Read lumasaaba 2 Bakorinso 11 Bible Online

2 Bakorinso 11 - lumasaaba bible

2 Bakorinso 11

¹Khali muntsikhalilikhilekho mu busilu bwase bukyeekhe. Ilala ni muntsikhalilikhekho!

²Libuba lyeesi imbawaambila inywe lili lya Wele, lwekhuuba nabaselelela umuseetsa mutweela, niye Kristo, nga umukhaana ukhalikho lisaanda ta.

³Ne nariire, nga indemu iyo mu bukyesikyesi bwayo niyawombesa Eva, lukana nanywe bibyambaaso byeenywe binyala khukhwonakisibwa, mwaarura mukhwiwaanayo khweenywe khwelala khukwalaafu khukhukhalikho lisaanda ta mu Kristo.

⁴Lwekhuuba ni bayo umuundu ukuundi uwiitsa waababoolela Yesu ukuundi, isi ifwe khukhaboolatsakakho ta, namwe noola inywe muweebwa umwoyo ukuundi akhali uyo isi mwanyoowa khuweebwa, namwe noola mufukiilila kamakhuuwa kamalayi kakaandi kakakhafwaananakho ni naako keesi mwanyoowa khufukiilila, munyalisa bulayi khukhwikhalilikha.

⁵Ne nase sinambaasa ndi ifuurisibwakho na khafwiiti ni baarume beenywe bakhulubo ta.

⁶Ise nakhaba nga siindi umulayi mu khukanikha ta, ne khumanya ndi ni nakhwo. Mu buli saambo tsoosi, khwabokesanisa bwa ŋali bwoosi mu bwitsufu.

⁷Ise ni neyisa aasi indi nio inywe muniinisibwe angaaki lwe khubaboolela Kamakhuuwa Kamalayi ka Wele busa akhali shiindu shoosi ta, ise naba nakholile she bubwoonaki?

⁸Indyo ise nafwaana nga umunuuli isi bafukiilisi babaandi, ni nafukiilila buyeeti khukhwaama isi bali, nio imbakaanise inywe.

⁹Ni naba nga ndi atweela ni nanywe nga ni ndaamba shishiindu shoosi, ise sinahangalila umuundu yeesi ta, lwekhuuba be buulebe babeetsa nga baama i Masedoniya, bandereera bibiindu byoosi byeesi naba nga ingana. Naayiliinda bulayi mu byoosi nio indekhe khubahangalila ta, luundi kane niloosele khukholatsaka ndyo.

¹⁰Ne nga bwa ŋali bwa Kristo nga ni buli mus'iise, imbaawo umuundu yeesi ukane anyale khukhwakamisa khukhwibuyila khwase khuno mu bisiintsa bya Akaya byoosi ta.

¹¹Ne lwashiina? Lwekhuuba simbakana ta? Ne Wele wamanya ari ni mbakana.

¹²Ne sheesi ikhola ari nisho sheesi kane niloosele khukholatsaka, nio indusewo tsikhabi tsaabo nabo babakana khukhwibuyila nga baloma bari bakhola nga nafwe.

¹³Ne babaandu bano sibali baarume belala ta, bakhola bye bubeeyi, befwaananisa busa nga baarume ba Kristo.

¹⁴Ne mbaawo shishiyaangisa ta, lwekhuuba ni Sitaani naye efwaananisa nga malayika we buwaanga.

¹⁵Ni nashiryo, sishiyaangisa ta, noola babakaanisi beewe nabo babeene befwaananisa ni babakaanisi be bukwalaafu. Ibwakamilo balifuna ibyo bibifwaanana nga buraambi bwaabwe ni bwaba.

¹⁶Inoma luundi ndi umuundu yeesi akhantsambaasakho ari ise ndi umusilu ta, ne noola mwaambaasa muryo, ni muntsakaanile nga umusilu, nio nase ni buyilekho khakyeekhe.

¹⁷Mu bino byoosi bye khukhwibuyila, shinganikha nga Umukasya n'andakila ta, ne inoma nga umusilu, mukhwibuyila akhali buuri ta.

¹⁸Lwekhuuba bakali bebuyila nga babaandu ni bakana bashibone, ni nase kane ni buyile.

¹⁹Inywe mwikhaliliikha basilu ni kumwikhoyo, babaandi khu mwabeene muli bakyesi.

²⁰Lwekhuuba mwikhaliliikha umuundu yeesi nabekyelisa bakulwa, namwe nabalyamo, namwe nabawaamba, namwe nabasiindikhilisa iburaangisi, namwe nabakhupa khu lusaya.

²¹Ni tsisoni ngali inoma ndi, khwaba batoro naabi mulomo iyo. Ne mulomo yoosi, umuundu ni ebuyila mu shiindu shoosi, nase inoma nga umusilu ndi, nase ikhakakho khukhwibuyila!

²²Nibo bali ba Heburaniya? Nase ndi ndyo. Nibo ba Isiraeli? Ni nase ndi ndyo. Nibo bali babetsukhulu ba Iburayimu? Ni nase ndi ndyo.

²³Nibo bali babakaanisi ba Kristo? Ari inoma nga ukwiile tsintsoli, ise imbafuura. Mu khukhalaabana kimilimo, imbafuurisa; mu mapuusu ise nabeelemo kimiluundi mikali, nakhupiwa tsimiimbo lukali, naaba aambi ni khuufwa kimiluundi swa.

²⁴Luundi kimiluundi kiraano, Bayudaaya bakhupa tsimiimbo kamakhumi kataru nasyeenda.

²⁵Kimiluundi kitaru, banyweekha tsikhoba, lutweela bakhupa kamabaale, kimiluundi kitaru likhoŋolo lyefumalikha nga ndimo; nakonakho mu shisiba she nyaantsa shiilo shitweela, namalamo kumuusi kwoosi.

²⁶Imbeele nga injeenda lukali. Nanyoolatsaka bukosi mukhwambukha tsintsitsi; imbeelekho mu buubi bwe batsoonwaki; inyoolele bukosi isi Bayudaaya bashaase, n'isi Banaambo; inyoolele bukosi mu biriimba ni mu byaalo; imbeele mu bikosi khu nyaantsa, ni mu be buulebe be bubeeyi.

²⁷Nakhakakho khuraamba ni kamaani, ni khurekana, tsifuunda ngali nga shingonakho liilo ta; mu khwikhala ntsala ni khuuba bulesa, lukana mu khubuya ntsala kimiluundi mikali; luundi nga mbaawo she khukhwibiimba lwe mbewo ta, ni khuuba bukhuna.

²⁸Ne khulekha khurakho bibiindu bibiindi ta, ibeelewo bufunisi bubumangalila busheele busheele, nga nibwo bwe khukhwiyembelelatsaka lwe babaandu ba Wele babafukiilila mu Kristo.

²⁹Ne naanu umutoro, nase nindekha khuuba umutoro? Ne naanu ukhaasikha lwe shiibi, nase nalekha khuwamo kumwoyo?

³⁰Ne noola nga naakha khukhwibuyila, kane ni buyilile ni mu biindu ibyo bibyokesanisa butoro bwase.

³¹Ni Wele Paapa w'Omukasya Yesu, uyo uruuyibwa biilo ni biilo, wamanya ari ise simombesa ta.

³²Mu Damasiko, gafana uwaba aasi o muyiinga Areta, arawo baliindi be kimilyango kye shiriimba bari nio bamaambe.

³³Ne baambirisila mu numa iye mwitikiiyi, baantsikhisa aasi nga ndi mu shipo, khukhwoolesa ni nawona khukhwaama mu mukhono kweewe.