Read lumasaaba 2 Bakorinso 12 Bible Online

2 Bakorinso 12 - lumasaaba bible

2 Bakorinso 12

¹Ise shintsakhila khukhwibuyila ikhaba nga mbaawo shoosi sheesi inyala khuufunamo ta. Ne ari naandikanile khuukanikha khu khubonekhelwa ni khubiimbulilwa khw'Omukasya.

²Naamanya umuundu mu Kristo uwasutibwa waayilibwa mu ngaaki mwikulu lye khataru, kimiiko nga liikhumi na kine kikibirire (ne shino oba shabawo mu mubili, namwe akhali mu mubili ta, ise simanya ta, ne Wele umweene niye umanya).

³Luundi naamanya umuundu mweeneyo mbo aaba mu mubili, namwe akhali kumubili, ise simanya ta, ne Wele niye umanya.

⁴Aayilibwa mu ngaaki mu shifwo she khukhwikana, ibweeneyo waawulila bilomo bye shimoonyo she angaaki naabi, bilomo byeesi umuundu akhafukiililwa khuuloma ta.

⁵Ise kane ni buyile khu lw'omuundu nga uyo, ne ise khulwase samweene, shinyala khukhwibuyila ta, khuurusakho ni buyila khulwe butoro bwase.

⁶Lwekhuuba ise imba nga uwakhalawo khukhwibuyila, khali simbeele musilu ta, lwekhuuba khali imbeele ukanikha bya ŋali, ne shingana khukhwibuyila ta, lwekhuuba shingana umuundu yeesi khukhuntsambaasa ise khuuba umuundu uwe angaaki ta, khufuurisa byeesi ambona ise ikhola namwe byeesi awulila ise inoma ta.

⁷Ne ise khuulekha khuba umuundu uwiyiinga lwe bukhulu bwe khuubonekhelwa ukhwo khufuura byoosi, nareebwa liiwa mu mubili kwase lilyaba umurume wa Sitaani, khukhumbonabonisa, nio indekhe khukhwiyiinga ta.

⁸Ni lwe lomo yino, nekontselela Umukasya kimiluundi kitaru ndi andusemo liiwa lino.

⁹Ne niye waanoma ari, “Bubweela bwase bukhumale, lwekhuuba kamaani kaase kabonekhela ilala mu butoro.” Nashiryo, ni kumwikhoyo mukali, kane nibuyile lwe butoro bwase, nio kamaani ka Kristo keetse keekhe khusiise.

¹⁰Isho shishikila khulwa Kristo nekhoyela butoro, tsikhomo, bihangafu, khukubyeengebwa, ni bikosi, lwekhuuba n'imba nga ndi mutoro, ilwo lweesi mbeela ni kamaani.

¹¹Ise nekholile khuuba umusilu, ne inywe nibo babakilile nakhola indyo, lwekhuuba khali inywe mumumbuyiile ise. Lwekhuuba ikhaba nga siindi shiindu ta, ne ise sifuura baarume beenywe bakhulu ibo ta?

¹²Ilala bubonelo bw'omurume uwelala bwakholekha mwiinywe khuubirira mu milimo kyeesi nakhola akari mus'iinywe mukhwikhalilikha khwoosi, mu bubonelo, bibiyaangisa ni bye kamakaanga.

¹³Inywe mwafuuribwa muryeena ni bafukiilisi babaandi mu Yesu, khurusakho ndi ise sinabasitowela lwe buyeeti ta? Ni kane muntsiyakhile ise lwe khukhola she bubwoonaki shino.

¹⁴Bona aluno ise ndi khukhwiŋoonaŋoona khukhwiitsa isi muli kumuluundi kwe khataru, ne siindi basitowelela ta, lwekhuuba ise simbeentsa buyiindifu bweenywe ta, ne imbaweentsa inywe mwabeene. Lwekhuuba babaana sibali nibo babaakha khubiikhila basaali ta, ne basaali nibo babaakha khubiikhila babaana baabwe.

¹⁵Ni nase khulwase, indikhoya naabi khuwaanayo buli shiindu sheesi ndi nasho, ni nase samweene khukhwiwaanayo khulwe buulamu bweenywe. Ne noola ise imbakana inywe khufuura, inywe mungane ise khakyeekhe?

¹⁶Inywe mwabeene kane mufukiilile muri ise sinabasitowelelakho ta, ne balala baloma bari lwekhuuba ise naba umuyungubafu, nabareka mu luwomelo nabawaamba.

¹⁷Ne khu babaandu beesi nabarumanila, naanu khu nibo isi nabiriramo nio inyoole kamafuurisa mus'iinywe?

¹⁸Ise naloma Tito khukhwiitsa isi muli, narumana n'uwe buulebe ukuundi khukhwiitsa ni naye. Tito abalyakhanakho shishiindu shoosi? Ifwe sikhwaraangililwa n'Umwoyo niye mutweela? Khwakyeenda musaambo niyo ndweela?

¹⁹Khukhwoolesa ari inywe mubeele mwaambaasa muri abe ifwe khuli khukhwiwotsakho mu moni tseenywe? Ifwe khubeele khulomela mu moni tsa Wele ni Kristo, ni nebyo byoosi byeesi khukhola be buulebe bakanwa, bili bye khuboombekha inywe.

²⁰Ise ndi ni buuri ndi manya nga ni kane niitse isi muli, kane imbanyoole nga simuli nga ni nandikanile mube ta, ni nanywe munyala mwanyoola nga siindi nga ni mwandikanile imbe ta. Nariire ndi manya lukana kane abewo khulomana, libuba, lirima, khukhwikhalamo, khukhoma, khukuta, khukhwiyiinga, ni shisaayumba.

²¹Naluundi nariire ndi manya ni ndiitsa luundi, Wele wase kane ambose mu moni tseenywe, nio nase indilile bakali babonekha khaale, ne baalekha khukhwibiiyisa bye bunyaalu, buyeyani, ni lukhobe, byeesi baaba bakholatsaka.