Read lumasaaba 2 Bakorinso 4 Bible Online

2 Bakorinso 4 - lumasaaba bible

2 Bakorinso 4

¹Ni nashiryo, lwekhuuba khwaweebwa bubwakaanisi buno, lwe shiisa sha Wele, sikhuwamo kamaani ta.

²Ne khwaayikaana buraambi bwe mushimoonyo, luundi bwe tsisoni, nga sikhukyeendela mu bubeeyi namwe mu khuborosa Ilomo ya Wele ta, ne lwe khuuboola bya ŋali; khukhwiboolakho fwabeene mu lubuula isi kumwoyo kwa buli muundu mu moni tsa Wele.

³Ne noola kamakhuuwa keefwe kamalayi keesi khuboolela kabiimbibwakho, kabiimbibwakho isi abo babaali khuuhela bonyene.

⁴Khu lubeka lwaabwe, wele we shiibala shino waabofwaasa kimyoyo kye bakhafukiilila, balekhe khubona buwaanga kwe Kamakhuuwa Kamalayi ke shiriifwa sha Kristo ta, niye umweene uuli shifwaani sha Wele.

⁵Lwekhuuba sheesi khuboolela sishili fwabeene ta, ne Yesu Kristo nga niye Umukasya, ni nafwe fwabeene nga babakaanisi beenywe khulwa Yesu.

⁶Wele uwaaloma ari, “Kha buwaanga kwaburukhe mu shilima,” niye mutweela mweene uwaburukha mu myoyo kyeefwe, khukhuwa ifwe buwaanga bwe khumanya shiriifwa sha Wele mu moni tsa Kristo.

⁷Ne ifwe khuli ni buyiindifu buno mu nyuungu tse liiloba, nio kamaani kamakali kakaafuura kaame isi Wele, akhuba isiifwe ta.

⁸Ifwe khumiinilisibwa tsimbeka tsoosi, ne sikhumilyangukhaka ta, lukana khwekanakana, ne sikhuwamo kumwoyo ta.

⁹Khukubyeengebwa, ne sikhwalekhebwa fwenyene ta, khukhupibwa aasi, ne sikhumalibwawo ta.

¹⁰Khwasuta busheele mu mibili kyeefwe khuufwa khwa Yesu, nio manya buulamu bwa Yesu bubonekhele mu mibili kyeefwe.

¹¹Lwekhuuba ifwe babaali baalamu khuwaanibwayo busheele mu khufwa khulwa Yesu, nio bulamu bweewe bubonekhele mu mibili kyeefwe kikiifwa.

¹²Ni nashiryo khuufwa khuraambila mus'iifwe, ne buulamu buraambila mus'iinywe.

¹³Bibyaronebwa biloma biri, “Nafukiilila kila naloma.” Nafwe khuryo khufukiilila kila khuloma.

¹⁴Lwekhuuba khwaamanyile khuri, umweeneyo uwalamusa Umukasya Yesu mu bafu, alikhulamusila fweesi atweela ni Yesu, nio akhureere atweela ni nanywe mu moni tseewe.

¹⁵Bino byoosi biliwo khulwe bulayi bweenywe, nio nga bubweela ni bwiloosela khukhwoolelela babaandu bakali, byoosi bireere khusiima khukhwiloosela lwe shiriifwa sha Wele.

¹⁶Ni lwe lomo yino, sikhuwamo kamaani ta. Ikhaba nga kimibili kyeefwe kye khu ngaaki kiwawo, ne buulamu bweefwe bwe mu mwoyo mukari, butsya bukalusibwa bushaakha bifukhu byoosi.

¹⁷Lwekhuuba khutaambisibwa khweefwe khwa ari khukyeekhe luundi khwe mbuka busa khukhwiloosela khukhureerera shiriifwa shikali she biilo ni biilo.

¹⁸Ni nashiryo, ifwe sikhwomiisila tsimoni tseefwe khu biindu bibonekha ta, ne khwiibyo bikhabonekha ta. Lwekhuuba ibyo bibibonekha bili bye shisiintsa busa, ne bibiindu bibikhabonekha bili bye biilo ni biilo.