Read lumasaaba 2 Bakorinso 13 Bible Online

2 Bakorinso 13 - lumasaaba bible

2 Bakorinso 13

¹Luno nilwo lukhaabe luluukhola khataru ise khukhwiitsa isi muli. Buli lomo yoosi yaakha khuwandalasibwa ni bujulisi bwe baboni babili namwe bataru.

²Ngana khuuboolela abo babooneka mataayi, ni naabo babaaramile boosi, nanyoowa khubareewula mataayi nga niitsa khubakyeniyila kumuluundi kwe khabili, ari ngana khu shiloma luundi nakhaba nga siindiyo ta: nga neetsile isi muli luundi, mbaawo umuundu uliwona shitaambiso ta.

³Ni abweenewo mulifuna shihandalasa sheesi muweentsa, shishokesa shiri Kristo akanikhila mus'iise. Niye s'ali mutoro nga akanikha isi muli ta, ne ali ni kamaani mus'iinywe.

⁴Ilala atsaangililwa khu musalaba mu butoro, ne ari mulamu lwe kamaani ka Wele. Ni nafwe khuryo khuli batoro mu niye, ne lwe kamaani ka Wele khuli balamu mu niye lwe khubakaanisa inywe.

⁵Ni mwitseme mwabeene, mubone noola muli mu khufukiilila, ni mwikhake mwabeene. Inywe mwabeene simumanya muri Yesu Kristo ali mus'iinywe? Khurusakho nga mwakhasikhana.

⁶Ne khaniyikine ndi, mulimanya muri ifwe sikhuli babaakhasikhana ta.

⁷Ne ari khuloomba Wele khuri mulekhe khukholakho shiibi shoosi ta, akhuba ndi nio babaandu bakhubone ifwe nga khukhusiimibwa ta, ne njeeba inywe khukholatsaka bulayi, ikhaba nga ifwe khufwanikha nga babaakhasikhana.

⁸Lwekhuuba sikhunyala khukhola shishiindu shoosi shishi khaandisa bwa ŋali ta, ne njeeba lwe bwa ŋali.

⁹Ifwe khwikhoya ni khuba nga khuli batoro, ne inywe nga muli ni kamaani. Ni nafwe sheesi khuloomba nisho shino ndi, mube bakwalaafu.

¹⁰Nashiryo, shino nisho shishikila narona bibiindu bino nga sindiyo ni nanywe ta, nio nga netsile, indekhe khuba murafu naabi isiinywe ta, nga bunyala ni buli bweesi Umukasya amba lwe khuboombekha inywe, ne akhuba lwe khubafuniyaka ta.

¹¹Ne ari shimaliilisi be buulebe, aliinde. Ni mukhakekho naabi lwe bukwalaafu, murekeerese khuureewula khwase, mube butweela, mube ni lukoosi. Ni Wele we lukoosi ni khuukana, kane abatsake ni nanywe.

¹²Ni musheesane nga mukwaana mu bifuba khwe bakhosefu.

¹³Bakhosefu boosi baabasheesa. Bubweela bw'Omukasya Yesu Kristo, ni khuukana khwa Wele, ni butweela bw'Omwoyo Umukhosefu, bibaatsake ni nanywe mweesi.