Read lumasaaba 2 Bakorinso 3 Bible Online

2 Bakorinso 3 - lumasaaba bible

2 Bakorinso 3

¹Inywe mwaambaasa muri ifwe khulikho khurakikha khukhwibuyila luundi? Namwe shili ndi nga babaandu babaandi ni bali, khuri khukana tsibaluwa tsitsikhuboolakho isi muli, namwe khukhwaama isi muli?

²Taawe! Inywe mwabeene muli ibaluwa yeefwe, iyaronebwa khu mwoyo kweenywe, imanyikha, luundi isomebwa na buli muundu.

³Ni nanywe mwabeene mwokesana nga muli ibaluwa iyaama isi Kristo, iyakhuweebwa ifwe khukyakaanisayo; niyo ili ibaluwa ikhaaronebwa ni bwiino ta, ne n'Umwoyo wa Wele Umulamu, niyo ibaluwa iyaronebwa akhuba khu bipaande bye kamabaale ta, ne khu bipaande bye kimyoyo kye bubundu bwenywe.

⁴Buno nibwo bubwiyikino bweefwe bweesi khuli nabwo isi Wele khulwa Kristo,

⁵sikhuloma ndi ifwe fwabeene khunyala khwaloma khuri khwekholeele ta, ne khunyala khweefwe khwaama isi Wele.

⁶Luundi niye ukhunyalisa ifwe khuuba babakaanisi be Indakaano Imbya, Indakaano iye kamakaambila kakakharonebwa ta, ne niyo iye mu mwoyo. Lwekhuuba indakaano iye mu makaambila kakaaronebwa yiira, ne iy'Omwoyo ireera buulamu.

⁷Ne ari bubwakaanisi bubwareera khuufwa nibwo bubwaronebwa mu makaambila khu mabaale, bwetsila mu shiriifwa, ni khunyala babaana ba Isiraeli balekha khunyala khukhwofwaasa mu moni mwa Musa ta, lwe shiriifwa shishamubakho, ikhaba nga shaba shiitsya khuwawo.

⁸Bubwakaanisi bw'Omwoyo sibulifuurisa naabi khuuba ni shiriifwa?

⁹Noola bubwakaanisi bubukhureerera kumusaango kwe khuufwa buba ni shiriifwa, ne bubwakaanisi bwe angaaki bubureerera babaandu bukwalaafu sibulifuurisa shiriifwa!

¹⁰Lwekhuuba isho shishaba she shiriifwa mataayi, ari sishili nasho ta, lwe shiriifwa isho shishifuurisakho.

¹¹Lwekhuuba noola isho shishaba shiitsya khuwawo sheetsa ni shiriifwa, isho shikhawawo shaakha khuuba ni shiriifwa shishifuurakho.

¹²Ni nashiryo, khukhwaama nga ni khuli ni kumwiyikino kuno, khukanikha ni kamaani.

¹³Ifwe sikhuli nga Musa n'akhola ta, uwefuunikhilila mu moni mweewe nio akile babaana ba Isiraeli balekhe khubona shiriifwa isho shishaba shiili khuwawo ta.

¹⁴Ne bibyambaaso byaabwe byawangasibwa, lwekhuuba ni khukhwoolesa shaleelo shino, shishibiimbakho sheene shishiliwo, ni baba nga basoma Indakaano Ikhale, naluundi shishiili khurusibwawo ta, lwekhuuba mu Kristo mwonyene nimwo mumuuli khurusawo khwe shishibiimbakho she Indakaano Ikhale.

¹⁵Ni khukhwoolesa shaleelo, buli lweesi basomela kamakaambila ka Musa, shishibiimbakho isho shishibiimba khu myoyo kyaabwe.

¹⁶Ne buli lweesi umuundu ashuukha weetsa isi Umukasya, shishibiimbakho isho shirusibwawo.

¹⁷Aluno ari, Umukasya esi bubakha buno bulomakho, niye Umwoyo, ni esi Umwoyo w'Omukasya aba, niwo abawo lukoosi.

¹⁸Ne lwekhuuba is'ifwe khuli, shishibiimbakho sishili khu moni ta, khwokesanisa shiriifwa sh'Omukasya. Nashiryo khukalusibwa mu shifwaani sheewe, nga khurura mu shifwaani shilala khwatsya mu shiindi, lwekhuuba khuno nikhwo khuraamba khw'Omukasya umweene uli Umwoyo.