Read lumasaaba 2 Bakorinso 1 Bible Online

2 Bakorinso 1 - lumasaaba bible

2 Bakorinso 1

¹Ise Paulo umurume wa Kristo Yesu, lwe khuukana khwa Wele, ni Timosewo uwe buulebe weefwe. Buurume buno butsya isi babaandu ba Wele babaali mu Korinso, atweela ni bakhosefu boosi babaali mu Akaya mwoosi.

²Bubweela ni lukoosi bibyaama isi Wele Paapa weefwe n'isi Yesu Kristo, bibe is'inywe.

³Wele Paapa w'Omukasya weefwe Yesu Kristo, Paapa uwe shiisa shoosi, luundi Wele uwe buyeeti bwoosi, asiimibwe naabi.

⁴Niye ukhuyeeta ifwe mu bikosi byeefwe byoosi, nio nafwe khunyale khuyeeta babaandi babaali mu bikosi bibikhali bitweela ta, nga khuraambisa khuyeeta nafwe khweesi khuyeetebwele ni Wele.

⁵Lwekhuuba nga khutaambisibwa khulwa Kristo ni khwiloosela khubiririra, ifwe khutaambisibwa ni naye. Ni musaambo nyeneyo, ni khuyeetebwa khweefwe khwilooselela mu Kristo.

⁶Ifwe noola khutaambisibwa, khutaambisibwa lwe khuyeetebwa khweenywe ni buwonesi bweenywe. Ne noola khuyeetebwa, nanywe muryo shikholebwa lwe khuyeetebwa khweenywe, inywe muweebwa kamaani khukhwikhalilikha bukosi, nga bweesi nafwe khuli nabwo.

⁷Ifwe khubalimo lisuno naabi, lwekhuuba khwaamanya khuri nga ni mutaambisibwila atweela ni nafwe, muryo mulisangaalila mu mwikhoyo kweefwe.

⁸Mu khuloma bino be buulebe, khukana khubakhebusa bikosi byeesi khwaakanana mu Asiya. Bisiro bibyakhubakho byaaba biboofu luundi bisiro lukali, ni kumwiyikino kwe buulamu buno kwakhuwamo.

⁹Ifwe khwaba khwaambaasa khuri baamala khukhuukhalila kumusaango kwe khuufwa, ne shino shabawo nio khulekhe khukhwiyikina ifwe fwabeene ta, ne nio khwiyikine Wele ulamusa baafu.

¹⁰Wele uwakhuwonesa ifwe khukhwaama mu bukosi buubi naabi bwe khuufwa, luundi aryo alikhuwonesa. Ilala ifwe khwara kumwiyikino kweefwe mu niye khuri kane eloosele khukhuwonesa,

¹¹inywe nga ni muba nga mukhuyeeta ifwe ni khuloomba khweenywe. Nashiryo bakali baliwaanayo khusiima khulweefwe, lwe tsikhabi tsitsikhuwebwile, tsitsaama mu khuloomba khwe babaandu bakali.

¹²Ne aliwo shishiindu shishikhwibuyilisa, nisho shino; khuumanya khwe mukari khwe mu myoyo kyeefwe, khuŋaŋasa khuri, khukhwibirisa khweefwe mu shiibala muno khubeele khulayi, ni khufuurira ilala butweela bweefwe ni nanywe, bubeele bufukiwila mu bukhosefu ni bubweela bubwama isi Wele, lwe kamaani ke shiisa sha Wele, ne akhuba mu makyesi ke shiibala ta.

¹³Lwekhuuba ifwe sikhubaronela shishiindu shoosi sheesi mukhanyala khukhwisomela namwe khumanya ta; ni nase niyikina ndi,

¹⁴khukhwaama nga ni mumanyilekho ari shisiintsa busa, kane mubimanyile ilala muri, mubuyila khulweefwe, nga nafwe ni khubuyila khulweenywe khu shifukhu sh'Omukasya.

¹⁵Lwekhuuba ise ni naba nga niwulila kumwiyikino kuno, narekekha ndi niitse isi muli khunyoowa, nio akile munyoole kumwikhoyo khabili.

¹⁶Nakana khubakyeniyila nga ndi khu ntsila yase ntsya i Masedoniya, naluundi ngobole isi muli nga namayo i Masedoniya, nio lwanyuma inyoole buyeeti bwentsila yase nga ntsya i Yuda.

¹⁷Ni naba nga iŋoonaŋoona ndyo, inywe mwaambaasa muri ise naba umuundu ushukhaana? Namwe n'imba nga ikhola iŋoonaŋoona ndyo, injikhola nga uwe kumubili uloma busa ari, “Ni abweene, ni abweene,” ate ndi mu mbuka nyene niyo ndweela waaloma ari, “Taawe, taawe?”

¹⁸Ni mwilala, nga Wele n'ali umulamu, sikhwalomatsakakho shilomo sheefwe khuri, “Ni abweene,” ate ndi khwashuusakho khuri, “Taawe,” ta.

¹⁹Lwekhuuba Umwaana wa Wele, Yesu Kristo, esi ifwe khwababoolela ise ni Silasi, ni Timosewo, s'aba ndi, “Ni abweene,” namwe, “Taawe,” ne mu niye busheele shiba ndi “Ni abweene.”

²⁰Lwekhuuba khusuubisa khwa Wele khwoosi khweesi akhola khuli “Ni abweene” mu Kristo. Ni nashiryo, isho shikila khwaloma khuri, “Amiina” mu Yesu Kristo, lwe shiriifwa sha Wele.

²¹Ne Wele niye ukhuwaangasa ifwe ni nanywe mu Kristo luundi wakhutsukhakho kamafura,

²²wakhurakho khabonelo kheewe, luundi wakhuwa Umwoyo weewe mu myoyo kyeefwe, nga shishokesanisa ibyo bibiitsya khubawo.

²³Ne ali Wele niye umujulilwa uwamanya bye mumwoyo kwase, lwashiina nalekha khukobolayo i Korinso ta, khulwekhuuba ise nakana khubasaasila inywe.

²⁴Ne akhuba ndi khubawangasakho khufukiilila khweenywe ta, ne khuraambila atweela ni nanywe lwe kumwikhoyo kweenywe, lwekhuuba khufukiilila nikhwo khubemisilewo.