Read lumasaaba 2 Bakorinso 10 Bible Online

2 Bakorinso 10 - lumasaaba bible

2 Bakorinso 10

¹Ne ise samweene Paulo, imbekontselela lwe buwolu, ni shiisa sha Kristo, ise nga esi muloma muri ndi uwe aasi, n'imba nga ndi ni nanywe; ne umurafu n'imba nga sindiyo ta.

²Ne ise imbekontselela inywe ndi; ise ni ndiitsa, inywe ni musaasile ise indekhe khuba murafu isi babaandu babaloma bari ifwe khumenya nga shiibala ni shikana ta.

³Ne ikhaba nga ifwe khumenya buulamu bwe babaandu busa, ne ifwe si khusoolana mu saambo yeesi babaandu basoolanamo ta.

⁴Bye khusoolana khweefwe sibili bye kumubili ta, ne bili bye kamaani ka Wele, khufuniaakaka tsikhoba tse kamaani.

⁵Ifwe khufuniaaka tsikhaando, ni shishiindu shoosi shishiyimisawo shishinjilila khumanya khwa Wele, luundi khura mu bubowe shishambaaso shoosi shibe shishiwulila Kristo.

⁶Luundi khuli beerekefu khuuwa shitaambiso umuundu yeesi uminyaala, inywe ni muba mwokesanisile khuwulila khweenywe.

⁷Inywe mulolelela bibiindu khu ngaaki busa. Noola iliyo umuundu yeesi uwiyikina ari ali mu Kristo, ni eyambaase luundi mu mwoyo kweewe ari nga naali uwa Kristo, ni nafwe khuli khuryo.

⁸Lwekhuuba ikhaba nga nibuyilakho khakyeekhe lwe bunyala bweesi Umukasya akhuwa ifwe bwe khubombekha inywe, ne akhuba bwe khuhesa ta, ise singane imaambisibwe tsisoni ta.

⁹Ise khanambaase ndi simbariisariisa busa ni tsibaluwa tsase ta.

¹⁰Lwekhuuba iliyo babaloma bari, “Tsibaluwa tseewe tsili tsisiro luundi tse kamaani, ne umweene n'abawo umweene nga umuundu, s'ali ni kamaani ta, ni khukanikha khweewe khwa busa.”

¹¹Ne babakanikha baryo, ni bamanye bari byeesi khukanikha mu baluwa nga sikhuliyo ta, nibyo bibyeene byeesi khulikhola nga khwetsile khuliwo ni nanywe.

¹²Ne lwekhuuba ifwe sikhukana khwefwaananisa, namwe khwekyelaasa fwabeene ni naabo babekanikhakho bye angaaki babeene ta. Ne ni bekyelaasa babeene bonyene na bonyene, baba nga sibali ni khumanya ta.

¹³Ne ifwe singene khwibuyile khubiririse ta, ne kane khukhwibuyila khweefwe khwoole khu lwakha lweesi Wele akhukhalila, mu mulimo ni kumulimo kweefwe mus'iinywe.

¹⁴Ifwe sikhulikho khubalaayisa naabi khukhwibuyila khweefwe nga ni khwakhila ta, ifwe khuba nga khukhoola isi muli ta, ne lwekhuuba ifweefwe nibo babanyoowa khukhwoola isi muli mu khuboolela Kamakhuuwa Kamalayi ka Kristo.

¹⁵Namwe ndi sikhwibuyila khwebiririsa nga khubuyila buraambi bwe babaandi ta, ne nga khwiyikina khuri khufukiilila khweenywe ni khutsowa, nafwe buraambi bweefwe mus'iinywe kane bubalahe naabi.

¹⁶Nio nafwe khunyale khuboolela Kamakhuuwa Kamalayi mu bisiintsa bibiindi bye aleeyi khufuura esi muli. Ifwe sikhukana khwebuyilila mu mulimo kukumalile khukholikha mu shisiintsa sh'omuundu ukuundi ta.

¹⁷Noola iliyo umuundu uwibuyila, ni ebuyilile mu Mukasya.

¹⁸Lwekhuuba shiili uyo uwibuyila umweene niye ufukiililwa ta, ne uyo yeesi Umukasya abuyila.