Read lumasaaba 2 Bakorinso 2 Bible Online

2 Bakorinso 2 - lumasaaba bible

2 Bakorinso 2

¹Shikila ise nakhalawo mu mwoyo kwase khuulekha khwiitsa isi muli khuubatsiinisa ta.

²Lwekhuuba n'imba nga imbatsiinisa, naanu uramileyo khukhuntsikhoyesa ise, khurusakho inywe beesi natsiinisa?

³Isho nisho shishakila nabaronela ndi nio nga netsile, indekhe khukhalasibwa ni naabo babaandibeele bantsikhoyesa ta. Lwekhuuba naba ni khuwaangasibwa mu mwoyo isi muli ndi, n'imba ni kumwikhoyo nanywe kane mukabanane mu mwikhoyo kwase.

⁴Lwekhuuba nabaronela mu mutaambo ni khutsiinisibwa khwe mu mwoyo, ni kamasika kamakali, akhuba ndi khubakhalasa inywe ta, ne ndi nio mumanye khuukana khwase nga ni khuli khukali isi muli.

⁵Ne noola umuundu yeesi areera khutsiinisa, khu luwaande luluundi khulekha khuutsya mu bileeyi, aba wakhuntsiinisa ise senyene ta, ne njeeba ni nanywe mweesi.

⁶Lw'omuundu ufwaana aryo, shitaambiso shishimuweebwa ni babaandu bakali shimumala.

⁷Ne ana ari, umuundu ufwaana aryo, mumwiyakhila, mumwikhoyese, nio manya kumutaambo kulekhe khuuba kumukali khumunyilwanisa ta.

⁸Nashiryo, imbekontselela umuundu ufwaana aryo, mumwokese khuukana khweenywe naabi.

⁹Ilomo iyakila nabaronela nga ngana khubakhaka nio imanye, oba nga munyala khuuba babawulila mu biindu byoosi.

¹⁰Umuundu yeesi is'inywe mwiyakhila, ni nase imwiyakhila. Noola iliyo sheesi niyakhila, ishikhola khulweenywe mu moni tsa Kristo,

¹¹nio akile Sitaani alekhe khukhwiyiingilakho ta, lwekhuuba ifwe khwaamanya tsimbomelo tseewe.

¹²Indyo ni noola mu Turowa khuboolela Kamakhuuwa Kamalayi ka Kristo, nanyoola nga kumulyaango kwantsikuliwilewo mu Mukasya,

¹³ne ndi sinaba ni lukoosi mu mwoyo ta, lwekhuuba sinanyoolayo uwe buulebe Tito ta. Indyo nabasheesakho busa, nabasibula naatsya i Masedoniya.

¹⁴Ne Wele asiimibwe, niye ukhuraangilila busheele mu Kristo, khukhwoolesa mu khuwula, ni khuubirira mwiifwe, wokesanisa luundi wasalanisa isilikakha iye khumanya iwunya bulayi osi, osi. Wele akhuraambisa ifwe khusalanisa khumanya khukhuwaamba khu niye.

¹⁵Lwekhuuba ifwe ilala khuli shishiwunya bulayi sha Kristo isi Wele, mu baandu babawonesebwa, ni muubo babahela.

¹⁶Isi uyo uhela, khuli khuwunya khwe khuufwa khukhureera khuufwa, ne isi uyo uwonesebwa, khuli khuwunya khwe buulamu, khukhureera buulamu. Naanu unyala walekhaana ni khulaangibwa khuno?

¹⁷Ifwe sikhuli nga baakali babaaramile ta, babaatsya nga basuubula Ilomo ya Wele lwe kamafuurisa ta, ne ifwe mu moni tsa Kristo khuboola bilomo bya ŋali bya Wele, nga babaandu babaarumaniwa ni Wele.