⁴Ni musaambo iyo, Umukasya walakila ari, bababoolela Kamakhuuwa Kamalayi, baakha banyoole bibibayeeta mu bulamu bwaabwe, mu khuboolela Kamakhuuwa Kamalayi keeneko.

¹⁵Ne ise nakhuraambisa tsikhabi tsino tsoosi ta, namwe sinabaroneele bino ndi nio munjeete ta. Ne shandiminyisile ise khuufwa, khufuura umuundu yeesi khukalusa khukhwibuyila khwase khuno khuuba khwabusa.

¹⁶Lwekhuuba ise ni mboolela Kamakhuuwa Kamalayi, sishintsakhila ise khukhwibuyila ta, indyo naakha khuboolela. Ne she kumutaambo, noola ise ndekha khuboolela Kamakhuuwa Kamalayi.

¹⁷Ise noola ikhola shino lwe khuukana khwase, niyikina khunyoola kumukheemba kwase, ne noola akhuba nga ise samweene ningana ta, buno buba bufunisi bubwambeebwa.

¹⁸Ne kumukheemba kwase nikwo kuli eena? Nikwo kuno: mu khuboolela khwase, inyale khuboolela Kamakhuuwa Kamalayi busa, indekhe khubaantsa bibintsakhila mu mulimo kwase kweene kwe khuboolela Kamakhuuwa Kamalayi ta.

¹⁹Lwekhuuba ise nakhaba nga ndi umulekhuule, ne samweene naayikalusa khuuba umukulwa isi boosi, nio manya inyale khukhweeselesa bakali.

²⁰Isi Bayudaaya nakalukha naaba Umuyudaaya, nio akile inyale khukhweeselesa Bayudaaya. Isi abo babaawulibwa ni kamakaambila, nase nekyela nga uwulibwa ni kamakaambila, ikhaba nga ise samweene s'indi aasi e kamakaambila ta, nio akile inyale khukhweeselesa ibo babawulibwa ni kamakaambila.

²¹N'isi abo babaakhawulibwa ni kamakaambila, nase nekyela nga ukhawulibwa ni kamakaambila (akhuba ndi, ise s'indi uwulibwa ni kamakaambila ka Wele ta, ne ise imbulibwa ni kamakaambila ka Kristo), nio inyale khukhweeselesa abo babaakhawulibwa ni kamakaambila ta.

²²Isi baatoro, nekyela umutoro, nio inyale khukhweeselesa baatoro. Ise naayikyela buli shishiindu shoosi, isi boosi, nio inyale khuwonesakho babaandi khu nibo.

²³Ne bino byoosi nabikhola lwe kamakhuuwa kamalayi, nio manya nase ingabane khu khabi tsako.

²⁴Inywe simumanya muri abo babaatima tsindimo nga basindana, mutweela yenyene niye unyoola shiwaanwa? Ni nanywe ni mutime muryo nio munyale khunyoola shiwaanwa.

²⁵Ne buli mutweela uba mu masindano ke tsindimo, khunyoowa etsililisa mu byoosi, nio afune lihabi lilyonekha wangu, ne ifwe khulifuna lihabi lilikhoonekha ta.

²⁶Isho nisho shishikila nase indima ndyo, akhuba nga utima busa ta, luundi isoolana ndyo, ne akhuba nga usoolana busa ta.

²⁷Ne nitsiinisa kumubili kwase, luundi inguwulila ilala, nio nga naamalile khuboolela babaandi, ise samweene indekhe khuuba ukhasiimibwa ta.